2 THÂTIHZYRONA 6 - Mara Bible RV (BSI)

Izarei phopi châta Sawlawmaw thlâhchhâna

¹ Chatawhcha Sawlawmaw ta, “‘Meihdo chhapa liata ei pahrâ aw,’ Abeipa ta tah ta.

² Châhrasala na chhâzaw pahrâna su châta, O rônahpa ei cha sapa haw,” tah ta.

³ Izarei zawpi zydua amâ dua thlâh ha nota, abei cha zawpi lâ a heih ta, Izarei zawpi zydua châta byhnâ aw ta.

⁴ Sawlawmaw ta, “Ei paw Dâvi hnohta a pakah ta bie a taih ta, a ku ta a bietai a patlôtuhpa Abeipa, Izarei Khazohpa cha reithaipa ta y mawh sy!

⁵ Abeipa ta, ‘Izi râh tawhta ei phopi Izarei sawzy ei chhi papua noh tawhta, Izarei chizy hry liata kheihawhpa khih hmahta ei moh y nawpa o sa nawpa ta a tlyh beih leipa na ta, ei phopi Izarei chhituhpa châta ahy hmah a tlyh bei hra va na.

⁶ Tahmâ deikua cha, ei moh y nawpa châta Zerusale a tlyh ha na ta, ei phopi Izarei chhituhpa châta Dâvi ei tlyh haw,’ tahpa ta reih ta.

⁷ Ei paw Dâvi khata Abeipa, Izarei Khazohpa moh châta o sa khona a palôh liata vaw hnei ta.

⁸ Châhrasala Abeipa ta ei paw Dâvi hnohta, ‘Ei moh châta o sa khona palôh hnei chi ta, cha hawhpa palôh na hneipa cha na tao pha na.

⁹ Châhrasala o a sa awpa cha nâ châ aw va chi. Sawchapaw na sa awpa ta ei moh châta o cha a sa aw,’ tah ha ta.

¹⁰ Abeipa ta a bietai cha tahmâ a patlô haw. Abeipa ta bie â vaw taipa hawh tlai ta, ei paw Dâvi su liata kei a duahpa ta, Izarei beidyuchhai liata a tyuh na ta, Abeipa, Izarei Khazohpa moh châta o cha ei sa haw.

¹¹ Cha liata Abeipa ta Izarei sawzy hnohta a hraipa Abeipa Biehrai yna Byh ei soh haw,” tah ta.

¹² Chatawhcha Sawlawmaw cha Izarei a hmaohpakhypa zydua mohmô ta Abeipa maisâh hmiakô liata a duah ta, a ku pazawh ta.

¹³ Sawlawmaw cha dawh laitlâ, a doh lâ dy pangawh, a hâ lâ dy pangawh, â sâhna lâ dy thôh ta tao ta, Achhyna o dôhpachhôh tlyhmia liata a patyupa chô liata a duah ta. Izarei zawpi zydua hmiakô liata a pakhu paneih ta, avâ lâ a heipa ta a bâh pazawh ta, hetana heta thlah a chhâ.

¹⁴ “Hy Abeipa, Izarei Khazohpa y, nâ hawhpa Khazohpa he alei nata avâ liata y veih ei. Nâ cha pathi­palôh tlokhuh ta na lâpi a chhihpa châ chakaotuhpazy chô liata bietai patlôpa ta, ngiachhiena a palâsa tyhpa na châ.

¹⁵ Châ chakaotuhpa ei paw Dâvi hnohta na bietai na patlô haw. Na pakah ta reih chi ta, tanoh na ku ta na patlô haw.

¹⁶ Chavâta Hy Abeipa, Izarei Khazohpa y, châ chakaotuhpa ei paw Dâvi hnohta, ‘Na pathlazy ta ama lâpizy pakhâta ta pachâ ei sala, nâ ta ei lâpi nâ chhihpa hawhna heta, âmo chhao ta ei ryhpa ama zyh lymâ khiahta cha, Izarei beidyuchhai liata ei hmiakô lia a tyuh awpa chyhsa na pathlazy tawhta chie aw veih ei’, tahpa ta bie nâ vaw taihpa kha patlô mah y.

¹⁷ Chavâta Hy Abeipa, Izarei Khazohpa y, châ chakaotuhpa Dâvi hnohta na reipa bie kha ngiachhiepa ta pa-i mah y.

¹⁸ “Châhrasala Khazohpa cha alei chô liata chyhsapa hry liata a pahrâ tlai aw ma? Pachâ tua, avâ nata avâ a sâh chaipa liata hmah nâ tlôh leipa châ ta, he o ei sapa liata chhochhi cha, nâ tlôh lei pachai aw dia!

¹⁹ Chatahrasala Hy Abeipa ei Khazohpa y, châ chakaotuhpa ta a cha padona nata a thlahchhâna he nathlie la, na hmiakô liata châ chakaotuhpa thlahchhâna nata hiana he rie pachâ mah y.

²⁰ Chatanachata he su lâ he a vaw heih la, châ chakaotuhpa ta he su lâ a heihpa ta a thlahchhâna he nathlie la, ‘Cha liata ei moh a y aw,’ na tahna su, he o lâ tlai he chhô nah zâ ta na mo tawpâ thlâh ha mah y.

²¹ Châ chakaotuhpa nata na phopi Izarei sawzy ta he su lâ a heihpa ta thlah ama chhâ tita, ama hianazy vaw nathlie tyh mah y. Na pahrâna su vârâh tawhta vaw nathlie la, na thei tita a ngiahthai tyh mah y.

²² “Chyhsa ahy tlyma a vaih chô liata hmo a paraopa vâta bie pataihsa awpa byuh sala, he o lâ a vypa ta na maisâh hmiakô liata bie â taih khiahta cha,

²³ vârâh tawhta vaw nathlie la, châ chakaotuhpazy cha pachia la, thailei a châpa cha a hmotaopa a luh chô liata patlôsapa ta viarithô la, mosiapa cha thaipachâsa la, a siana yzie hawhta lymâ pie mah y.

²⁴ “Na phopi Izarei sawzy ta na chô liata ama moleipa vâta, chariah hmia liata nawh ha ei sala, nâ la a vaw heih heihpa ta, na moh a châhkheipa ta, he o liata thlahchhâpa ta ama cha hiah khiahta cha,

²⁵ vârâh tawhta vaw nathlie la, na phopi Izarei moleina cha a ngiahthai la, ama pathlatuhpazy nata âmo na piepa râh lâ a chhi heih mah y.

²⁶ “Na phopi Izarei sawzy na chô liata ama moleina vâta, avâ khaw chi ta, avâ rai pasuasa leipa ta ama rie na pathei tita, he su lâ a heihpa ta thlahchhâ ei sala, na moh a châhkheipa ta, ama moleina amâ heihsai khiahta cha,

²⁷ vârâh tawhta vaw nathlie la, châ chakaotuhpa na phopi Izarei sawzy moleina cha a ngiahthai mah y. Lâpi dopa a chhih awpa ta âmo cha pachu la, ryuto châta na phopi na piepa râh liana he avâ pasuasa heih tyh mah y.

²⁸ “Chakâhna tlyma, potlana tlyma, chawhkaraina tlyma, hmyna tlyma, khawsu tlyma, chângyu tlyma râh liata vaw y sala, ama chariahzy ta ama khihpizy dôhpa ta, potlana nata pasana kheihawhpa rai vaw tlô sala,

²⁹ ama pasataona nata ama pachârôhna pahno chyupa ta, mopakha ta tlyma, Izarei zawpi ta tlyma, he o lâ he a heihpa ta ama ku pazawh ei sala, thlahchhâna nata hiana ama vaw tlôkhei khiahta cha,

³⁰ na pahrâna su vârâh tawhta vaw nathlie la, a ngiahthai mah y. Ama palôh na pahnopa nata ama hrozie lymâ hawhta, chyhsa to chô liata hria la tao mah y. Nâma, nâma deita he Âdâh pathlazy palôh a pahnotuhpa châ tlôh chi ta.

³¹ Chatanachata miah pathlatuhpazy na piepa râh liata ama pahrâ chhôh zydua ta, cha chi aw ei ta, na lâpi amâ chhih lymâ aw.

³² “Cha hawhna hra chata, na phopi Izarei saw a châ leipa chihropa chyhsa ta, na moh rônahpa nata na ku thatlôpa nata na bâh pazawhpa thâtih a theipa vâta, râh hlapi tawhta a vy sala, he o lâ a heihpa ta thlah a chhâ tita,

³³ na pahrâna su vârâh tawhta vaw nathlie la, chihropa ta a cha hiapa cha taopa mah y. Chatanachata khizaw phopi zydua ta na moh pahno aw ei ta, Izarei sawzy ta eima cha chipa hawhta, âmo chhao ta cha chi aw ei ta, o ei sapa he na moh a phaohpa a châ tahpa ama pahno aw.

³⁴ “Na phopi ta ama chariahzy a dyuh awpa ta sie ei sala, kheihawhpa lâpi lâ tawhta na tuapa chhao ta, nâ tlyhpa khihpi nata na moh châta ei sapa o lâ he a heihpa ta nâ lâta thlah ama chhâ khiahta cha,

³⁵ ama thlahchhâna nata ama hiana cha vârâh tawhta vaw nathlie la, ama chhâh a châ mah y.

³⁶ “Chyhsa ahy hmah a molei beih leipa y veih ei. Na phopi chhao ta na chô liata ama molei tita, ama chô liata na pathi ia ta, chavâta ama chariahpa ku liata âmo cha pie chi ta, râh lâhlapi lâta tlyma, lâhnia liata tlyma, sei ta a chhipa ta y ei sala,

³⁷ sei ta amâ chhina râh liata ama palôh zy ananopa ta, ro ei sala, sei ama châna râh liana chata, ‘Hmo vaw parao ha pi ta, â do lei ngaitapa nata molei ngaitapa ta eima vaw tao haw,’ tahpa ta cha hiah ei sala,

³⁸ sei ta amâ chhina râh liana chata, ama pathipalôh tlokhuh ta nata ama thlahpa tlokhuh ta ro ei sala, âmo pathlatuhpazy hnohta na piepa ama râh nata nâ tlyhpa khihpi nata na moh châta ei sapa o lâ he a heihpa ta, nâ lâta thlah ama chhâ khiahta cha,

³⁹ ama thlahchhâna nata ama hiana cha, na pahrâna su vârâh tawhta vaw nathlie la, ama hiana cha hlao patloh la, na chô liata a molei hapa na phopi cha a ngiahthai mah y.

⁴⁰ Hy ei Khazohpa y, he thlahchhâna su lâ he ngiachhiepa ta na mo padeih la, na nah pachôh mah y.

⁴¹ “Hy Zehôvâh Khazohpa y, Tahmâ thyu la, Na thatlôna Byh chhaota, Nâ pahâna su lâ sie mah y. Hy Zehôvâh Khazohpa y, Na theihthaipazy pachhana ta tobi la, Na mopathaihpazy na phana liata y mawh ei sy.

⁴² Hy Zehôvâh Khazohpa y, Na sathawthupa hmia su hro lâ paheisa leipa la, Châ chakaotuhpa Dâvi chô liata na zawngiahna kha, Khâ a thei thlâh ha mah y.”