2 THÂTIHZYRONA 2 - Mara Bible RV (BSI)

Achhyna o sana patohpatiana

¹ Sawlawmaw ta Abeipa moh châta Achhyna o nata abei o sa a chhuah ta.

² Hmo a phaoh awpa chyhsa 70,000, tlâh liata alô a khai awpa 80,000 nata âmo a mohôh awpa 3,600 rao ta.

³ Sawlawmaw ta Tyre bei Hirâ lâ chyhsa tuah ta, a hnohta, “Ei paw Dâvi chô liata hmo pha tao chi ta, a pahrâ nawpa o sa nawpa ta sidy thozy, na vaw paphaopa hawhna khata, kei chhao na taopa hra mah y.

⁴ Pachâ teh, Abeipa ei Khazohpa moh châta o sa awpa ei chhuah. Cha o cha Zehôvâh Khazohpa hmiakô liata ropahâhpa rao nawpa châta zy, viahchhâ chaluahpa so tyh nawpa châta zy, Izarei châta chhâzaw châta raopa Pahânoh, thla thiehpa nata Abeipa eima Khazohpa kyhchhi nohzy liata, my nata zâ ta raopa hlânazy hlâ nawpa châta a châ.

⁵ Keimo Khazohpa cha khazoh zydua hlâta rônah chaipa a châpa vâta, o ei sa awpa chhao o rônah ngaitapa a châ aw.

⁶ Châhrasala Zehôvâh Khazohpa cha avâ liata â tlôh leipa ta, avâ a sâh chaipa liata chhao â tlôh leipa châ tlôh ta, ahy ma a y nawpa o a sapa thei aw? A hmiakô liata atheihna hlâna rao nawpa châta tah leipa ta cha, kei bao hra heta o cha ei sapa thei aw ma?

⁷ Chavâta ei paw Dâvi ta Zudâh râh nata Zerusale liata zôthaipa a vaw hmâ tyhpa, tahmâ ta ei hnohta a ypazy nata hmaohkha ta hria awpa ta, ngôh, tâkâ, dawh nata thua rai a hria thaipa, poh saihdôhpa, saihlawpa nata nohpa a tao thaipa nata tho khie thaipa zôthaipa chyhsa pakha na za tuapa mah y.

⁸ Na chyhsazy cha Lebanaw thozy ama thlu thai kaw tahpa pahno na ta, chavâta Lebanaw sidy thozy, meisah thozy, alaku thozy chhao na vaw paphao mah y. Ei chyhsazy ta na chyhsazy cha ama kaw hriakhei aw.

⁹ O ei sa awpa he o rônahpa nata noâhchhihpa a châ awpa vâta, tho hluhpi patohpatia awpa â ngiah.

¹⁰ Na chyhsa tho thlutuhpazy cha âtâ viahdie bai 20,000, bâli sâh bai 20,000, kresawhti rahô 20,000 nata sathaw rahô 20,000 ei pie aw ei,” tah ta.

¹¹ Tyre bei Hirâ ta châpaphaopa ta Sawlawmaw cha a chhy ta, a hnohta, “Abeipa ta a phopi kyh a pachâ vâta, nâ cha ama chô liata bei ta y awpa ta a cha tao,” tah ta.

¹² Hirâ ta reih lymâ ta, “Avâ nata alei a taotuhpa Izarei Khazohpa Zehôvâh cha reithaipa ta y sala, Zehôvâh Achhyna o nata abei o sa awpa ta patohpatia thaina nata novâhna a hneipa sawchapaw so ngaitapa Dâvi hnohta a pietuhpa cha reithaipa ta y mawh sy.

¹³ “Chavâta tahmâ chyhsa novâhpa nata zôthaipa Hurâmabi nâ lâ ei vaw tuah.

¹⁴ A nô cha Dânâ zuah châ ta, a paw deikua cha Tyre khihpa a châ. Ngôh, tâkâ, dawh, thua, alô, poh saihdôhpa, nohpa, saihlawpa nata pala rih dipa zy a hria thaipa châ ta, hmo to a khie thaipa nata a tao thaipa a châ. Na chyhsa zôthaipazy nata ei zibeipa, na paw Dâvi zôthaipazy hry liata a hria hra aw.

¹⁵ Chavâta ei zibeipa reipa âtâ sâh, bâli sâh, sathaw nata kresawhti zy cha, ei zibeipa ta a chakaotuhpazy lâ kaw paphao mawh sy.

¹⁶ Lebanaw tawhta tho cha nâ ngiahpa hawhta vaw thlu aw pi ta, tilaipi lâta Zôpâ taihta apâzy ta vaw siekhei aw pi ta, nâ ta Zerusale lâ na paly aw,” tah ta.

¹⁷ Sawlawmaw ta Izarei râh liata a paw Dâvi ta ama maluh a vaw reipa chihropa chyhsa zydua ama maluh reih ta, ama zydua ta 153,600 ama châ.

¹⁸ Hmo phaoh awpa ta chyhsa 70,000 rao ta, alô khai awpa 80,000 rao ta, zawpi raihria mokhei awpa ta 3,600 a rao ei.