2 THÂTIHZYRONA 36 - Mara Bible RV (BSI)

Zudâh tlapahnaina

¹ Zudâh zawpizy ta Zôsia sawchapawpa Zehôahâ a chhi ei ta, a paw su a thla awpa ta Zerusale liata bei ta tao ei ta.

² Zehôahâ cha kô kih nata kô thôhpa a châ nota a bei pathao ta, Zerusale liata thla thôh â bei.

³ Â beina cha Izi bei ta Zerusale liata pabâh ta, Zudâh râh cha tâkâ talent za kha nata ngôh talent miakha râhpaw a pacheisa lymâ.

⁴ Izi bei ta Zehôahâ unawhpa Eliakima cha Zudâh nata Zerusale bei ta tao ta, a moh Zehôki tahpa ta a panano. A unawhpa Zehôahâ cha Nekô ta Izi râh lâ â chhi haw.

Zudâh bei Zehôki

⁵ Zehôki cha kô kih nata kô pangawhpa a châ nota a bei pathao ta, Zerusale liata kô hrawh hleikha â bei. Abeipa a Khazohpa mohmô liata hmo pha leipa tao ta.

⁶ Babylaw bei Nebukaneza ta ano a dyuh awpa ta vaw thyu ta, bâliazy ta buh ta Babylaw lâ a siekhei haw.

⁷ Nebukaneza ta Abeipa o hmobaoh thokhazy chhao la ta, Babylaw lâ phaoh ta, a yna abei o liata soh ta.

⁸ Zehôki thâtih hropazy, hmo pasichhihpa a taopazy nata a yzie pha leipazy cha, Izarei nata Zudâh Beizy Châbu liata ropa a châ. A sawchapawpa Zehôkhi ta ano su liata â bei.

Zehôkhi nata Babylaw seichâna

⁹ Zehôkhi cha kô hrawh hleichariepa a châ nota a bei ta, Zerusale liata thla thôh nata noh hrawh â bei. Abeipa mohmô liata hmo pha leipa tao ta.

¹⁰ Châhvâ daihti liata, Bei Nebukaneza ta Zerusale lâ chyhsa tuah ta, Abeipa o liata hmobaoh sôhpazy chhaota Bei Zehôkhi cha Babylaw lâ ama siekhei haw. Nebukaneza ta Zehôkhi unawhpa Zedekia cha Zudâh nata Zerusale bei ta a tao.

Zudâh bei Zedekia

¹¹ Zedekia cha kô kih nata kô khapa a châ nota a bei pathao ta, Zerusale liata kô hrawh hleikha â bei.

¹² Abeipa a Khazohpa mohmô liata hmo pha leipa tao ta. Abeipa pakah tawhta a puapa bie a reihtuhpa hrohsopa Zeremiah hmiakô liata a panawh khoh vei.

¹³ Khazohpa moh ta bie a pataihsa hapa Bei Nebukaneza chhao â chariah. A rao pachyupa ta, a palôh kuh pachhasa ta, Abeipa, Izarei Khazohpa lâ a heih khoh vei.

¹⁴ Theihthai laipazy nata zawpizy chhao ta, ngâchhihna rai hnei khao leipa ei ta, phopi hropazy hmotaopa pasichhihpazy tao hra ei ta, Abeipa ta Zerusale liata a pathaisapa Abeipa o taih chhao ama papuapalei.

¹⁵ Abeipa, ama pathlatuhpazy Khazohpa ta, ano phopi nata a pahrâna su tha a pasapa vâta, a chalihsai leipa ta, âmo lâta lyuhchâpazy khâ tuah ta.

¹⁶ Châhrasala Khazohpa lyuhchâpazy cha pasipasawh tyh ei ta, Khazohpa biezy cha khâpasaw ta reih leipa ei ta, a hrohsopazy chhao ama pahneisao tyh. Achhâna liata Abeipa pathiiana a phopi chô liata vaw tlô ta, patlâh thei awpa châ khao vei.

Zerusale paona

¹⁷ Chavâta âmo a dyuh awpa ta, Abeipa ta Kaldia bei pathyusa ta, ano ta ama satliazy ama supathaihpa o liata zaozi ta thie ta, satlia nata laihsa, machâpa nata pawpi nôpipazy chhao ngiachhiena rai hnei leipa ta thie lymâ ta. Abeipa ta Zerusale khihsawzy cha Kaldia bei ku liata a hlâ khai ha ei.

¹⁸ Khazohpa o liata hmobaoh zydua, a laipa chhao, a chyhpa chhao, Abeipa o liata sôh sopakhypa zydua, abei sôh nata a beimachâzy sôhzy taihta Babylaw râh lâ a siekhei khai haw.

¹⁹ Khazohpa o cha mei ta rao ei ta, Zerusale thokhy pacho ei ta, a chhôh liata abei o zydua mei ta rao ei ta, hmobaoh sôhpa zydua ama parao khai haw.

²⁰ Zaozi a khôkhâhpazy cha Babylaw lâ a chhi ei ta, Persia khinarâh â duana taihta Bei Nebukaneza nata a sawchapawzy chakaotuhpazy ta ama y lymâ.

²¹ Cha hmo cha râh ta Pahânohzy a hmâh thei nawpa ta, râh cha kô sysari chhôh roryhrapa ta a y awpa kyh, Zeremiah pakah ta a reipa Abeipa bie a vaw tlôpaki nawpa a châ.

Kôresâ biephuahpa

²² Persia bei Kôresâ â beina kô khana liata, Zeremiah pakah tawhta a puapa Abeipa bie a vaw tlôpaki thei nawpa ta, Abeipa ta Persia bei Kôresâ palôh pathyu ta. Chatanachata a khinarâh zydua liata biephuahpa tao ta, hetana heta ropa ta a papua:

²³ “Persia bei Kôresâ ta hetana heta a tah, ‘Abeipa, avâ Khazohpa ta khizaw khinarâh zydua na pie ha ta, Zudâh râh Zerusale khihpi liata ano châta o sapa awpa ta bi eina pie. Nama hry liata ano phopi a châpa maih chô liata Abeipa a Khazohpa cha a hnohta y sala, Zerusale lâ cha khy mawh sy,’” tah ta.