2 THÂTIHZYRONA 20 - Mara Bible RV (BSI)

Zehôsaphâ thlahchhâna

¹ Cha hnôhlâ ta Môabâ mo nata Amawna mo cha Muni mo thokhazy chhaota Zehôsaphâ a dyuh awpa ta vaw pua ei ta.

² Ahyzy tlyma a vy ei ta, cha kyh cha Zehôsaphâ chho ei ta, a hnohta, “Châ dyuh awpa ta pheisaih hluh ngaitapa tilaipi haosâ Aramia tawhta vaw pua ei ta, pachâ teh, Hâzazôtamâ liata ama y,” tah ei ta. Hâzazôtamâ cha Enkedi a châ.

³ Zehôsaphâ cha chi ngaita ta, Abeipa tluana lâta a hmia pahei ta, Zudâh râh zydua kâhvileipa ta y awpa ta phuah ta.

⁴ Zudâh pathlazy cha Abeipa baona hiah awpa ta a hmaohpakhy ei ta. Abeipa tlua awpa ta Zudâh khihpi to tawhta vaw tlô ei ta.

⁵ Zehôsaphâ cha Abeipa o dôhpachhôh tlyhmia thiehpa liata Zudâh nata Zerusale zawpi ahmaohpakhypazy hmiakô liata a duah ta,

⁶ “Hy Abeipa, miah pathlatuhpazy Khazohpa y, nâ cha vârâh liata Khazohpa châ va chi ma? Phopi to khinarâh chô liata ryureih chi ta, na ku liata hmotaotheina nata thatlôna y ta, ahy hmahta cha pakhâ thei veih ei.

⁷ Hy eima Khazohpa y, he râh liata a pahrâpazy he, na phopi Izarei hmiakô liata papua chi ta, râh cha na viasa Abarahâ pathlazy hnohta chhâzaw châta na piepa châ vei ma?

⁸ He râh liata pahrâ ei ta, he liata na moh châta supathaihpa padua ei ta,

⁹ ‘Eima chô liata chhiena, zaozi ta pachiana tlyma, potlana tlyma, chakâhna tlyma a vaw tlô khiahta cha, he o he na moh yna o a châpa vâta, he o hmiakô liata nata na hmiakô liata a duah aw pi ta, eima nôpona liata cha pado aw pi ta, miah thei aw chi ta, miah na pachha aw.

¹⁰ Tahmâ he moh tua, Izarei sawzy Izi râh tawhta ama kaw pua nota a dyuh awpa na pasai leipa vâta chahrih ei ta ama pahleipadia leipa Amawna mo, Môabâ mo nata Seirâ Tlâh mozy ta

¹¹ eima chô liata ama taopa he moh tua. Eima ryuto râh châta miah na piepa na râh tawhta miah papua awpa ta ama vaw pua.

¹² Hy eima Khazohpa y, âmo cha pachia aw va chi ma? Miah a vaw siehnaopa pheisaih hri hluh ngaitapa he a dyuh awpa ta tloh ma pi. Tao awpa chhao pahno ma pi. Chavâta eima mozy nâ lâta eima vaw khaih hih,’” tah ta.

¹³ Zudâh pathla zydua cha ama hawti chyhpatazy, ama lapinôzy nata ama sawzy chhaota Abeipa hmiakô liata a duah ei ta.

¹⁴ Zawpi ahmaohna liana chata Abeipa Thlahpa cha Zahâzie chô liata vaw tlô ta. Zahâzie cha Zekaria sawchapawpa châ ta, Zekaria cha Benai sawchapawpa châ ta, Benai cha Zeili saw­chapawpa châ ta, Zeili cha Asâpha pathla, Livai chyhsa Mâtaniah sawchapawpa a châ.

¹⁵ Zahâzie ta, “Nâmo, Zudâh râhsaw zydua nata Zerusale khihsaw zydua nata Bei Zehôsaphâ y, nathlie teh u. Abeipa ta nama hnohta, ‘Chi leipa u la, pheisaih hri hluh ngaitapazy vâta ngiarohpa ta y hra khuh vy. Adyuhna cha nâmo adyuhna châ leipa ta Khazohpa adyuhna a châ.

¹⁶ Mylâ zâ dyuh teh u. Ziza chakhâ lâta a khy aw ei ta, Zerua râhchawhpa nochhi lâta saikao chhâna liata nama za hmô aw.

¹⁷ He adyuhna he nâmo a dyuh awpa byuh aw vei. Namâ duana liata â ipa ta a duah u la, Hy Zudâh mo nata Zerusale mo saih u, nâmo vyuhpa ta Abeipa pachhana cha moh teh u,’ a tah. Chavâta chi leipa u la, a ngiaroh hra khuh vy. A dyuh awpa ta mylâ pua teh u. Abeipa nama hnohta a y aw,” tah ta.

¹⁸ Zehôsaphâ cha a hmia alei lâ a khupa ta a bôh ta, Zudâh mo zydua nata Zerusale khihsaw zydua Abeipa hmiakô liata pao ei ta, Abeipa cha a chhy ei ta.

¹⁹ Livai chi Kôhâ nata Kôrâ pathlazy a vaw duah ei ta, ao paro ngaitapa ta Abeipa, Izarei Khazohpa reithai ei ta.

²⁰ A mylâ mydi kari ta thyu ei ta, Tekô râhchawhpa lâ sie ei ta. Ama sie hai nota, Zehôsaphâ cha a duah ta, “Hy Zudâh pathla nata Zerusale khihsawzy saih u, na nathlie teh u! Abeipa nama Khazohpa cha zo u la, â ipa ta namâ duah thei aw. A hrohsopazy zo u la, nama hlao a tloh aw,” tah ta.

²¹ Zawpi a pasyu khai nahta, pheisaihzy hmia lâta siepa ta, Abeipa lâta hla sa ta, “Abeipa hnohta alyna bie reih teh u, A zawngiahna chhâzaw ta y tlôh ta,” tahpa ta, Abeipa pathaihna rônahzie a reithai awpazy a rao ei.

²² Reithaina hla ama sa pathaopa nahta, Abeipa ta Zudâh a dyuh awpa ta a vaw puapa Amawna mo, Mô­abâ mo nata Seirâ Tlâh mo a byh awpazy soh ta, âmo cha ama pahnie haw.

²³ Amawna mo nata Môabâ mo ta Seirâ Tlâh liata a pahrâpazy cha pahleipadia khai a chhuah ei ta, Seirâ mo ama pamua khai nahta, âmo nata âmo a pahleipadia a chhuahpa ta amâ dyuh lymâ.

Abeipa ta Zudâh a pachha

²⁴ Zudâh pheisaihzy ta râhchawhpa saina su sâhpa ama tlô nahta, pheisaih hrizy kei sai ei ta, athihpa ri hluhpi alei liata a zawhpa hmô ei ta, a râpa pakha hmah y veih ei.

²⁵ Zehôsaphâ nata a pheisaihzy cha hraona sôh la awpa ta vawh ei ta. Chhaichhizy, chysiazy nata hmo sôhpa hluhpi athihpa rizy hry liata hmô ei ta, ama phao thei leina taihta la ei ta. Hraona sôh a hluh ngaitapa vâta, noh thôh chhôh tlai ama paly.

²⁶ A noh palihna liata Berâkâh Saikao liata a hmaoh ei ta, cha liata Abeipa ama palyupalih. Chavâta cha su moh cha tanoh taihta Berâkâh Saikao tahpa a châ.

²⁷ Chatanachata Zudâh nata Zerusale chyhsa zydua cha, Zehôsaphâ chhihthana ry liata thapha ngaitapa ta Zerusale lâ a lie ei ta. Ama chariahzy kyh liata Abeipa ta thapha ngaitapa ta a paysa ha ei.

²⁸ Tlaipih nata totâ nata chiahmie pyuzy chhaota Zerusale liata Abeipa o kei tlô ei ta.

²⁹ Abeipa ta Izarei chariahzy â dyuh tahpa ama thei nahta, alei chô liata khinarâh zydua Khazohpa china ta patu khai ha ta.

³⁰ Zehôsaphâ cha Khazohpa ta a chheipâh râh zydua tawhta apahâna a piepa vâta, a khinarâh cha sidiapa ta y ta.

Zehôsaphâ â bei chhâna

³¹ Cha hawhna chata Zehôsaphâ cha Zudâh râh liata a bei ta. Kô sythôh nata kô pangawhpa a châ nota a bei pathao ta, Zerusale liata kô kih nata kô pangawh â bei. A nô moh cha Azubâ châ ta, Sihi sawchanô a châ.

³² A paw Âsâ lâpi a chhihpa zydua a chhih hra ta. Lâpi tleisai cheita leipa ta, Abeipa mohmô liata hmo dopa tao ta.

³³ Su sâhpazy deikua cha paraopa châ leipa ta, Izarei phopi ta ama pathlatuhpazy Khazohpa chô liata ama palôh soh khai veih ei.

³⁴ Zehôsaphâ thâtih hropazy cha, âthaona tawhta achhâna taihta, Hânani sawchapawpa Zehu châbu liata ropa châ ta, chazy cha Izarei beizy thâtih rona châbu liata ropa a châ.

³⁵ Cha hnôhlâ ta Zudâh bei Zehôsaphâ cha Izarei bei Ahazia a pazao ta. Ahazia cha molei ngaitapa ta hmo a tao tyhpa a châ.

³⁶ Tâsi lâ a sie awpa balyh hmaohkha ta sei ei ta. Balyhzy cha Eziôkebe liata sei ei ta.

³⁷ Mâresâ chyhsa Dôdavâhu sawchapawpa Elieze ta Zehôsaphâ chakhiapa ta hrohsona bie phuah ta, a hnohta, “Ahazia nâ pazaopa vâta, Abeipa ta na hmotaopazy a parao aw,” tah ta. Chatanachata balyhzy cha rao khai ei ta, Tâsi lâ sie thei khao veih ei.