2 THÂTIHZYRONA 27 - Mara Bible RV (BSI)Zudâh bei Zôthâ ( 2 Abei 15.32-38 ) 1 Zôthâ cha kô kih nata kô pangawhpa a châ nota a bei pathao ta, Zerusale liata kô hrawh hleicharu â bei. A nô moh cha Zerusâ châ ta, Zadô sawchanô a châ. 2 A paw Uzia hmotaopa zydua tao hrapa ta, Abeipa mohmô ta hmo dopa tao ta, Abeipa Achhyna o lâ deikua a ngia vei. Zudâh phopi deikua cha avyuhna moleinazy ama tao ngâ thlâh ha chy. 3 Abeipa o machhua lâta chhikao tao ta, Ôphe thokhy chô liata chhao o hluhpi sa ta. 4 Cha dei châ vei, Zudâh tlâh râh liata khihpizy padua ta, râhmâhpa tlâhzy liata thokhy nata o sâhpazy a padua. 5 Amawna beizy a dyuh ta, a pahnie ei. Cha kô liata, Bei Zôthâ cha Amawna mo ta tâkâ talent 100, âtâ sâh bai 10,000 nata bâli sâh bai 10,000 ama pie. Amawna mo ta cha zie cha a kô nona nata a kô thôhna liata chhao ama pie. 6 Zôthâ cha Abeipa a Khazohpa hmiakô liata a lâpizy pakhâta ta a mohpa vâta, a thatlô via lymâ ta. 7 Zôthâ hmotaopa hropa zydua, chariah â dyuhpazy nata a yzie zydua cha Izarei nata Zudâh beizy thâtih rona châbu liata ropa a châ. 8 Â bei pathao nota kô kih nata kô pangawhpa châ ta, Zerusale liata kô hrawh hleicharu â bei. 9 Zôthâ cha a pathlatuhpazy hnohta a mô ta, Dâvi khihpi liata pabu ei ta, a sawchapawpa Ahâza ta ano su liata â bei. |