2 THÂTIHZYRONA 33 - Mara Bible RV (BSI)

Zudâh bei Manase

¹ Manase cha kô hrawh hleinopa a châ nota a bei pathao ta, Zerusale liata kô sypangawh nata kô pangawh â bei.

² Abeipa ta Izarei phopi hmiakô tawhta a papua hapa phopizy hmotaopa pasichhihpazy taopa ta, Abeipa mohmô liata hmo pha leipa tao ta.

³ A paw Hezekia ta a parao hapa su sâhpazy paduapathi ta, Bâlâ khazohzy châta maisâhzy tao ta, Aseri khazoh nothlahpazy tao ta, avâ liata a ypa zydua a chhy ta, a chakao ei.

⁴ Abeipa ta, “Zerusale liata chhâzaw ta ei moh a y aw,” a tahna Abeipa o liata khazoh hropa maisâhzy padua ta.

⁵ Abeipa o dôhpachhôh tlyhmia miano liata avâ liata a ypa zydua châta maisâhzy a padua.

⁶ A sawchapawzy cha raopa hlâna atheihna ta Hinô Sawchapawpa Saikao liata hlâ ta, kulâmopa, pachaopa nata molietaopa zy hmâh ta, peihthaipa nata athihpa bie a chho thaipazy â saohiah tyh. Cha hawhna chata Abeipa mohmô liata hmo molei ngaitapa taopa ta, Abeipa hie pahâh ha ta.

⁷ Khazohpa ta Dâvi nata a sawchapawpa Sawlawmaw hnohta, “He o nata Zerusale khihpi, Izarei chi zydua tawhta ei tlyhpa liana heta ei moh chhâzaw ta ei paysa aw,” a tahna Achhyna o liata ano taopa khazoh nothlahpa soh ta.

⁸ Khazohpa ta, “Bie ei piepa zydua, ryhpa zydua, bieraopazy nata Mawsi hmâpa ta tao awpa bie ei piepazy ama zyh khiahta cha, ama pathlatuhpazy ei piepa râh tawhna heta Izarei phei pasie khao aw va na,” a vaw tah hana Khazohpa o liata ano taopa khazoh nothlahpa soh ta.

⁹ Cha hawhna chata Manase ta Zudâh râhsawzy nata Zerusale khihsawzy cha lâpi paviasa ta, Abeipa ta Izarei hmiakô liata a pahleipadia hapa phopizy hlâ chhao ta hmo thata ama parao via.

Manase molei rona

¹⁰ Abeipa ta Manase nata a chyhsazy hnohta bie reih ta, châhrasala nathlie leipa ei ta.

¹¹ Chavâta Abeipa ta Asuria pheisaih hyutuhpazy vaw tuah ta, Manase cha patu ei ta, a hnari daohpa ta dawh bâlia ta buh ei ta, Babylaw lâ ama siekhei haw.

¹² Nôpo ngaitapa ta a y nahta, Abeipa a Khazohpa ngiachhiena a haw ta, a pathlatuhpazy Kha­zohpa hmiakô liata a panawh ta.

¹³ Khazohpa lâ thlahchhâ ta, a hiana cha Khazohpa ta thei ta, ngiachhie ta, a khinarâh Zerusale khihpi lâ â chhi pakhua heih. Chatanachata Manase ta Abeipa cha Khazohpa a châ tahpa a pahno haw.

¹⁴ Cha hnôhlâ ta Dâvi khihpi notla daih lâta saikao liata thokhy cha khôtho lâ tawhta thokhy hropa ta patho thlu ta, Nga Chhikao angiana liata chhao khôtho lâ tawhta thokhy patho hra ta, Ôphe taihta padôpa ta â sâh ngaitapa ta sa ta. Thokhy a hneipa Zudâh khihpi zydua liata pheisaih hyutuhpazy soh ta.

¹⁵ Chihropa khazohzy nata khazoh nothlahpazy Abeipa o tawhta la papua khai ta, Abeipa o tlâh liata nata Zerusale liata maisâh a taopa zydua chhao khihpi khôtho lâ a thy khai haw.

¹⁶ Abeipa maisâh paduapathi ta, aryhna hlâna atheihnazy nata alyna bie reinazy hlâ ta, Zudâh cha Abeipa Izarei Khazohpa chakao awpa ta biepie ta.

¹⁷ Chatanachôta chyhsazy ta su sâhpazy liata atheihna hlâ thlâh ha chy ei ta, châhrasala Abeipa ama Khazohpa lâta ama hlâ tyh.

¹⁸ Manase thâtih hropazy nata a Khazohpa lâta thlah a chhâna kyh nata Abeipa, Izarei Khazohpa moh ta hrohsopazy ta a hnohta bie ama reipa kyhzy cha, Izarei Beizy Thâtih Rona Châbu liata ropa a châ.

¹⁹ A thlahchhâna, Khazohpa ta a hiana a ngia­chhiena, â panawh hlâta a moleina nata a ngâchhih leina zydua, su sâhpa a taona suzy nata Aseri tôh nata khazoh nothlahpazy a paduana thâtihzy cha, Hrohsopazy Thâtih rona châbu liata ropa a châ.

²⁰ Manase cha a pathlatuhpazy hnohta a mô ta, ano o liata pabu ei ta, a sawchapawpa Amawna ta ano su liata â bei.

Zudâh bei Amawna

²¹ Amawna cha kô kih nata kô nopa a châ nota a bei pathao ta, Zerusale liata kô no â bei.

²² A paw Manase hawhta Abeipa mohmô liata hmo pha leipa tao ta. A paw Manase taopa khazoh nothlahpa zydua lâta atheihnazy hlâpa ta, khazoh nothlahpazy cha chakao ta.

²³ Amawna cha a paw Manase a panawhpa hawhna khata Abeipa hmiakô liata a panawh khoh vei. Chavâta thaileichâna ano liata â baichha via lymâ.

²⁴ A chakaotuhpazy ta arulâta tei ei ta, ano o liata ama thie haw.

²⁵ Châhrasala râh zawpizy ta Bei Amawna a teituhpa zydua cha thie ei ta, a sawcha­pawpa Zôsia cha ano su liata bei ta ama tao haw.