2 THÂTIHZYRONA 5 - Mara Bible RV (BSI)

Biehrai Byh Achhyna o liata sopa a châ

¹ Cha hawhna chata Sawlawmaw ta Abeipa o châta a tao awpa zydua cha patlô ta. A paw Dâvi ta Abeipa lâ a vaw hlâ hapa tâkâzy, ngôhzy nata hmobaoh zydua a ngiakhei ta, Khazohpa o liata sôh sopakhyna suzy liata soh khai ta.

² Sawlawmaw ta Abeipa Biehrai Byh cha, Dâvi khihpi Zaio tawhta la papua awpa ta, Izarei pathla chhituhpa zydua, Izarei machâzy nata Izarei chi hyutuhpa zydua Zerusale liata awpakhy ta.

³ Chatanachata Izarei chapaw zydua cha, thla sarina kyhchhi daihti liata abei hmiakô liata a hmaohpakhy ei ta.

⁴ Izarei machâ zydua a vy ei ta, Livai pathlazy ta Byh cha a sy ei ta.

⁵ Abeipa Byh, ahmaohna poh o nata poh o liata hmobaoh pathaihpa zydua a sy ei ta. Chazy cha Livai pathla theihthaipazy ta amâ sy.

⁶ Bei Sawlawmaw nata a hmiakô liata Izarei zawpi a hmaohpakhypa zydua cha, Byh hmiakô liata y ei ta, mietaku nata viahchao tôhpa hluhpi ta atheihna hlâ ei ta, a hluhzie cha paki tiah awpa nata rei tiah awpa châ vei.

⁷ Chatanachata theihthaipazy ta Abeipa Bieh­rai Byh cha, Achhyna o chhôh supathaihpa liata a y nawpa su liata a ngiakhei ei ta, Cherubi mathlawzy ry liata Su Pathaih Chaipa liata soh ei ta.

⁸ Cherubizy cha Byh luh chô liata ama mathlaw pakai ei ta, cherubizy ta Byh nata asyna lâzy cha pahli ei ta.

⁹ A lâzy cha a seih kawpa vâta, Achhyna o chhôh supathaihpa hmiakô liata Su Pathaihpa tawhta a pawhmaozy hmô theipa a châ. Khôtho lâ tawh deikua hmô theipa châ vei. Chazy cha tanoh taihta cha liata a y thlâh haw.

¹⁰ Lôphia miano tah leipa ta cha, Byh chhôh liata hmo hropa khâpa hmah y vei. Cha lôphiazy cha Izi tawhta ama kaw pua nota, Abeipa ta Izarei sawzy hnohta bie a hraina su Hôribâ Tlâh liata Mawsi ta a khôpazy a châ.

¹¹ Cha liata a ypa theihthaipazy cha, py to ta amâ pathai khai hapa vâta, Su Pathaihpa tawhta vaw pua ei ta.

¹² Livai pathla hlasatuhpa zydua, Asâpha, Hemâ, Zeduthu nata ama sawchapawzy nata ama chiheihzy cha lini poh rih dipa ta a tobipa ta, paotlâzy, tlaipihzy, totâzy chhaota maisâh nochhi lâchhâh liata a duah ei ta. Chiahmie tôtuhpa theihthaipa 120 chhao ama hnohta a duah hra ei ta.

¹³ Chiahmie tôtuhpazy nata hlasatuhpazy cha â raohpa ta, ao kha hawhta ao papuapa ta, Abeipa reithaipa ta alyna hla sa ei ta. Hla a vaw puapa nahta, chiahmie pyu, paotlâ pyu nata pyungiapa chhaichhi pyu hropazy vaw pua ta, “Ano cha pha ta, A zawngiahna cha chhâzaw ta a y aw,” tahpa ta Abeipa ama reithai nahta, Abeipa o cha meihdo ta vaw bi ha ta;

¹⁴ meihdo vâna chata theihthaipazy cha chakao awpa ta a duah thei khao veih ei. Abeipa rônahna ta Khazohpa o cha a bie khai haw.