2 THÂTIHZYRONA 3 - Mara Bible RV (BSI)

Sawlawmaw ta Achhyna o a sa

¹ Sawlawmaw ta Abeipa o cha Zeru­sale khihpi chhôh Môria Tlâh liata sa pathao ta. Cha su cha a paw Dâvi hnohta Abeipa â luahna su, Zebu chyhsa Ôranâ sawhrihmo kha châ ta, Dâvi ta â vaw tlyhpa su a châ.

² Â beina kô palihna, thla nona, noh nona liata a sa pathao.

³ Khazohpa o sanazie awpa Sawlawmaw ta a thlienazie cha hetana heta a châ: A doh lâ cha dy thlienazie parohpa ta dy sycharu châ ta, a hâ lâ dy kih a châ.

⁴ Achhyna o hmia lâta aikah cha, a doh nata a hâ a khopa ta taopa châ ta, dy kih raihrie a châ. Â sâhna lâ cha dy 120 a châ. O chhôh lâ cha ngôh suapa ta a pahu.

⁵ Chhôhpadâhpa lai viapa pâhchhô liata meisah vyhpa bai ta, cha cha ngôh suapa ta pahu ta, cha liata thiahrâ tho nata bâlia nothlahpazy a tao.

⁶ O cha lôsôhpazy ta â ngia ngaitapa ta tobi ta, ngôh cha Paravai ngôh a châ.

⁷ O khâpiazy, a siphiahzy, a pâhchhôzy nata a ochhizy ngôh ta pahu ta, pâhchhôzy liata cherubi nothlahpazy khie ta.

⁸ Chatawhcha Su Pathaih Chaipa tao ta. A doh lâ cha o hâ nata pakhopa ta, dy kih ta taopa châ ta, a hâ lâ chhao dy kih a châ hra. Su Pathaih Chaipa cha ngôh suapa ta pahu ta, talent 600 hmâpa a châ.

⁹ A khaipâna ngôh ahrina zie cha sekel sypangawh a châ. O chô lâta chhôhpadâhpa chhao ngôh ta a pahu hra.

¹⁰ Su Pathaih Chaipa liata cherubi nothlahpa miano tao ta, chazy cha ngôh ta pahu ta.

¹¹ Cherubi mathlawzy cha a miano ta pahlyhpa ta dy kih seih ta. Cherubi miakhapa mathlaw cha chavei chachâh ta dy pangawh raihrie seih ta. A mathlaw miakhapa ta pâhchhô daih ta, miakhapa ta cherubi hropa mathlaw kei daih ta.

¹² Cherubi hropa mathlawzy chhao dy pangawh raihrie seih ta, a mathlaw miakhapa ta pâhchhô kei daih ta, miakhapa ta cherubi hropa mathlaw kei daih ta.

¹³ Cha cherubizy mathlaw cha dy kih a seih. Cherubizy cha o chhôh lâ a heipa ta, ama phei ta a duah ei ta.

¹⁴ Pohraipa cha pala nohpa, saihdôhpa nata saihlawpa nata pala rih dipa zy ta tao ta, a chô liata cherubi nothlahpazy a tao.

¹⁵ O hmia lâta dy sythôh nata dy pangawh a sâhpa a tôh miano bô ta, a pawhmao pabyuhpa cha dy pangawh raihrie a châ.

¹⁶ Pachhih a lyupa bâliazy tao ta, a tôh pawhmaozy cha chazai ta. Pawmikarânâ za kha tao ta, bâliazy liata a bangieh.

¹⁷ Atôhzy cha Achhyna o hmia lâta bô ta, miakha chho lâta bô ta, miakha maw lâta bô ta, chho lâta atôh cha Zaki bi ta, maw lâta atôh cha Bôaza a bi.