2 THÂTIHZYRONA 4 - Mara Bible RV (BSI)

Achhyna o hmobaohzy

¹ Dawh maisâh tao ta, a doh lâ dy kih, a hâ lâ dy kih, â sâhna lâ dy hrawh a châ.

² Chatawhcha dawh tipâh ahlôpa tao ta, a chhôh dy hrawh tla ta, dy pangawh a sâh ta, dy sythôh ahlôpa a châ.

³ Tipâh tlâh ry liata, dy kha liata titheih theih hrawh lymâ ta, tipâh a dôna taihta titheihzy pataohpa a châ. Titheihzy cha tlâh no ta paziahpa châ ta, tipâh nata leih pâpa a châ.

⁴ Tipâh cha viahchao tôhpa pô hrawh hleino chô liata patyupa châ ta, pô thôh maw lâ a heih ta, pô thôh notla lâ a heih ta, pô thôh chho lâ a heih ta, pô thôh nochhi lâ â heih. Viahchao tôhpazy chô liana chata tipâh cha patyupa châ ta, a chhôh lâ ama chao ama chhy khai.

⁵ Tipâh cha pazah tie chha ta, a tlâh cha nyu tlâh hawhta, lilipaw lyupa ta taopa châ ta, tibyh 3,000 â tlôh.

⁶ A si nawpa ta rahô miahrawh tao ta, chho lâ miapangawh, maw lâ miapangawh patyu ta. Chazy cha raopa hlâna châta hmâpa hmobaohzy pasi nawpa châ ta, tipâh cha theihthaipazy a si nawpa châta a châ.

⁷ A taonazie awpa raopa hawhta, ngôh ta meiôh patyuna miahrawh tao ta, Achhyna o chhô liata chho lâchhâh miapangawh, maw lâchhâh miapangawh soh ta.

⁸ Tlâhkhai miahrawh tao ta, Achhyna o chhôh liata chho lâchhâh miapangawh, maw lâchhâh miapangawh soh ta. Ngôh rahô chhao za kha a tao.

⁹ Chazy hleikhô ta, theihthaipazy tlyhmia nata tlyhmia kawhpazy dôh ta, tlyhmia ochhizy tao ta, ochhizy cha dawh ta a pahu.

¹⁰ Tipâh cha Achhyna o chho nochhi chaki liata a patyu.

¹¹ Hirâ ta beihzy, buchâh linazy nata biebuhzy tao hra ta. Chatanachata Hirâ ta Khazohpa o sana liata Bei Sawlawmaw châta a tao awpazy cha patlô ta.

¹² Hezy he a tao: Atôh miano, biebuhzy, atôhzy pawhmao liata pabyuhpa miano, atôhzy pawhmao liata pabyuhpazy chô liata biebuhzy khuna sao miano nata

¹³ dawh tôhzy pawhmao liata dawh luh byuhpazy chô liata biebuhzy khuna dawh sao mianozy liata, tlâh no ta patlâh awpa pawmikarânâ nothlahpa 400 tao ta.

¹⁴ Patyunazy, patyuna chô liata biebuhzy chhao tao ta,

¹⁵ tipâh miakha nata a ry liata viahchao tôhpa pô hrawh hleino a tao.

¹⁶ Beihzy, buchâh linazy, sa thaonazy nata a hmobaoh zydua cha, Hurâmabi ta Abeipa o châta dawh patliepa ta Bei Sawlawmaw châta a tao.

¹⁷ Chazy cha abei ta Zawdâh bypi liata Sukô nata Zeredâ likawh beihlei su liata leih ta.

¹⁸ Sawlawmaw ta hmobaoh hluhpi tao ta, hmobaohzy tao nawpa ta dawh a hmâpa zie cha, khopathliah tiah awpa châ vei.

¹⁹ Sawlawmaw ta Khazohpa o hmobaoh zydua tao ta. A taopazy cha, ngôh maisâh nata Ypâna viahchhâ sona tlâhkhaizy;

²⁰ a taonazie raopa hawhta taopa Achhyna o chhôh supathaihpa hmiakô liata pakhaih awpa ta ngôh suapa ta taopa meiôh patyuna nata a meiôhzy;

²¹ ngôh sua chaipa ta taopa pawpizy, meiôhzy nata chaikiezy;

²² ngôh suapa ta taopa meiôh poh chakienazy, rahôzy, ropahâhpa sona beihkohzy nata mei lanazy a châ. Achhyna o chhôh lâ angiana ochhizy, Su Pathaih Chaipa ochhizy nata Achhyna o chhôh liata chhôhpadâhpa lai chaipa ochhizy chhao ngôh ta a tao khai.