2 THÂTIHZYRONA 24 - Mara Bible RV (BSI)

Zudâh bei Zôasâ

¹ Zôasâ cha kô saripa a châ nota a bei ta, Zerusale liata kô sypalih â bei. A nô moh cha Zibia châ ta, Besebâ zuah a châ.

² Zôasâ cha theihthaipa Zehôdâ hro chhôh zydua cha Abeipa mohmô ta hmo phapa tao ta.

³ Zehôdâ ta lapinô pano hiapa ta, sawchanôzy nata sawchapawzy sa ta.

⁴ Zôasâ cha bei a châ tawhta Abeipa o tao pathi a chhuah ta.

⁵ Theihthaipazy nata Livai pathlazy awpakhy ta, ama hnohta, “Zudâh khihpizy lâ sie u la, kô chareih ta nama Khazohpa o sa pathi nawpa ta, Izarei chyhsa zydua sôh khei teh u. A para kawpa ta tao muh vy,” tah ta. Châhrasala Livai pathlazy cha a para leipa ei ta.

⁶ Chavâta abei ta theihthai beipa Zehôdâ cha aw ta, a hnohta, “Abeipa chakaotuhpa Mawsi nata Izarei zawpizy ta ama vaw rao hapa hawhta, pahnokheina poh o châta pie awpa chhiezy cha Zudâh râhsawzy nata Zerusale khihsawzy khei awpa ta, khazia Livai pathlazy nâ hnaw vei?” tah ta.

⁷ Moleipa chanô Athaliah sawcha­pawzy ta Khazohpa o hrao ei ta, Abeipa o liata hmohlâpa pathaihpa zydua cha Bâlâ châta ama vaw hmâ hapa vâta sôh a y khao leipa a châ.

⁸ Abei ta biepie ta, byh tao ei ta, Abeipa o chhikao khôtho liata soh ei ta.

⁹ Râhchawhpa liata ama y nota, Khazohpa chakaotuhpa Mawsi ta Izarei sawzy chei awpa chhie a vaw rao hapa cha, Abeipa châta vaw cheih khai awpa ta, Zudâh râh zydua nata Zerusale khihpi liata phuah ei ta.

¹⁰ Chhituhpa nata zawpi zydua cha a ly ngaita ei ta, ama chhiezy vaw cheih ei ta, byh biena taihta vaw soh ei ta.

¹¹ Livai pathlazy ta beimachâzy lâta byh cha vaw cheih ei ta, sôh hluhpi a ypa ama hmô nahta, abei chârohtuhpa nata theihthai beipa chakaotuhpa ta sôh cha la ei ta, byh ruapa cha a sona su liata soh tyh ei ta. Cha hawhna chata noh chareih tao ei ta, sôh hluhpi pahmaoh ei ta.

¹² Abei nata Zehôdâ ta sôh a tlohpakhypa cha Abeipa o raihriatuhpazy ku liata pie ei ta. Âmo ta Abeipa o taopathi nawpa ta, lôkhaithaipazy nata zôthaipazy hrua ei ta. Thua nata dawh rai a thaipazy chhao, Abeipa o taopathina rai hria awpa ta ama hrua hra.

¹³ Raihriatuhpazy ta tiama ta hria ei ta, taopathina raihria cha ama ku liata a hmasie lymâ ta, Khazohpa o cha a châ tyhpa hawh tlai ta â ipa ta ama paduapathi haw.

¹⁴ Rai ama patlô nahta, sôh laibâhpa zydua cha abei nata Zehôdâ lâ vaw cheih ei ta. Cha sôh cha hmâpa ta Abeipa o liata chakaona châta nata raopa hlâna châta beihphiahzy tao ei ta, ropahâhpa beihkohzy nata ngôh nata tâkâ hmobaohzy chhao ama tao. Chatanachata Zehôdâ hro chhôh zydua cha, Abeipa o liata raopa hlânazy a daihtita liata ama hlâ lymâ.

¹⁵ Zehôdâ cha a machâna taih hroh ta, chhâ a palopa ta thi ta, a thi nota kô za kha nata sythôhpa a châ.

¹⁶ Izarei râh liata nata Khazohpa nata a o châta hmo phapa a taopa vâta, Dâvi khihpi liata abeizy hry liata ama pabu.

¹⁷ Zehôdâ a thi tawhta, Zudâh chhituhpazy a vy ei ta, abei a vaw naoh ei ta. Abei ta ama bie nathlie ta.

¹⁸ Abeipa, ama pathlatuhpazy Khazohpa o a heihsaipa ta, Aseri nata khazoh nothlahpazy chakao ei ta. Cha ama thaileichâna vâna chata Zudâh nata Zerusale chô liata pathiiana vaw tlô ta.

¹⁹ Chatahrasala Abeipa lâ a chhi heih awpa ta, ama hnohta hrohsopazy tuah ta. Hrohsopazy chata ama thaileizie zy pahnosa ei ta, châhrasala nathlie khoh hlei veih ei.

Bei Zôasâ ngâchhih leina

²⁰ Chatawhcha theihthaipa Zehôdâ sawchapawpa Zekaria chô liata Khazohpa Thlahpa vaw tlô ta, zawpi chô lâta a duah ta, ama hnohta, “Khazohpa ta hetana heta a tah, ‘Khazia vânoh to thai khao lei awpa taihta Abeipa biepiepa nama parao? Abeipa namâ heihsaipa vâta, ano chhao ta a châ heihsai ha ei,’” tah ta.

²¹ Châhrasala ano cha tlao tei ei ta, Bei Zôasâ biepiepa ta, Abeipa o dôhpachhôh tlyhmia liata alô ta vawhsao ha ei ta.

²² Zekaria paw Zehôdâ ta a chô liata phana a palâsa tyhpazy kha Bei Zôasâ ta a thei khao vei. A sawchapawpa a thie haw. Zekaria ta a thi chy ta, “Abeipa ta hmô sala, phuh la mawh sy!” tah ta.

Bei Zôasâ thina

²³ Kô chhâna lâta Aramia pheisaihzy ta Zôasâ vaw siehnao ei ta. Zudâh râh nata Zerusale liata a ngia ei ta, râh chhituhpa zydua pahleipadia ei ta, ama hraona sôh zydua Dâmaskâ bei lâ ama paphao.

²⁴ Aramia pheisaihzy cha maluh chyhta vaw sie ei ta, châhrasala Zudâh pathlazy ta Abeipa, ama pathlatuhpazy Khazohpa amâ heihsai hapa vâta, Abeipa ta Zudâh pheisaih hluh ngaitapa cha Aramia mo ku liata a pie ha ei. Cha hawhna chata Zôasâ chô liata hriena ama patlôsa haw.

²⁵ Zôasâ cha hmah thata phaoh ta, Aramia pheisaihzy ta amâ liesai nahta, theihthaipa Zehôdâ sawchapawpa thisaih vâna khata ano chyhsazy tlai ta arulâta tei ei ta, a rakhô liata ama thie haw. Chatanachata Zôasâ cha thi ta, Dâvi khihpi liata pabu ei ta, abeizy thlâ su liata deikua pabu veih ei.

²⁶ Zôasâ a teituhpazy cha Amawna chyhsa Simia sawchapawpa Zabâdi nata Môabâ zuah Simri sawchapawpa Zehôzabâ ama châ.

²⁷ Zôasâ sawchapawzy thâtih, ano lâta zikyu arâna thâtih nata Khazohpa o a paduapathina thâtihzy cha Abeizy thâtih Chhopasiana Châbu liata ropa a châ. A sawchapawpa Amazia ta ano su liata â bei.