2 THÂTIHZYRONA 25 - Mara Bible RV (BSI)

Zudâh bei Amazia

¹ Amazia cha kô kih nata kô pangawhpa a châ nota a bei ta, Zerusale liata kô kih nata kô chaki â bei. A nô moh cha Zehôdanâ châ ta, Zerusale zuah a châ.

² Abeipa mohmô liata hmo dopa tao ta, châhrasala palôh tlokhuh ta tao vei.

³ Abeina biehneina a ku liata â ipa ta a ypa nahta, a chakaotuhpazy hry liata a paw Zudâh bei a thietuhpazy thie khai ta.

⁴ Châhrasala Mawsi Ryhpa Châbu liata, “Sawzy vâta pawzy ama thi awpa châ leipa ta, pawzy vâta sawzy ama thi awpa châ hra vei. Chyhsa to âmo moleina vâta ama thi awpa a châ,” tahpa Abeipa biepiepa hawhta, ama sawzy deikua cha thie vei.

Amazia pahniena a to

⁵ Amazia ta Zudâh zawpizy awpakhy ta, Zudâh nata Benzami mo zydua cha ama pho zipa ta, pheisaih sâh kha hyutuhpazy ry liata nata za kha hyutuhpazy ry liata soh ta. Kô kih tawhta chô lâ maluh reih ta, asei nata vyhphao a hmâh theipa, chariah a dyuh thei awpa ta atlyhpa zydua cha 300,000 ama châ.

⁶ Tâkâ talent 100 ta Izarei maw lâ râh pasaipha 100,000 a hlâh chhi ta.

⁷ Châhrasala Khazohpa chyhsa pakha ano lâ a vy ta, a hnohta, “Hy abei, Izarei hnohta, he Epharai pathla zydua hnohna heta Abeipa y vei. Chavâta Izarei pheisaihzy he na hnohta pasiesa khah y.

⁸ Hrâ na sie awpa khiah cha sie la, a dyuh la, adyuhna châta riahphapa ta y mah y. Chataleipatala Khazohpa ta chariah hmia liata a cha panawh pathlei aw. Khazohpa cha bao theina nata panawh theina hmotaotheina a hneipa châ tlôh ta,” tah ta.

⁹ Amazia ta Khazohpa chyhsa hnohta, “Cha hawhpa khiah, Izarei pheisaihzy ei pie hapa talent 100 kha kheihta ei tao aw?” tah ta. Khazohpa chyhsa ta, “Abeipa ta kha hlâta hluh via a cha pie thei,” tah ta.

¹⁰ Chatanachata Amazia ta Epharai râh tawhta pheisaih a vypazy cha ama râh lâ paliesa ta. Izarei pheisaihzy cha Zudâh mo chô liata thata ama hiehâh ta, hiehâh ngaitana chôta ama râh lâ amâ lie haw.

¹¹ Amazia cha riahphapa ta a pheisaihzy chhihtha ta, Alôh Saikao lâ sie ta, Seirâ pheisaih 10,000 thie ta.

¹² Zudâh pheisaihzy ta Seirâ pheisaih 10,000 hropa ahrohpa ta patu ei ta, lôkâhpa laki lâ a chhi ei ta, lôkâhpa laki tawhta chati pathlah ei ta, a tlawpoh ta ama zao khai haw.

¹³ Cha nota Amazia ta a hnohta adyuhna lâ pasiesa leipa ta a pakuasa hapa pheisaihzy khata Zudâh khihpizy cha Samâri tawhta Behôrô taihta chho laih lymâ ei ta, chyhsa 3,000 thie ei ta, hraona sôh hluhpi la ei ta.

Amazia nothlâhpa achhyna

¹⁴ Amazia cha Edômâ mo pahnie ta a vaw kua tawhta, Seirâ mo khazohzy vaw phaoh ta, a khazohzy châta padua ta. Chazy cha a chhy ta, nothlahpazy lâ cha atheihnazy a hlâ.

¹⁵ Chavâta Abeipa cha Amazia chô liata a pathi thata ia ta, ano lâ hrohsopa tuah ta, hrohsopa ta Amazia hnohta, “Khazia na ku tawhta ama chyhsazy a pachha thei leipa phopi khazohzy nâ chhy?” tah ta.

¹⁶ Hrohsopa ta bie a rei hai nota, abei ta a hnohta, “Abei ryhraokheituhpa ta eima cha tao ma? A chalih teh! Khazia na thi aw,” tah ta. Hrohsopa ta, “He hmo he tao chi ta, ei ryhraokheina nâ pyh leipa vâta, Khazohpa ta pahleipadia a châ chhuah haw tahpa ei pahno,” tah ta, chatawhcha a chalih ha ta.

Izarei ta Zudâh a pahnie

¹⁷ Zudâh bei Amazia ta ano ryhraokheituhpazy bie a pyh ta, Zehu sawchapawpa Zehôahâ sawchapawpa Izarei bei Zôasâ lâ chyhsa tuah ta, a hnohta, “A vy la, hmiachhypa ta eimâ moh tua aw,” tah ta.

¹⁸ Izarei bei Zôasâ ta Zudâh bei Amazia lâ chyhsa tuah ta, a hnohta, “Lebanaw ahloh buh ta Lebanaw sidy tho hnohta, ‘Na sawchanô kha ei saw­chapaw hnohta a lapinô awpa ta pie teh,’ tah ta. Lebanaw râhsa a vy ta, ahloh buh cha a tly pabai haw.

¹⁹ ‘Edômâ ei pahnie haw,’ tah chi ta, na palôh a palaisa chi ta. Na o liata y molo thlâh ha teh. Khazia tymâna taopa ta na pao aw? Khazia Zudâh chhao na hnohta a pao aw?” tah ta.

²⁰ Châhrasala Amazia ta nathlie khoh leipa ta. Edômâ khazohzy amâ chhypa vâta, ama chariahzy ku liata pie awpa ta Khazohpa ta ryh a rao hapa a châ.

²¹ Chatanachata Izarei bei Zôasâ cha khy ta, Zudâh bei Amazia nata Zudâh râh Beseme khihpi liata hmiachhypa ta a dyuh ei ta.

²² Zudâh cha Izarei ta pahnie ha ta, chyhsa to ama o chyu lâta a râ ha ei ta.

²³ Izarei bei Zôasâ ta Ahazia sawchapawpa Zôasâ sawchapawpa Zudâh bei Amazia cha Beseme liata patu ta, Zerusale lâ a chhi ta. Zerusale thokhy cha Epharai Chhikao tawhta Aki Chhikao taihta dy za palih pacho ta.

²⁴ Ôbededô mohôhna ry liata a ypa Khazohpa o liata ngôhzy, tâkâzy nata hmobaoh zydua la ta. Abei o liata ryusôhpazy chhao la ta, chyhsazy chhao a chhi ta, Samâri lâ a lie ha ta.

²⁵ Zôasâ sawchapawpa Zudâh bei Amazia cha, Zehôahâ sawchapawpa Izarei bei Zôasâ a thi tawhta kô hrawh hleipangawh hroh ta.

²⁶ Amazia hmotaopa hropazy cha, âthaona tawhta achhâna taihta Zudâh bei nata Izarei beizy thâtih rona châbu liata ropa a châ.

²⁷ Amazia cha Abeipa â heihsaipa nahta, chyhsa thokha ta ano cha Zerusale liata arulâta tei ei ta, chavâta Lakhi lâ a râ ta. Châhrasala Lakhi lâ cha chadaisa ei ta, cha liata ama thie haw.

²⁸ A ri cha arâ ta vaw phaoh ei ta, a pathlatuhpazy hnohta Dâvi khihpi Zerusale liata ama pabu.