2 THÂTIHZYRONA 34 - Mara Bible RV (BSI)

Zudâh bei Zôsia

¹ Zôsia cha kô chariepa a châ nota a bei pathao ta, Zerusale liata kô sythôh nata kô kha â bei.

² A pathlatuhpa Dâvi lâpizy a chhihpa ta, Abeipa mohmô liata hmo dopa tao tyh ta, chachâh lâ tlyma, chavei lâ tlyma tlei beih vei.

Zôsia ta taopathina rai a hriapazy

³ Zôsia cha â beina kô chariena liata, hawtipa a châ thlâh ha chy nota, a pathlatuhpa Dâvi Khazohpa cha tlua pathao ta. Kô hrawh hleino â bei kô ta, Zudâh râh nata Zerusale khihpi liata su sâhpazy, Aseri tôhzy, khazoh nothlahpa khiepa nata leihpazy a parao khai haw.

⁴ Bâlâ maisâhzy a mohmô liata chhawh pachhô ei ta, chazy hlâta a sâh viapa ta taopa ropahâhpa raona maisâhzy chhao a chhawh pathlah khai haw. Aseri tôhzy, khazoh nothlahpa khiepa nata leihpazy phy pazao khai ta, âmo lâta atheihna a hlâtuhpazy thlâ chô liata a paohpa a hiezâh.

⁵ Ama theihthaipazy ru ama maisâhzy liata rao ta, Zudâh râh nata Zerusale khihpi a pathai.

⁶ Cha hawhna chata Manase, Epharai, Simeôna nata Nâthalai khihpizy liata chhao a tao khai.

⁷ Maisâhzy parao ta, Aseri tôhzy nata khazoh nothlahpazy cha a paoh ta phy pazao ta, chazy hlâta â sâh viapa ta taopa, Izarei râh zydua liata ropahâhpa raona maisâhzy a chhawh pathlah khai haw. Cha khai tawhta Zerusale lâ a lie ta.

Ryhpa Châbu hmôpa a châ

⁸ Râh nata Abeipa o a pathai khai nahta, â beina kô hrawh hleichariena kô liata, Zôsia ta Azaliah sawchapawpa Sâphanâ nata khihpi avaotuhpa Mâsei nata Zôahâ sawchapawpa chârohtuhpa Zôah zy cha, Abeipa a Khazohpa o pasiepakao awpa ta tuah ta.

⁹ Theihthai beichaipa Hikia lâ vawh ei ta, chyhsazy ta Khazohpa o lâ ama vaw cheipa sôhzy kei pie ei ta. Cha sôh cha ochhi vaituhpa Livai pathlazy ta Manase mo, Epharai mo, Izarei laibâhpazy, Zudâh mo nata Benzami mo nata Zerusale khihsawzy tawhta ama lapakhypa a châ.

¹⁰ Cha sôh cha Abeipa o raihria mohôhtuhpazy hnohta pie ei ta. Abeipa o raihria mohôhtuhpazy ta o pasiepakaona nata taopathina rai hria nawpa ta, sôh cha ama pie pachhuah tyh.

¹¹ Zudâh beizy ta o rypa ta ama paysa hapa Abeipa o taopathi nawpa ta, alô khaipazy nata a pazaona nata pâkôzy châta thozy chalei nawpa ta, sôh cha zôthaipazy nata o satuhpazy ama pie.

¹² Chyhsazy ta rai cha ngâchhih ngaitapa ta hria ei ta. Âmo mohôhtuhpazy châta Merâri pathla Livai chyhsa Zahâ nata Ôbadia nata Kôhâ pathla Zekaria nata Mesulâ zy raopa ama châ. Livai pathla hropa, pyungiapa tôthaipazy chhao,

¹³ hmo phaohtuhpazy nata raihria nanopazy liata hriatuhpa zydua mohôhtuhpa châta raopa ama châ. Livai pathla thokha cha chârohtuhpazy nata beimachâzy nata chhikao vaituhpazy ama châ.

¹⁴ Chyhsazy ta Abeipa o lâ ama vaw cheipa sôhzy ama vaw puakhei hai nota, theihthaipa Hikia ta Mawsi ku liata piepa Abeipa Ryhpa Châbu hmô ta.

¹⁵ Hikia ta chârohtuhpa Sâphâ hnohta, “Ryhpa Châbu kha Abeipa o liata ei hmô haw,” tah ta. Hikia ta châbu cha Sâphâ pie ta.

¹⁶ Sâphâ ta châbu cha abei lâ vawkhei ta, abei hnohta, “Tao awpa ta raopa zydua cha, châ chakaotuhpazy ta ama tao lymâ.

¹⁷ Abeipa o liata sôh zydua thaoh khai ha ei ta, mohôhtuhpazy nata raihriatuhpazy hnohta ama pie haw,” tah ta.

¹⁸ Chârohtuhpa Sâphâ ta abei hnohta, “Theihthaipa Hikia ta châbu eina pie,” tah ta. Chatanachata Sâphâ ta châbu cha abei hmiakô liata reih ta.

¹⁹ Ryhpa biezy a thei nahta, abei cha a chysiazy hrie ta.

²⁰ Abei ta Hikia, Sâphâ sawchapawpa Ahikâ, Mikâ sawchapawpa Abadaw, chârohtuhpa Sâphâ nata bei chakaotuhpa Asiah zy biepie ta, ama hnohta,

²¹ “Vawh u la, châbu ama hmôpa liata â rohpa biezy kyh liata, kei nata Izarei nata Zudâh râh liata laibâhpazy châta Abeipa a kei saohiah teh u. Miah pathlatuhpazy khata he ryhpa châbu liata ropa hawhna heta Abeipa bie ama vaw zyh leipa vâta, Abeipa pathiiana ru ngaitapa eima chô liata lei thlupa a châ ha hih,” tah ta.

Huldâ ta chhiena a vaw tlô awpa a phuah

²² Chatanachata Hikia nata abei tuapazy cha hrohsonô Huldâ lâ vawh ei ta, abei bie reipa kyh a kei saohiah ei ta. Hrohsonô Huldâ cha Sâluh lapinô châ ta, Sâluh cha Tôkhâ sawchapawpa châ ta, Tôkhâ cha chysiazy vaituhpa Hâsrâh sawchapawpa a châ. Hrohsonô Huldâ cha Zerusale vaih nona liata a pahrâpa a châ.

²³ Huldâ ta ama hnohta, “Abeipa, Izarei Khazohpa ta hetana heta a tah: ‘Kei lâta châ vaw tuahtuhpa chyhsa hnohna chata,

²⁴ Abeipa ta hetana heta a tah, pachâ teh, he su nata a chhôh liata a pahrâpazy chô liata chhiena patlôsa aw na ta, Zudâh bei hmiakô liata ama rei papuapa, châbu liata ropa chhiesana zydua ama chô liata ei patlôsa aw.

²⁵ Na siesai ei ta, khazoh hropazy lâta atheihnazy hlâ ei ta, ama ku ta ama taopa zydua ta ei hie eina pahâh ei. Chavâta he su chô liata ei pathiiana mei lei thlu aw na ta, pachhaipa châ aw vei.

²⁶ Abeipa a saohiah awpa ta châ vaw tuahtuhpa Zudâh bei hnohta deikua cha, hetana heta chho teh u, Abeipa, Izarei Khazohpa ta hetana heta a tah: Na bie theipazy kyh liata,

²⁷ he su nata a chhôh liata a pahrâpazy kyh liata Abeipa biezy na thei nahta, na palôh panaipa ta, Khazohpa hmiakô liata a panawh chi ta. Ei hmiakô liata a panawhpa ta, na chysiazy hrie chi ta, ei hmiakô liata na chapa vâta, kei chhao ta ei cha thei haw, Abeipa ta a tah.

²⁸ Pachâ teh, châ pathlatuhpazy hnohta cha pahlyh aw na ta, thlalôhpa ta thlâkhaoh a ngia aw chi ta, he su nata a chhôh liata a pahrâpazy chô liata chhiena ei patlôsa awpa cha, na mo ta hmô aw vei,’ tahpa ta nama chho aw,” tah ta. Cha biezy cha abei lâ tlôkhei ei ta.

²⁹ Abei ta chyhsazy tuah ta, Zudâh râh nata Zerusale khihpi liata machâ zydua awpakhy ta.

³⁰ Abei nata Zudâh râhsaw zydua, Zerusale khihsaw zydua, theihthaipazy nata Livai pathlazy, chyhsa zydua a lai a chyh ta Abeipa o lâ khy ei ta. Abeipa o liata ama hmôpa Biehrai Châbu liata bie zydua cha ama nah theina liata reih ta.

³¹ Abei cha ano su liata a duah ta, Abeipa hmiakô liata biehrai tao ta. Abeipa hnôh pazipa ta, a biepiepazy, a biepahnokheipazy nata a bieraopazy cha a pathipalôh tlokhuh ta nata a thlahpa tlokhuh ta zyh ta, cha châbu liata â rohpa biehrai biezy hawhta tao lymâ awpa ta biehrai tao ta.

³² Cha nota Zerusale liata a ypazy nata Benzami mo zydua chhao, cha hawhna chata biehrai pataosa khai ta. Zerusale khihsawzy ta Khazohpa, ama pathlatuhpazy Khazohpa biehrai bie hawhta tao ei ta.

³³ Chatanachata Zôsia ta hmo pasichhihpa zydua Izarei râh zydua tawhta pahlei khai ta, Izarei râh liata a pahrâpa zydua Abeipa ama Khazohpa a chakaosa khai ha ei. Zôsia hro chhôh zydua Izarei sawzy ta Abeipa, ama pathlatuhpazy Khazohpa hnôh ama pazipa tleisai veih ei.