2 THÂTIHZYRONA 30 - Mara Bible RV (BSI)

Zawpakhô kyhchhi

¹ Hezekia ta Izarei nata Zudâh râh zydua liata chyhsa tuah ta, Epharai nata Manase chizy lâ chhao châ paphao ta, Abeipa, Izarei Khazohpa lâta Zawpakhô kyhchhi chay awpa ta, Zerusale liata Abeipa o lâ a vy khai awpa ta bie papua ta.

² Abei nata a beimachâzy nata Zerusale zawpi zydua ta ryhrao ei ta, thla nona liata Zawpakhô kyhchhi hnei awpa ta a vaw chhuah tua ei ta.

³ Châhrasala theihthaipa a pathaisapazy amâ daih leipa vâta nata Zerusale liata zawpi amâ hmaohpakhy leipa vâta, cha noh liata kyhchhi hnei thei leipa ei ta.

⁴ Chavâta cha hawhta ama pachhuapanohpa cha, abei nata zawpi zydua ta hmo phapa a châpa ta ama pahno.

⁵ Chatanachata Izarei râh zydua, Besebâ tawhta Dânâ taihta Zerusale lâ vaw tlô khaipa ta, Abeipa Iza­rei Khazohpa lâta Zawpakhô kyhchhi tao awpa ta phuah awpa ta biepie ei ta. Zawpakhô kyhchhi cha, hnei awpa zie hawhta ama vaw hnei thei khao leipa a châ.

⁶ Châ phaohtuhpazy ta abei nata a beimachâzy châ cha phaopa ta Izarei nata Zudâh râh zydua lâta sie ei ta, abei biepiepa hawhta, “Hy Izarei sawzy saih u, Khazohpa cha nâmo, Asuria beizy ku tawhta a puapa, laibâhpazy lâta â vaw heih thei nawpa ta, Abeipa, Abarahâ, Aisika nata Izarei Khazohpa lâ kua heih teh u.

⁷ Nâmo la châ pathlatuhpazy nata nama unawhzy hawhna khata y khuh vy. Âmo cha Abeipa, ama pathlatuhpazy Khazohpa chô liata ngâchhih leipa ei ta, nama hmôpa hawhna heta, Abeipa ta roryhrapa ta a tao ha ei.

⁸ Châ pathlatuhpazy hawhta palôh kuhchhapa ta y leipa u la, Abeipa lâta tlao a ngiarih u la, chhâzaw châta a pathaisapa a supathaihpa liata a ngia u la, Abeipa nama Khazohpa cha chakao muh vy. Chatanachata a hiehâhna ru ngaitapa chata a cha kuasai aw ei.

⁹ Abeipa lâ nama kua heih khiahta cha, nama unawhzy nata nama sawzy cha, sei ta a patutuhpazy ta ngiachhie aw ei ta, he râh lâ he amâ vaw lie heih aw. Abeipa nama Khazohpa cha ngiachhiena nata zawngiahna ta a biepa châ ta, ano lâ nama kua heih khiahta cha, châ heihsai aw veih ei,” tah ta.

¹⁰ Châ phaohtuhpazy ta Epharai nata Manase râh zydua liata khih to chahryh lymâ ei ta, Zebulawna taihta ama sie. Châhrasala pahneisao ei ta, mohnaopa ta pasipasawh ei ta.

¹¹ Asera chi, Manase chi nata Zebulaw­na chi thokhazy deikua cha, a panawhpa ta Zerusale lâ cha a vy ei ta.

¹² Abei nata beimachâzy ta Abeipa bie hawhta bie ama piepa cha tao awpa ta, Khazohpa ku cha Zudâh chô liata y ta, Zudâh pathlazy cha palôh miakha paphaosa ta.

¹³ Thla nona liata, viahchhâ thinô pahlao leipa kyhchhi hnei awpa ta, chyhsa hluhpi Zerusale liata tlôpakhy ei ta. Zawpi ama hluh ngaita.

¹⁴ Thyu ei ta, Zerusale liata maisâhzy nata ropahâhpa raona maisâh zydua la ei ta, Kidaraw chavah lâ thy ei ta.

¹⁵ Thla nona, noh hrawh hleipalihna noh ta, Zawpakhô mietakutaw cha thie ei ta. Theihthaipazy nata Livai pathlazy cha ama hmia chhie kaw ta, a pathai ei ta, raopa hlânazy cha Abeipa o liata a ngiakhei ei ta.

¹⁶ Khazohpa chyhsa Mawsi ryhpa hawhta, âmo su chyu liata a duah ei ta. Theihthaipazy ta Livai pathlazy tawhta amâ hlâpa thisaih cha thia ei ta.

¹⁷ Zawpi hry liata a pathai leipa ama hluhpa vâta, cha cha ama taopa a châ. Livai pathlazy ta pathaih leipa to châta Zawpakhô mietakutaw thie ei ta, Abeipa liata ama pathaisa lymâ.

¹⁸ Zawpi hluh via, Epharai mo, Manase mo, Iskâra mo nata Zebulawna mozy ta ryhpa hawhta a pathai tua leipa ta Zawpakhô pati cha nie ei ta. Hezekia ta, “Abeipa phapa ta chyhsa to a ngiahthai sala,

¹⁹ Abeipa, a pathlatuhpazy Khazohpa tlua awpa ta a palôh a paheipa maih cha, supathaihpa ryhpa hawhta pathai tuapa a châ leipa chhao ta, Khazohpa ta a ngiahthai mawh sy,” tah­pa ta thlahchhâ ta.

²⁰ Abeipa ta Heze­kiah thlahchhâna cha nathlie ta, zawpizy cha a patlâh ha ei.

²¹ Zerusale liata a ypa Izarei saw zydua ta viahchhâ thinô pahlao leipa kyhchhi cha, thapha ngaitapa ta noh sari chhôh hmâh ei ta. Livai pathlazy nata theihthaipazy ta ama ao hneipa zydua papua khaipa ta, noh chareih ta Abeipa reithaina hla sa ei ta.

²² Abeipa chakaona rai liata a saomâ ngaitapa Livai pathla zydua chô liata Hezekia ta thapatlôna bie reih ta. Kyhchhi pati cha noh sari chhôh nie ei ta, aryhna hlâna atheihnazy hlâpa ta, Abeipa, ama pathlatuhpazy Khazohpa chô liata alyna bie reih ei ta.

²³ Noh sari hropa kyhchhina hnei via awpa ta, zawpi zydua ta â ryh tah ei ta. Chatanachata noh sari hropa thapha ngaitapa ta kyhchhi via ei ta.

²⁴ Zudâh bei Hezekia ta zawpi ahmaohpakhypazy châta viahchao tôhpa 1,000 nata mietaku 7,000 thyu ta, beimachâzy ta zawpi châta viahchao tôhpa 1,000 nata mietaku 10,000 thyu hra ei ta. Theihthaipa hluhpi a pathai ei ta.

²⁵ Chatanachata Zudâh zawpizy, theihthaipazy nata Livai sahlaozy, Izarei maw lâ râh tawhta a vaw tlôpa zawpizy, Izarei maw lâ râh tawhta chihropa a vaw tlôpazy nata Zudâh râh liata chihropa a pahrâpazy cha a ly ngaita ei ta.

²⁶ Zerusale khihpi cha thaphana ta bie ta, Dâvi sawchapawpa Izarei bei Sawlawmaw daihti tawhta, cha hawhpa hmo cha Zerusale liata y beih vei.

²⁷ Theihthaipazy nata Livai pathlazy thyu ei ta, zawpizy cha byhnâ awpa ei ta. Ama ao theipa châ ta, ama thlahchhâna cha Abeipa pahrâna vârâh tlô ta.