2 THÂTIHZYRONA 26 - Mara Bible RV (BSI)

Zudâh bei Uzia

¹ Zudâh chyhsa zydua ta kô hrawh hleicharupa Uzia cha a chhi ei ta, a paw Amazia su liata abei ta tao ei ta.

² A pathlatuhpazy hnohta Bei Amazia â mô tawhta, a sawchapawpa Bei Uzia ta Elô khihpi paduapathi ta, Zudâh ry liata soh heih ta.

³ Uzia cha kô hrawh hleicharupa a châ nota a bei pathao ta, Zerusale liata kô sypangawh nata kô no â bei. A nô moh cha Zekôliah châ ta, Zerusale zuah a châ.

⁴ A paw Amazia hmotaopa hawhta tao hrapa ta, Abeipa mohmô liata hmo dopa tao ta.

⁵ Khazohpa china kyh a pachupa Zekaria hro chhôh zydua cha Khazohpa tlua lymâ ta. Abeipa a tlua chhôh zydua cha Khazohpa ta hlaotlohna a pie lymâ.

⁶ Philistinâ mo a dyuh awpa ta pua ta, Kâthâ thokhy, Zabane thokhy nata Asadô thokhy zy pacho ta. Asadô râh nata Philistinâ mo hry liata khihpizy padua ta.

⁷ Philistinâ mo nata Kubâlâ liata a ypa Arabia mo nata Muni mozy â dyuhna liata Khazohpa ta bao ta.

⁸ Amawna mo cha Uzia hnohta râhpaw pie ei ta, thatlô ngaitapa a châpa vâta, Izi râhri taihta a moh pathâh ta.

⁹ Cha dei châ vei, Zerusale liata Aki Chhikao, Saikao Chhikao nata Pakona Chhikao zy liata Uzia ta o sâhpazy sa ta, chazy cha thokhy ta dôh ta.

¹⁰ Râhchawhpa liata chhao o sâhpazy padua ta, sahroh hluhpi a hneipa vâta, Sephelâ nata bypizy liata tipo hluhpi tao ta. Lyutao a pahâhpa a châpa vâta, tlâhzy nata chhaohlei phana suzy liata lyutaopa nata kre sadô mohôhtuhpazy soh ta.

¹¹ Cha dei châ vei, Uzia cha adyuhna lâ a sie theipa pheisaihzy hnei ta. Chârohtuhpa Zeili nata beimachâ Mâsei ta ama raonazie lymâ hawhta, abei pheisaihzy hyutuhpa Hânaniah chhihthana ry liata a py py ta pachhaih ei ta.

¹² Pho luhpa pasaiphazy cha ama zydua ta 2,600 ama châ.

¹³ Ama ry liata pheisaih 307,500 y ei ta, chazy cha chariah adyuhna liata abei a bao thei awpa pheisaih thatlôpazy ama châ.

¹⁴ Uzia ta pheisaih zydua châta vyhphaozy, aseizy, thua lakhuzy, thua viahkaozy, libawzy nata cheisiah lôzy a chhuanoh ta.

¹⁵ Zerusale liata o sâhpa nata thokhy kizy liata soh ta, châtai nata alô laipazy ka nawpa ta, zôthaipazy ta ama taopa khawzy soh ta. A thatlôna taihta thata baopa a châpa vâta, râh hlapi taihta a moh pathâh ta.

Uzia apalaina nata hriena

¹⁶ Châhrasala thatlôpa ta a vaw y nahta, Uzia cha a palai ta, cha chata ano châta raona a tlôkhei haw. Abeipa a Khazohpa châta ngâchhih leipa ta y ta, ropahâhpa maisâh liata ropahâhpa rao awpa ta Abeipa Achhyna o lâ a ngia ta.

¹⁷ Theihthaipa Azariah nata Abeipa theihthaipa pasaipha sycharie ta Uzia cha a ngiahnao ei ta.

¹⁸ Bei Uzia cha pakhâ ei ta, a hnohta, “Uzia y, Abeipa châta ropahâhpa rao awpa cha nâma tao awpa châ vei. Ropahâhpa rao awpa ta pananopa Arawna pathla theihthaipazy tao awpa a châ. Supathaihpa tawhna heta pua ha mah y. Hmo parao chi ta, na hmo taopa he Zehôvâh Khazohpa tawhta palyupalihna na hmô nawpa châ vei,” tah ei ta.

¹⁹ Uzia cha a hiehâh kaw ta. Ropahâhpa raona mei lana cha a chaba thlâh ha ta. Theihthaipazy chô liata a hie a hâh ngaita nota, Abeipa o liata ropahâhpa raona kiapâh liata theihthaipazy mohmô ta a khi liata vaw phawh ta.

²⁰ Theihthai beipa Azariah nata theihthaipa zydua ta moh ei ta, a khi liata phawhpa hri vaw y ta! Thlai papua ei ta, Abeipa ta a hriepa vâta, ano chhao ta a para ngaitapa ta pua ha ta.

²¹ Chatanachata Bei Uzia cha a thi noh taihta phawhpa châ ta, phawhpa a châpa vâta o nano ta y ta, Abeipa o pangiasa khao leipa a châ. A sawchapawpa Zôthâ ta abei o mohôh ta, râh chhao â vao.

²² Uzia hmotaopa hropa zydua cha, âthaona tawhta achhâna taihta, Amôza sawchapawpa hrohsopa Isai ta roh ta.

²³ Uzia cha a pathlatuhpazy hnohta a mô ta, “Ano la phawhpa châ tlôh ta,” tah ei ta, a pathlatuhpazy hnohta abeizy thlâsu kiapâh liata ama pabu. A sawchapaw­pa Zôthâ ta ano su liata â bei.