2 THÂTIHZYRONA 32 - Mara Bible RV (BSI)

Senâkeri ta Zudâh a siehnao

¹ Cha hawhta ngâchhih ngaitapa ta ama tao khai tawhta, Asuria bei Senâkeri ta Zudâh vaw siehnao ta. Zudâh cha ano biehneina ry liata so a chhuahpa ta, thokhy khihpizy dôhpa ta riehmozy paryh laih ta.

² Zerusale a dyuh a chhuahpa ta Senâkeri a vaw siepa Hezekia ta a hmô nahta,

³ a beimachâzy nata a pasaiphazy a saohiah ta, khihpi khôtho lâta tihnawhzy chhie khai awpa ta ryhrao ta. Beimachâzy nata pasaiphazy ta Hezekia cha bao ei ta.

⁴ Zawpi hluhpi pôhpakhy ei ta, râh chhôh liata tihnawh nata chavah zydua chhie khai ei ta, “Khazia Asuria beizy a vy aw ei ta, ti hluhpi ama hmô aw,” tah ei ta.

⁵ Hezekia cha a tha a patlô ta. Thokhy a cho hapa zydua taopathi ta, thokhy chô liata o sâhpazy padua ta. Khôtho lâ tawhta thokhy hropa ta patho thlu ta. Dâvi khihpi thokhy chhao pasiepakaopa ta pa-i ta. Chaihraizy nata vyhphaozy hluhpi tao ta.

⁶ Adyuhna châta pheisaih hyutuhpazy rao ta, âmo cha khihpi chhikao tlyliah liata pahmaoh ta, ama hnohta,

⁷ “Thatlôpa nata riahphapa ta y u la, Asuria bei nata a pheisaih hri hluhpizy chi leipa u la, a ngiaroh hra khuh vy. Âmo chhâh a châpa hlâta keimo chhâh miah a châpa ama hluh via.

⁸ Ano chhâh a châpa cha sapa pheisaih châ ei ta, keimo chhâh a châpa cha Abeipa eima Khazohpa a châ. Ano ta miah bao aw ta, eima chariah miah â dyuhpa aw,” tahpa ta thapatlôna bie reih ta.

Senâkeri ta Khazohpa moh a reipachhie

⁹ Cha hnôhlâ ta, a pheisaih zydua chhaota Lakhi khihpi a dôh haipa Asuria bei Senâkeri ta a pheisaihzy cha Zerusale liata Zudâh bei Hezekia nata Zudâh râhsaw zydua lâ tuah ta, ama hnohta,

¹⁰ “Asuria bei Senâkeri ta hetana heta a tah, ‘Zerusale khihpi cha dôh khai hapa châ ta, pasa nama tao ngâ kawpa cha, khâpa ma namâ ngâchhâ tly?’

¹¹ Hezekia ta, ‘Abeipa eima Khazohpa ta Asuria bei ku tawhta miah a pachha aw,’ tahpa ta a cha chhopa ei kha, nodipa nata dâhphipa ta thi awpa ta a châ chhi chheipa ei tlao a châ.

¹² Kha Hezekia kha vei ma, khazoh su sâhpazy nata maisâhzy parao khaipa ta, Zudâh râhsaw nata Zerusale khihsawzy hnohta, ‘Maisâh miakha lia dei ta Khazohpa a chhy aw ei chi ta, cha maisâh chô lia dei ta atheihnazy nama hlâ aw,’ tahpa ta bie a pietuhpa kha a châ vei?

¹³ Kei nata nâ pathlatuhpazy ta râh hropazy nata phopi zydua chô liata hmo eima taopazy kha pahno veih ei chi ma? Cha râhzy khazohzy chata ei ku tawhta ama râhzy ama pachha thei ma?

¹⁴ Nâ pathlatuhpazy ta parao awpa ta ama rao hapa râhzy cha, ahy râh khazoh ta hmah ei ku tawhta a pachha theipa y veih ei. Nâmo Khazoh bao hra chata ma, ei ku tawhta zua châ pachha aw ei?

¹⁵ Chavâta Hezekia a padôveisa leipa u la, cha hawhta a châ chhi chhei awpa ei namâ pasaih awpa châ vei. Hezekia kha zo khuh vy. Kheihawhpa phopi nata khinarâh khazoh hmahta keima ku tawhta tlyma, nâ pathlatuhpazy ku tawhta tlyma, a phopi a pachha theipa y beih veih ei. Nâmo Khazohpa ma ei ku tawhta zua châ pachha aw ei?” tah ta.

¹⁶ Senâkeri pheisaihzy ta Zehôvâh Khazohpa nata a chakaotuhpa Hezekia cha, cha hlâta tha viapa ta reipachhie rili ei ta.

¹⁷ Senâkeri ta Abeipa, Izarei Khazohpa pasipasawhna nata reipachhiena châ roh ta, “Khizaw phopizy khazohzy ta ei ku tawhta ama phopizy ama pachha thei tlâ leipa hawhta, Hezekia Khazohpa chhao ta, ei ku tawhta a phopi pachha thei aw vei,” tah ta.

¹⁸ Khihpi ama la thei nawpa ta, thokhy chô liata a ypa Zerusale khihsawzy cha, Asuria pheisaihzy ta Zudâh reih ta ao paro ngaitapa ta awsao ei ta, pachhiparypa ta pachisa ei ta.

¹⁹ Zerusale Khazohpa cha, khizaw phopizy khazohzy hawhta, ku ta taopa khazoh a châ hrazie reih ei ta.

Abeipa ta Zerusale a pachha

²⁰ Cha hawhpa bie ama reipa vâna chata, Bei Hezekia nata Amôza sawchapawpa hrohsopa Isai cha thlahchhâpa ta avâ lâ awh ei ta.

²¹ Abeipa ta vâlyuhchâpa za tuah ta, ano chata Asuria bei riehmo liata pasaiphazy, pheisaih hyutuhpazy nata chhituhpa zydua a thie khai ha ei. Chatanachata Senâkeri cha noza hmiachhiepa ta a râh lâ â lie haw. Noh kha cha a khazoh o lâ a vaw nota, ano sawchapawzy ta zaozi ta ama chhawhsao haw.

²² Cha hawhna chata Abeipa ta Hezekia nata Zerusale khihsawzy cha, Asuria bei Senâkeri ku tawhta nata a chariah zydua ku tawhta pachha ta, amâ ngiahpazy kao to tawhta a tlôkheipa lymâ ei.

²³ Chyhsa hluhpi ta Abeipa châta Zerusale lâ hmopiepazy vaw cheih ei ta, Zudâh bei Hezekia châta hmo sôhpazy vaw cheih hra ei ta, cha daihti tawhta cha, phopi zydua mohmô liata cheihchalopa ta a y haw.

Hezekia apalaina nata raona

²⁴ Cha daihtizy liata, Hezekia cha thi daihmâpa ta pasa ta. Abeipa lâ thlahchhâ ta, Abeipa ta a chhy ta, ngiana pie ta.

²⁵ Châhrasala Hezekia cha palôh laipa ta y ta, ano châta hmo phapa taopa cha phana ta pie palie leipa ta. Chavâta ano nata Zudâh nata Zerusale chô liata pathiiana vaw tlô ta.

²⁶ Châhrasala Hezekia nata Zerusale khihsawzy ta ama palôh liata amâ palaina cha a ngiapachhipa ta amâ panawh heihpa vâta, Hezekia hro chhôh ta cha Abeipa pathiiana ama chô liata vaw tlô khao vei.

²⁷ Hezekia cha thata vaw hneirôh ta, thata palyupalihpa ta y ta. Tâkâzy, ngôhzy, lôsôhpazy, ia-ôzy, vyhphaozy nata hmobaoh mâ ru ngaitapa sona ozy sa ta.

²⁸ Sâh nata kresawhti nata sathaw sopakhyna ozy sa ta, sahroh to so nawpa sahroh ozy nata mietaku sadôzy tao ta.

²⁹ Khazohpa ta hneirôh ngaitapa ta tao ta, khihpizy ano châta padua ta, mietaku zaw nata viahchao hri hluhpi a hnei.

³⁰ Kihaw chavah hnawh toh ta, Dâvi khihpi notla lâchhâh ta a palosa. Chatanachata Hezekia cha a hmotaopa zydua liata thlaochhipa ta y lymâ ta.

³¹ Babylaw beimachâzy ta lyuhchâpazy za tuah ei ta, râh liata ngiana hmo ama taopazy ama za patluahna kyh liata, Khazohpa ta Hezekia cha pasia ta, a palôh liata a ypa zydua pahno awpa ta ano y ta a paysa hapa kha a châ.

³² Hezekia hmotaopa hropa zydua nata a hmo pha taopa zydua cha, Amôza sawchapawpa hrohsopa Isai aluahna rona Zudâh nata Izarei Beizy Châbu liata ropa a châ.

³³ Hezekia cha a pathlatuhpazy hnohta a mô ta, Dâvi sawchapawzy thlâsu machhua lâta ama pabu. Zudâh râhsaw zydua nata Zerusale khihsaw zydua ta a thi noh ta rônah ngaitapa ta ama palyupalih. A sawchapawpa Manase ta ano su liata â bei.