2 THÂTIHZYRONA 23 - Mara Bible RV (BSI)

Zudâh bei Zôasâ

¹ A kô sarina liata, theihthaipa Zehôdâ cha a tha a patlô ta, pheisaih za kha hyutuhpa, Zehôrâ sawchapawpa Azariah, Zehôhanâ sawchapawpa Ismela, Ôbedâ sawchapawpa Azariah, Adiah sawchapawpa Mâsei nata Zikari sawchapawpa Elisaphâ zy hnohta biehrai tao ta.

² Zudâh râh chahryh ei ta, Zudâh khihpi to liata Livai pathlazy nata Izarei pho pawhrâhpazy pakhy ei ta, Zerusale lâ a vaw chhi ei ta.

³ Zawpi ahmaohpakhypa zydua ta abei hnohta Khazohpa o liata biehrai tao ei ta. Zehôdâ ta ama hnohta, “Abei saw he moh teh u! Abeipa ta Dâvi pathlazy thâtih a vaw rei hapa hawhta, ano he â bei awpa a châ.

⁴ Hetana heta nama tao aw. Pahânoh ta a pahâpa theihthaipa nata Livai pathlazy hry liata su thôh su kha chhikao vaih aw ei chi ta,

⁵ su thôh su kha abei o vaih aw ei chi ta, su thôh su kha Abôna Chhikao nama vaih aw. Zawpi zydua cha Abeipa o dôhpachhôh tlyhmia liata ama y aw.

⁶ Theihthaipazy nata chakaotuhpa Livai pathlazy tah leipa ta cha, ahy hmahta Abeipa o liata amâ ngia awpa châ vei. Âmo deikua cha ama pathaihpa vâta a ngia aw ei ta, zawpi zydua deikua cha Abeipa ta su a raopazy liata ama vaih aw.

⁷ Livai pathlazy ta ama chaihrai chabapa ta, abei cha chadô aw ei ta, o liata a vaw ngiapa maih ama thie lymâ aw. Abei puana nata angiana maihta a hnohta nama y lymâ aw,” tah ta.

⁸ Livai pathlazy nata Zudâh mo zydua ta theihthaipa Zehôdâ biepiepa zydua hawhta tao ei ta. Ama hyutuhpazy ta Pahânoh ta chakaona rai a hria awpa nata a pahâ awpazy a vaw chhi chyu ei ta. Theihthaipa Zehôdâ ta Pahânoh ta a pahâ awpazy cha pahâsa leipa ta.

⁹ Theihthaipa Zehôdâ ta pheisaih za kha hyutuhpazy cha Abeipa o liata a ypa Bei Dâvi asei nata vyhphao chyhpa nata vyhphao laipazy pie ta.

¹⁰ Chyhsa zydua cha chaihrai chaba chyupa ta, o chho lâ tawhta maw lâ taihta maisâh nata o cha chadôpa ta, abei cha vaih ei ta.

¹¹ Abei sawchapawpa cha vaw puakhei ei ta, beilakho pakho ei ta, biehraina ryuchâ pie ei ta. Chatawhcha bei ta phuah ei ta, Zehôdâ nata a sawchapawzy ta Zôasâ cha sathawthu ei ta, “Abei cha hroh pareih mawh sy,” tah ei ta.

Athaliah thiepa a châ

¹² Zawpi a râhreihpa nata bei ama palyupalihna pyu cha Athaliah ta a thei nahta, Abeipa o liata zawpi lâ cha vawh ta.

¹³ Mohmia pasaih ta, chhikao liata otôh kiapâh liata bei a duahpa cha hmô ta. A kiapâh liata pheisaih za kha hyutuhpazy nata chiahmie tôtuhpazy y ei ta. Râh chyhsa zydua cha thaphapa ta y ei ta, chiahmiezy thata tô ei ta. Hlasathaipazy ta ama pyungiapa chhaichhizy tôpa ta reithaina hlazy chhihtha ei ta. Athaliah cha a pohzy hrie ta, “Râh apaphasaina! Râh apaphasaina!” tahpa ta awh ta.

¹⁴ Theihthaipa Zehôdâ ta pheisaih za kha hyutuhpazy a chhi ta, ama hnohta, “Pheisaihzy likawh liata kaw puakhei u la, ahy rai ano a zipa maih cha zaozi ta thie awpa a châ,” tah ta. Theihthaipa ta, “Abeipa o liata la thie awpa châ vei,” a tahpa vâta ama kaw puakheipa a châ.

¹⁵ Chatanachata patu ei ta, arâ chhikao lâ tawhta abei o lâ a chhi ei ta, cha liata ama thie haw.

Zehôdâ ta taopathina rai a hriapazy

¹⁶ Zehôdâ ta ano nata zawpi zydua nata abei cha, Abeipa phopi châ awpa ta ama likah liata biehrai tao ta.

¹⁷ Chatawhcha zawpi zydua cha Bâlâ achhyna o lâ vawh ei ta, achhyna o cha parao ei ta, Bâlâ maisâhzy nata a nothlahpazy pakeichheih ei ta, Bâlâ theihthaipa Mâtâ cha maisâh thaby liata thie ei ta.

¹⁸ Chatawhcha Zehôdâ ta theihthaipazy nata Livai pathlazy chhihthana ry liata Abeipa o vaituhpazy rao ta. Âmo cha Mawsi ryhpa châbu liata ropa hawhta, Abeipa lâta raopa hlânazy hlâ awpa ta, Dâvi ta Abeipa o mohôhtuhpa ta a raopazy châ ei ta, Dâvi biepiepa hawhta, cha rai cha thaphapa nata hlasana chôta a hria awpazy ama châ.

¹⁹ Zehôdâ ta pathaih leina kheihawhpa rai a hneipazy ta Abeipa o lâ amâ ngia lei nawpa ta, Abeipa o chhikao vaituhpazy soh ta.

²⁰ Theihthaipa ta pheisaih za kha hyutuhpazy, nôpawpazy, zawpi a vaotuhpazy nata râh chyhsa zydua a chhi ta, abei cha Abeipa o tawhta a zâ chhi ei ta, machhua chhikao siepahliepa ta abei o lâ pangai ei ta. Abei cha ryureina beidyuchhai liata patyu ei ta.

²¹ Chatanachata a râh chyhsa zydua cha a ly ngaita ei ta, zaozi ta Athaliah thiepa a châ tawhta, khihpi cha sidia ha ta.