2 THÂTIHZYRONA 35 - Mara Bible RV (BSI)

Zôsia ta Zawpakhô kyhchhi a chay

¹ Zôsia ta Abeipa châta Zerusale liata Zawpakhô kyhchhi tao ta. Thla khana, no hrawh hleipalihna noh ta Zawpakhô mietakutaw thie ei ta.

² Theihthaipazy ama raihria awpa chyu rao ta, Abeipa o liata chakaona rai hria awpa ta âmo cha pasyu ta.

³ Izarei saw zydua pachutuhpa nata Abeipa châta pathaihpa Livai pathlazy hnohta, “Izarei bei Dâvi sawchapawpa Sawlawmaw sapa o liata Byh pathaihpa cha soh teh u. Nama ngiatlâh ta a sy awpa byuh khao aw vei. Tahmâ he Abeipa nama Khazohpa nata a phopi Izarei sawzy cha chakao teh u.

⁴ Izarei bei Dâvi ropa hawhta nata a sawchapawpa Sawlawmaw ropa hawhta, a chhôh chhôh ta py a pachhaih aw ei chi ta, namâ chhuanoh aw.

⁵ Vâtlâh chyhsa nama unawhzy cha a chhôh chhôh ta pachhaihpa ta, Su Pathaihpa liata paduasa aw ei chi ta, Livai pathlazy chhao a chhôh chhôh ta a pachhaih aw ei chi ta, âmo cha nama chhihtha aw.

⁶ Zawpakhô mietakutaw cha thie aw ei chi ta, a pathai aw ei chi ta, Mawsi ku ta piepa Abeipa bie hawhta tao awpa ta, nama unawhzy châta namâ chhuanoh aw,” tah ta.

⁷ Cha liata a ypa vâtlâh chyhsa zydua châta Zawpakhô atheihna hlâ nawpa ta, Zôsia ta mietaku zaw tawhta mietakutaw nata mietaw 30,000 nata viahchao tôhpa 3,000 thyu ta. Chazy cha abei ta a sahrohzy tawhta a thyupa a châ.

⁸ A beimachâzy chhao ta zawpizy, theihthaipazy nata Livai pathlazy châta âmo lôhthai ta thyu hra ei ta. Khazohpa o hyutuh laipa Hikia, Zekaria nata Zehie zy ta Zawpakhô atheihna hlâna châta, theihthaipazy hnohta Zawpakhô mietakutaw 2,600 nata viahchao tôhpa 300 pie ei ta.

⁹ Kônaniah nata a unawhpa Semiah nata Nethane nata Livai pathlazy hyutuhpa Hâsabiah, Zeili nata Zôzabâ zy chhao ta, Zawpakhô atheihna hlâna châta Livai pathlazy hnohta mietakutaw nata mietaw 5,000 nata viahchao tôhpa 500 ama pie hra.

¹⁰ Chakaona a chhuanoh khaipa a châ nahta, abei biepiepa hawhta, theihthaipazy cha amâ dua nawpa su chyu liata a duah ei ta, Livai pathlazy chhao ama py chyu liata a duah ei ta.

¹¹ Zawpakhô mietakutaw cha thie ei ta, Livai pathlazy ta a vo ama hlai hai nota, âmo tawhta thisaih ama daopa cha theihthaipazy ta thia ei ta.

¹² Mawsi Châbu liata ropa hawhta, vâtlâh châta Abeipa lâ hlâ awpa ta, a chhôh chhôh ta amâ pachhaihnazie hawhta raopa hlânazy ama rairuah. Viahchao tôhpazy chhao, cha hawna chata ama rairuah hra.

¹³ Zawpakhô mietakutaw cha ryhpa hawhta mei liata pakâh ei ta, hmohlâpa pathaihpa sazy cha, beihzy, beih nali chhaopazy nata ukâzy ta chhoh ei ta, vâtlâhzy lâ thlai ama vawkhei.

¹⁴ Cha khai tawhta Livai pathlazy ta âmo nata theihthaipazy châta a chhuanoh ei ta. Arawna pathla theihthaipazy cha, raopa hlâna nata sa thawzy hlâpa ta, zâ taihta tymâpa ta ama ypa vâta, Livai pathlazy ta âmo nata Arawna pathla theihthaipazy châta amâ chhuanohpa a châ.

¹⁵ Dâvi biepiepa hawhta, Asâpha pathla hlasathaipazy cha ama châta su raopa liata y ei ta, Asâpha, Hemâ nata abei hrohsopa Zeduthu zy chhao ama châta su raopa liata y hra ei ta, chhikao vaituhpazy chhao ama chhikao chyu liata y ei ta. Ama unawh Livai pathlazy ta ama châta amâ chhuanoh hapa vâta, ama chakaona raihria siesai awpa byuh vei.

¹⁶ Chatanachata Bei Zôsia biepiepa hawhta, Zawpakhô chay awpa nata Abeipa maisâh liata raopa hlânazy hlâ awpa ta, Abeipa chakaona hmo zydua cha, cha noh ta a chhuanoh ei ta.

¹⁷ Cha liata Izarei saw a ypazy ta, cha daihti liata Zawpakhô cha chay ei ta, viahchhâ thinô pahlao leipa kyhchhi chhao noh sari hmâh ei ta.

¹⁸ Hrohsopa Samuela daihti tawhna khata, cha hawhpa Zawpakhô kyhchhi cha Izarei râh liata hmâpa châ beih vei. Izarei bei ahy hmahta Bei Zôsia, theihthaipazy, Livai sahlao, cha liata a ypa Zudâh nata Izarei zydua nata Zerusale khihsawzy ta ama hmâpa Zawpakhô kyhchhi hawhpa cha hmâh beih hra veih ei.

¹⁹ Zôsia abeina kô hrawh hleichariena kô lia deita ta Zawpakhô Kyhchhi cha ama chay heih theipa a châ.

Zôsia thina

²⁰ Cha zydua hnôhlâ ta, Zôsia cha Achhyna o a phapa ta a tao khai nahta, Izi bei Nekô ta hrâ kaw sie ta, Ufrâti chavah liata Kâkhemi khihpi kaw tlô ta. Zôsia ta Nekô cha a kei duakhâh ta.

²¹ Nekô ta Zôsia lâ lyuhchâpazy tuah ta, a hnohta, “Hy Zudâh bei y, nâma nata keima likah liata khâpa a tah thai leina ma eima hnei? Tanoh he nâma a dyuh awpa ta a khy va na. Ei dyuh haipa phopi a dyuh awpa ta a khypa ei châ. Khazohpa ta a para awpa ta bie na pie ta, chavâta ei chhâh a châpa Khazohpa cha a dyuh khah y, chataleipatala a cha pahleipadia pathlei aw,” tah ta.

²² Châhrasala Zôsia ta kuasai khoh leipa ta, Nekô cha a dyuh awpa ta â lânazie a panano ta. Khazohpa pakah tawhta Nekô bie reipa cha nathlie khoh leipa ta, a dyuh awpa ta Mekidô bypi lâ sie ta.

²³ Likathaipazy ta Bei Zôsia cha ka ei ta. Abei ta a chakaotuhpazy hnohta, “Na siekhei teh u, hmah thata ei phaoh,” tah ta.

²⁴ A chakaotuhpazy ta talailih tawhta la ei ta, ano talailih hropa liata soh ei ta, Zerusale lâ siekhei ei ta. Bei Zôsia cha thi ta, a pathlatuhpazy thlâsu liata pabu ei ta. Zudâh nata Zerusale mo zydua ta Zôsia mâchhie sa ei ta.

²⁵ Zeremiah chhao ta Zôsia chaphôhtuna hla sa ta, hlasathaipa chanô nata chapaw zydua ta, Zôsia pasai leina chaphôhtuna hlabiezy tanoh taihta ama reih ngâ thlâh ha chy. Zôsia pasai leina chaphôhtuna hla sapa cha, Izarei râh liata tao tyh awpa ryhpa ta a pyh ei ta, chaphôhtuna hlazy liata pahlaopa a châ.

²⁶ Zôsia hmotaopa hropa zydua, Abeipa Ryhpa liata ropa hawhta a hmo pha taopazy nata

²⁷ a hmotaopazy cha, hmiatua chaipa nata hnôh chaipa chhao, Izarei nata Zudâh Beizy Châbu liata ropa a châ.