2 THÂTIHZYRONA 29 - Mara Bible RV (BSI)

Zudâh bei Hezekia

¹ Hezekia cha kô kih nata kô pangawhpa a châ nota a bei pathao ta, Zerusale liata kô kih nata kô chaki â bei. A nô moh cha Abizah châ ta, Zekaria sawchanô a châ.

² A pathlatuhpa Dâvi taozie zydua hawhta, Abeipa mohmô liata hmo dopa tao ta.

Hezekia ta Achhyna o a pathai

³ Â beina kô khana, thla khana liata, Abeipa o ochhizy pahypa ta, taopathi ta.

⁴ Theihthaipazy nata Livai pathlazy Abeipa o lâ a vaw chhi ta, âmo cha nochhi lâta tlyhmia liata pahmaoh ta.

⁵ Ama hnohta, “Nâmo, Livai pathlazy saih u, na nathlie teh u! A pathai u la, Abeipa, châ pathlatuhpazy Khazohpa o he pathai u la, Su Pathaihpa liata apuapazy he thy khai teh u.

⁶ Miah pathlatuhpazy khata ngâchhih leipa ei ta, Abeipa eima Khazohpa mohmô liata hmo pha leipa ama tao haw. Ano cha a heihsai ei ta, Abeipa pahrâna su cha ama hmia nyusai ei ta, hnôh ama chhy haw.

⁷ Aikah ochhizy khaw ei ta, meiôhzy pachhai ei ta, Izarei Khazohpa Su Pathaihpa liata ropahâhpazy rao leipa ei ta, raopa hlânazy chhao hlâ veih ei.

⁸ Chavâta Abeipa pathiiana cha Zudâh nata Zerusale chô liata vaw tlô ta, nama mo ta nama hmôpa hawhna heta, chichhihpa nata noâhpa nata hmaotô chie awpa ta a tao ha ei.

⁹ Pachâ teh u, miah pathlatuhpazy kha zaozi ta pao ei ta, eima sawchapawzy, eima sawchanôzy nata eima lapinôzy sei ta a chhipa ama châ.

¹⁰ Keimo tawhta a hiehâhna ru ngaitapa pakuasapa ta a y thei nawpa ta, Abeipa Izarei Khazohpa hnohta biehrai tao khona palôh ei hnei.

¹¹ Ei saw saih u, diathlâpa ta y khuh vy. Abeipa ta a hmiakô liata a duah ta, ano chakao ta, ano châta chakaotuhpazy châpa ta, atheihnazy hlâ awpa ta a châ tlyh ei hih,” tah ta.

¹² Chatanachata Livai pathlazy cha thyu ei ta. Kôhâ pathlazy tawhta Amasai sawchapawpa Mâhâ nata Azariah sawchapawpa Zôela, Merâri pathlazy tawhta Abadi sawchapapawpa Kisâ nata Zehalele sawchapawpa Azariah, Kesao pathlazy tawhta Zimâ sawchapawpa Zôah nata Zôah sawchapawpa Ede,

¹³ Elizaphâ pathlazy tawhta Simri nata Zuli, Asâpha pathlazy tawhta Zekaria nata Mâtaniah,

¹⁴ Hemâ pathlazy tawhta Zehua nata Simei, Zeduthu pathlazy tawhta Semiah nata Uzie zy vaw pua ei ta.

¹⁵ Ama unawhzy pakhy ei ta, a pathai ei ta, Abeipa bie hawhta bei ta bie a piepa hawh ei ta, Abeipa o cha pathai awpa ta a ngia ei ta.

¹⁶ Theihthaipazy cha Abeipa o chhôh chaipa lâ a ngia ei ta, pathai ei ta, Abeipa Achhyna o liata hmo puapa ama hmôpa zydua cha Abeipa o dôhpachhôh tlyhmia lâ puakhei ei ta. Livai pathlazy ta chazy cha la ei ta, Kidaraw chavah lâ siekhei ei ta.

¹⁷ Thla khana, noh khana noh ta pathaina rai cha hria pathao ei ta, cha thla, noh chariena noh ta Abeipa aikah kaw tlô ei ta. Abeipa o cha noh charie chhôh pathai ei ta, thla khana, noh hrawh hleicharu noh ta ama patlô.

¹⁸ Chatawhcha Bei Hezekia lâ vawh ei ta, a hnohta, “Abeipa o cha pathai khai ha pi ta, raopa hlâna maisâh nata a chhaichhi zydua nata viahchhâ chaluahpa tlâhkhai nata a chhaichhi zydua chhao eima pathai khai haw.

¹⁹ Bei Ahâza â bei nota, a ngâchhih leina vâta, a hny hapa chhaichhi zydua chhao, hmâ thei awpa ta tao pi ta, eima pathai khai haw. Moh tua, chazy cha Abeipa maisâh hmiakô liata a y,” tah ei ta.

²⁰ Bei Hezekia cha mydi ta thyu ta, khihpi chhituhpazy awpakhy ta, Abeipa o lâ khy ei ta.

²¹ Khinarâh nata supathaihpa nata Zudâh châta moleina hlâna châta viahchao tôhpa pô sari, mietaku tôhpa pô sari, mietakutaw pô sari nata mie tôhpa pô sari a vaw chhi ei ta. Chazy cha Abeipa maisâh liata hlâ awpa ta, Arawna sawchapawpa theihthaipazy hnohta biepie ta.

²² Viahchao tôhpazy cha thie ei ta, theihthaipazy ta thisaih la ei ta, maisâh thia ei ta. Mietaku tôhpazy thie ei ta, ama thisaih maisâh thia ei ta. Mietakutawzy chhao thie ei ta, ama thisaih maisâh thia ei ta.

²³ Moleina hlâna châta miezy cha abei nata ahmaohpakhypazy lâ a vaw chhi ei ta, Izarei saw zydua châta chatlaina tao nawpa ta, ama chô liata ama ku pahnieh ei ta.

²⁴ Theihthaipazy ta miezy cha thie ei ta, ama thisaih chhaota maisâh liata moleina hlâna ta hlâ ei ta, Izarei saw zydua châta chatlaina ama tao. Izarei saw zydua châta raopa hlâna nata moleina hlâna tao awpa ta, abei biepiepa hawhta ama tao.

²⁵ Abeipa o liata paotlâzy, tlaipihzy, totâzy tô awpa ta, Livai pathlazy soh ta. Cha cha Dâvi nata abei hrohsopa Kâdâ nata hrohsopa Nâthâ zy biepiepa hawhta taopa châ ta, cha biepiepa cha, a hrohsopazy hmâpa ta Abeipa ta a piepa a châ.

²⁶ Livai pathlazy cha Dâvi pyungiapa chhaichhizy a chabapa ta a duah ei ta, theihthaipazy chhao chiahmiezy a chabapa ta a duah ei ta.

²⁷ Hezekia ta raopa hlâna cha maisâh liata hlâ awpa ta biepie ta. Raopa hlâna hlâ pathaopa a châpa nahta, chiahmiezy nata Izarei bei Dâvi pyungiapa chhaichhizy tôpa ta, Abeipa lâta hla sa pathao ei ta.

²⁸ Zawpi ahmaohpakhypa zydua ta Khazohpa a chhy ei ta, hlasathaipazy ta hla sa ei ta, chiahmie tôtuhpazy ta chiahmie tô ei ta. Raopa hlâna hlâ khaipa a châ hlâlei, cha hawhta tao lymâ ei ta.

²⁹ Raopa hlâna ama hlâ khai nahta, abei nata a hnohta a ypa zydua a bôh ei ta, Khazohpa a chhy ei ta.

³⁰ Bei Hezekia nata beimachâzy ta Livai pathlazy cha, Dâvi nata hrohsopa Asâpha phipa reithaina hlazy sa awpa ta biepie ei ta. Thapha ngaitapa ta reithaina hlazy cha sa ei ta, a bôh ei ta, Khazohpa a chhy ei ta.

³¹ Hezekia ta, “Tahmâ cha Abeipa châta a pathai ha ei chi ta, a vaw hnia u la, Abeipa o lâta atheihnazy nata alyna bie reina hmohlâpazy vaw hlâ teh u,” tah ta. Zawpizy ta atheihnazy nata alyna bie reina hmohlâpazy vaw cheih ei ta, palôh khona a hneipa maihta raopa hlânazy vaw cheih hra ei ta.

³² Raopa hlânazy châta zawpi vaw cheipa sahrohzy cha, viahchao tôhpa 70, mietaku tôhpa 100 nata mietakutaw 200 a châ. Cha zydua cha Abeipa lâta raopa hlâna châta ama vaw cheipa sai a châ.

³³ Pathaisana atheihna châta hlâpazy cha viahchao tôhpa 600 nata mietaku 3,000 a châ.

³⁴ Theihthaipazy ama chyh tu hapa vâta, raopa hlâna sahrohzy cha a vo hlai tiah leipa ei ta. Chavâta theihthaipa hropazy amâ pathai khai hlâlei cha, ama unawh Livai pathlazy ta rai a ngoh hlâlei ama bao. Apathaisana kyh liata la, theihthaipazy hlâta Livai pathlazy ama palôh tlao â do via.

³⁵ Raopa hlâna hluh ngaitapazy hleikhô ta, aryhna hlâna thawzy nata raopa hlâna to châta dopa hlânazy chhao a hluh ngaita hra. Cha hawhna chata Abeipa o liata chakaona rai cha paduapathipa a châ.

³⁶ Ama pangiasa leipa ta, eikhapi ta hmo vaw y ta, Khazohpa ta zawpizy châta â chhuanohpa hmozy vâta, Hezekia nata zawpi zydua cha amâ ly ngaita.