2 THÂTIHZYRONA 28 - Mara Bible RV (BSI)

Zudâh bei Ahâza

¹ Ahâza cha kô kihpa a châ nota a bei pathao ta, Zerusale liata kô hrawh hleicharu â bei. A pathlatuhpa Dâvi ta Abeipa mohmô liata hmo dopa a taopa hawhta tao leipa ta,

² Izarei beizy lâpi tlao a chhihpa ta, Bâlâ khazoh nothlah leihpazy tao ta.

³ Hinô Sawchapawpa Saikao liata atheihnazy hlâ ta, Abeipa ta Izarei phopi hmiakô liata a papua hapa phopizy ta pasichhihpa ama taopazy tao hra ta, a sawchapawzy mei ta raopa ta atheihna ta hlâ ta.

⁴ Su sâhpazy, tlâhzy nata tho hrohpa to ry liatazy atheihnazy hlâ ta, ropahâhpazy a rao tyh.

Zudâh pahniepa a châ

⁵ Chavâta Ahâza cha Abeipa a Khazohpa ta Aramia bei ku liata pie ha ta. Aramia mo ta Ahâza cha pahnie ei ta, a chyhsa hluhpi patu ei ta, sei ta Dâmaskâ lâ ama siekhei haw. Izarei bei ku liata chhao piepa châ ta, ano chhao ta Zudâh chyhsa hluhpi a thie haw.

⁶ Remâliah sawchapawpa Pekâ ta, noh kha ta Zudâh chyhsa 120,000 thie ta. Ama zydua ta pasaipha châ ei ta, Abeipa, ama pathlatuhpazy Khazohpa amâ heihsaipa vâta pahniepa ama châ.

⁷ Epharai pasaipha Zikari ta Zudâh bei sawchapawpa Mâ­sei nata abei o liata hyutuhpa Azrikâ nata abei a pazipa Elkânâ zy a thie ei.

⁸ Izarei sawzy ta ama chiheih Zudâh mo 200,000 patu ei ta, chanôzy, ama sawchapaw nata sawchanôzy chhaota sei ta a chhi ei ta. Hraona sôh chhao thata la ei ta, Samâri lâ ama siekhei haw.

⁹ Cha liata Abeipa hrohsopa pakha, a moh Ôdedâ ama tahpa y ta. Samâri lâ a vaw tlôpa pheisaihzy cha kei dy ta, ama hnohta, “Pachâ teh u, Abeipa châ pathlatuhpazy Khazohpa cha Zudâh chô liata a hie a hâhpa vâta nama ku liata a cha pie ei. Châhrasala pathi iapa ta thie ei chi ta, nama thiena kyh cha vârâh a daih haw.

¹⁰ Zudâh nata Zerusale mo cha a chanô chapaw ta sei ta tao a chhuah ei chi ta. Nâmo taih chhao ta Abeipa nama Khazohpa chô liata hmo nama paraopa châ vei ma?

¹¹ Chavâta ei bie he nathlie u la, sei ta nama patupa nama chiheihzy kha pakuasa ha teh u. Chataleipatala Abeipa pathiiana ru ngaitapa nama chô liata a vaw tlô pathlei aw,” tah ta.

¹² Epharai hyutuhpa thokha, Zôhanâ sawchapawpa Azariah, Mesilemô sawchapawpa Berekiah, Sâluh sawchapawpa Zehizikiah nata Hâdalai sawchapawpa Amâsâ zy ta adyuhna tawhta a vaw tlôpazy cha a duakhâh ei ta,

¹³ ama hnohta, “He liata seizy namâ vaw ngiakhei awpa châ vei. Eima moleinazy nata eima paraonazy hleikhô ta, Abeipa chô liata eima paraona baichha awpa namâ chhuahpa a châ hih. Moleina ru ngaitapa hnei pi ta, pathiiana ru ngaitapa Izarei chô liata a tlô thlu ha hih,” tah ei ta.

¹⁴ Chatanachata pheisaihzy ta sei ama patupa nata hraona sôh ama lapazy cha, pawhrâhpazy nata ahmaohpakhypa zydua hmiakô liata siesai khai ei ta.

¹⁵ Chatawhcha ama moh reipa sahlaozy vaw thyu ei ta, seizy cha a chhi ei ta, hraona hmo ama lapa hmâpa ta, ama hry liata thluahruapazy cha chysia pakysa ei ta. Chysiazy pie ei ta, pheikyzy paky ei ta, niedo piepa ta, sathaw zy thu ei ta. Thachhâ panaopazy alâ pakiasa ei ta, ama heinawhzy yna thiahrâ khihpi Zerikô taih kei pathlie ei ta. Âmo cha Samâri lâ amâ vaw lie haw.

¹⁶ Cha daihti liata, Bei Ahâza cha baona hiah awpa ta Asuria bei lâ chyhsa tuah ta.

¹⁷ Edômâ mo ta Zudâh vaw chho heih ei ta, pahnie ei ta, Zudâh chyhsazy sei ta amâ chhi hapa vâta a tuapa a châ.

¹⁸ Philistinâ mo chhao ta Sephelâ nata Zudâh Neke râhzy vaw chho ei ta, Beseme, Aizalô, Kederaw, Sôkô nata a khichapeihzy, Timnah nata a khichapeihzy, Kimzô nata a khichapeihzy la ei ta, cha suzy liata ama pahrâ haw.

¹⁹ Izarei bei Ahâza vâta, Zudâh cha Abeipa châta ngâ a chhih leipa ta, chavâta Abeipa ta Zudâh cha molei kawpa ta hmo pataosa ta, a panawh haw.

²⁰ Asuria bei Tikalâpilesa ta Ahâza cha vaw siehnao ta, thapatlô châpa ta, nôpopa ta tlao a soh hapa a châ.

²¹ Ahâza ta Abeipa o nata abei o nata chhituhpazy o tawhta hmozy la ta, Asuria bei cha pie taraw ta, châhrasala phahnai khao vei.

Ahâza nothlahpa achhyna

²² A nôpo ngaita no chhao ta, Ahâza cha Abeipa chô liata ngâ a chhih lei via rili ta. Cha cha Bei Ahâza hro a châ.

²³ “Aramia khazohzy ta Aramia beizy ama baopa vâta, kei chhao eina bao thei nawpa ei ta, âmo lâta atheihna ei hlâ aw,” tah ta, ano a pahnietuhpa Dâmaskâ khazohzy lâta atheihna hlâ ta. Châhrasala cha cha ano nata Izarei zydua raona a châ.

²⁴ Ahâza ta Khazohpa o liata hmobaohzy pakhy ta, Khazohpa o liata hmobaohzy cha a tlawh ta pachhaih ta, Abeipa o ochhizy khaw ta, Zerusale ki to liata maisâhzy tao ta.

²⁵ Khazoh hropazy lâta raopa hlânazy hlâ nawpa ta, Zudâh khihpi to liata su sâhpazy tao ta, Abeipa, a pathlatuhpazy Khazohpa pathi a pa-ia haw.

²⁶ Ahâza hmotaopa hropazy nata a hroziezy cha, âthaona tawhta achhâna taihta, Zudâh nata Izarei beizy thâtih rona châbu liata ropa a châ.

²⁷ Ahâza cha a pathlatuhpazy hnohta a mô ta, Zerusale khihpi liata ama pabu. Izarei beizy thlâsu liata pabu veih ei. A sawchapawpa Hezekia ta ano su liata â bei.