2 THÂTIHZYRONA 31 - Mara Bible RV (BSI)

Theihthaipazy py pachhaihzie

¹ Cha zydua cha ama tao khai nahta, cha liata a ypa Izarei saw zydua ta Zudâh khihpizy lâ sie ei ta, lôbôzy nata Aseri tôhzy pakeichheih khai ei ta. Zudâh, Benzami, Epharai nata Manase râhzy liata su sâhpa zydua nata maisâh zydua pacho khai ei ta. Cha khai tawhta, Izarei saw zydua cha ama khihpi nata ama olyu chyu lâta a di ha ei ta.

² Hezekia ta theihthaipazy nata Livai pathlazy cha Abeipa o liata raopa hlâna nata aryhna hlâna chakaona rai hria awpa ta zy, chhikao vaih awpa ta zy, alyna bie rei awpa nata reithaina hla sa awpa zy ta a py py ta pachhaih ta, ama chakao awpazy rairuah ta.

³ Abeipa ryhpa liata ropa hawhta, my nata zâ ta raopa hlânazy châta nata Pahânoh nata thla thiehpa nata kyhchhi raopazy liata raopa hlânazy châta abei ta ano sahrohzy thyu lymâ ta.

⁴ Theihthaipazy nata Livai pathlazy ta Abeipa ryhpa hawhta chakaona rai ama hria thei nawpa ta, theihthaipazy nata Livai pathlazy tovyuh awpa raopazy cha ama hnohta pie lymâ awpa ta, Zerusale liata a pahrâpazy biepie ta.

⁵ Biepiepa a pathâhpa nahta, Izarei sawzy ta ama lyu liata a veih tuachaipa sâh, kresawhti, sathaw nata kheihti zy thata vaw thyu ei ta. Ama hneipa to tawhta su hrawh su kha chhao thata vaw thyu ei ta.

⁶ Zudâh khihpizy liata a pahrâpa Izarei sawzy chhao ta, viahchao nata mietaku zy tawhta su hrawh su kha vaw thyu ei ta, Abeipa ama Khazohpa châta hmohlâpa pathaihpa ama pananopazy tawhta su hrawh su kha thyu hra ei ta, a hluhpi ama pahmaohpakhy.

⁷ Thla thôhna tawhta pachô pathao ei ta, thla sarina liata ama patlô.

⁸ Hezekia nata beimachâzy a vy ei ta, thyuna â pachopazy ama hmô nahta, Abeipa nata a phopi Izarei cha reithai ei ta.

⁹ Hezekia ta thyuna â pachopazy kyh cha theihthaipazy nata Livai pathlazy hiahri ta.

¹⁰ Zadô pathla, theihthai beipa Azariah ta a chhy ta, “Zawpizy ta thyunazy Abeipa o lâ ama vaw chei tua noh tawhta nie awpa hnei lymâ pi ta, ativy kawpa ta y pi ta, laibâhpa chhao a hluhpi a y. Abeipa ta a phopi byhnâ pie ta, chavâta nie laibâhpa hluhpi eima hnei,” tah ta.

¹¹ Hezekia ta Abeipa o liata chhôhpadâhpazy tao awpa ta biepie ta, cha hawhna chata tao ei ta.

¹² Thyunazy, su hrawh su khazy nata hmohlâpa pathaihpazy ngâchhih ngaitapa ta vaw pangia lymâ ei ta. Cha thyunazy mohôhtuhpa hyutuhpa cha Livai pathla Kônaniah châ ta, a unawhpa Simei cha a pazipa a châ.

¹³ Bei Hezekia nata Khazohpa o liata hyutuhpa Azariah ta Kônaniah nata a unawhpa Simei chhihthana ry liata mokheituhpazy rao ei ta. Chazy cha Zehie, Azaziah, Nâhâ, Asahe, Zerimô, Zôzabâ, Elie, Ismâkiah, Mâhâ nata Benai zy ama châ.

¹⁴ Nochhi chhikao vaituhpa, Livai pathla Imnâ sawchapawpa Kôre cha, Khazohpa lâta lôhthai hmohlâpazy mohôhtuhpa châ ta, Abeipa châta panano eihpazy nata hmohlâpa pathaih chaipazy a pahruatuhpa a châ.

¹⁵ Ano chhihthana ry liata Ede, Miniami, Zesua, Semiah, Amaria nata Sekaniah zy ta ngâchhih ngaitapa ta theihthaipazy khihpizy liata chakaona rai hria ei ta, ama unawhzy cha, uhthei viapa nata hawti viapazy â lyupa ta, a py py ta ama tovyuh ama rai lymâ.

¹⁶ Chazy thota, thyutôna alaichadaina liata moh ropa chapaw kô thôh tawhta chô lâ, a py py ta raipa chakaona raizy hria awpa ta Abeipa o chhôh lâ noh chareih ta a ngia tyhpazy chhao ama tovyuh raipa a châ hra.

¹⁷ Theihthaipazy cha a chhôh chhôh ta ama mohzy ropa châ ei ta, Livai pathlazy cha chakaona rai ama hria awpa lymâ hawhta, kô kih tawhta chô lâ zydua a py py ta ama moh ropa a châ.

¹⁸ Apathaina kyh liata ngâchhihpa ama châpa vâta, ama saw zydua, ama lapinô zydua, ama sawchapaw zydua, ama sawchanô zydua nata ama heinawh zydua chhaota thyutôna châbu liata pahlaopa ama châ.

¹⁹ Livai khihpizy lyu liata a pahrâpa Arawna pathla theihthaipa chapawzy nata Livai pathla moh ropazy hnohta ama tovyuhzy rai awpa ta, khihpizy liata chyhsa rao eihpazy sopa ama châ.

²⁰ Cha hawhna chata Hezekia ta Zudâh râh zydua liata tao ta. Abeipa, a Khazohpa mohmô liata a phapa, â dopa nata ngâchhihpa hmozy tao ta.

²¹ Hezekia cha Khazohpa o liata chakaona raihria ky liata zy, ryhpa kyh liata zy, biepiepa kyh liata zy, a Khazohpa tluana kyh liata zy, a taopa maih liata pathipalôh tlokhuh ta tao lymâ ta, chavâta thlaochhipa ta a y lymâ.