2 THÂTIHZYRONA 21 - Mara Bible RV (BSI)

Zudâh bei Zehôrâ

¹ Zehôsaphâ cha a pathlatuhpazy hnohta a mô ta, a pathlatuhpazy hnohta Dâvi khihpi liata pabu ei ta, a sawchapawpa Zehôrâ ta ano su liata â bei.

² Zehôsaphâ sawchapawpa Zehôrâ cha unawhzy hnei ta, chazy cha Azariah, Zehie, Zekariah, Azariah, Mikaila nata Sephatiah zy ama châ. Ama zydua heta Zudâh bei Zehôsaphâ sawchapawpa ama châ khai.

³ Ama paw Zehôsaphâ ta a sawchapawzy cha hmosaipa rônah ngaitapa, tâkâ, ngôh, hmo sôhpa nata Zudâh râh liata thokhy hneipa khihpizy pie chyu ta, khinarâh deikua cha Zehôrâ a pie. Zehôrâ cha sawchapaw uhtheipa a châpa vâta, khinarâh piepa a châ.

⁴ Zehôrâ cha a paw beidyuchhai liata a tyuh ta, â beina â i nahta, a unawh zydua cha zaozi ta thie ta, Izarei pawhrâhpa hluhpi chhao thie ta.

⁵ Zehôrâ cha kô sythôh nata kô no a châ nota a bei pathao ta, Zerusale liata kô charie â bei.

⁶ Ahabâ sawchanô lapinô ta a hneipa vâta, Ahabâ chhôhkha taozie hawhta, Izarei beizy lâpi a chhi hrapa ta, Abeipa mohmô liata hmo pha lei ngaitapa tao ta.

⁷ Chatahrasala Abeipa ta Dâvi hnohta bie a vaw hrai hapa vâta nata ano nata a pathlazy taihta chhâzaw châta meiôh pie awpa ta bie â vaw taih hapa vâta, Abeipa ta Dâvi pathla cha pahleipadia khoh vei.

⁸ Ano â beina daihti liata Edômâ ta Zudâh ryureina cha a dyuh ta, ano eih ta bei a tao ei ta.

⁹ Zehôrâ cha a pheisaih hyutuhpazy nata a talailih zydua chhaota Edômâ mo cha siehnao ta. Zâ ta thyu ta, ano nata a talailih pheisaih hyutuhpazy a chadôpa Edômâ mo cha thie lymâ ta.

¹⁰ Chatanachata Edômâ cha tanoh taihta Zudâh â dyuh ngâ thlâh haw. Zehôrâ cha Abeipa, a pathlatuhpazy Khazohpa â heihsaipa vâta, cha daihti liata, Libnâ khihpi chhao ta a ryureina â dyuh ha hra.

¹¹ Cha dei châ vei, Zudâh tlâh râh liata su sâhpazy tao ta, Zerusale khihsawzy sihryhna lâ a chhipa ta, Zudâh­ cha lâpi paviasa ta.

¹² Hrohsopa Elaizâh tawhta ano lâ châpaphaopa vaw tlô ta, a hnohta, “Châ pathlatuhpa Dâvi Khazohpa Abeipa ta hetana heta a tah, ‘Na paw Zehôsaphâ lâpizy a chhih leipa chi ta, Zudâh bei Âsâ lâpizy chhao a chhih leipa chi ta,

¹³ Izarei maw lâ beizy lâpi tlao a chhih chi ta, Ahabâ chhôhkha ta Izarei maw lâ râh sihryhna lâ amâ chhipa hawhta, Zudâh râhsaw nata Zerusale khihsawzy sihryh awpa ta reipasao chi ta, nâma hlâta a pha viapa na paw pathla na unawhzy na thiepa vâta,

¹⁴ pachâ teh, Abeipa ta na chyhsazy, na sawzy, na lapinôzy nata na hneipa zydua chô liata potlana rarôh ypa a vaw patlôsa aw.

¹⁵ Nâma tlai chhao, chhôh lâta pochhina ta thata pasa aw chi ta, na rihzy a tla khaina taihta noh kha noh kha ta na pasa via lymâ aw,’” tah ta.

¹⁶ Chatanachata Zehôrâ a dyuh awpa ta, Abeipa ta Kusi mo chheipâh liata a ypa Philistinâ mo nata Arabia mo palôh pathyu ta.

¹⁷ Zudâh kaw siehnaopa ta chho ei ta, abei o liata hmo zydua la ei ta, a sawchapawzy nata a lapinôzy chhao amâ chhi khai haw. A sawchapaw seihnaipa Zehôahâ tah leipa ta cha pakha hmah pahlôh leipa ta amâ chhi khai haw.

¹⁸ Cha hmo zydua a tlô khai tawhta, Abeipa ta Zehôrâ cha tlâh thei leipa chhôh pasana ta hrie ta.

¹⁹ Pochhih lymâ ta, kô no po a chhi khai tawhta, a pasana vâta a rihzy tla ta, riethei ngaitapa ta thi ha ta. A chyhsazy ta ano zana mei a paw châta ama patipa hawhta patipa veih ei.

²⁰ Zehôrâ cha â bei pathao nota kô sythôh nata kô nopa châ ta, Zerusale liata kô charie a bei ta, a thipa a pasaih leipa y veih ei. Dâvi khihpi liata pabu ei ta, abeizy thlâ su liata deikua châ vei.