2 THÂTIHZYRONA 19 - Mara Bible RV (BSI)

Zehôsaphâ ta paduapathina rai a hria

¹ Zudâh bei Zehôsaphâ cha â bohpa ta Zerusale liata a o a tlô nahta,

² Hânani sawchapawpa hrohsopa Zehu cha ano dy awpa ta pua ta. Bei Zehôsaphâ hnohta, “Moleipa a châhkhei aw chi ta ma, Abeipa a haotuhpazy kyh na pachâ aw? Chavâta na chô liata Abeipa pathiiana a vaw tlô haw.

³ Chatahrasala Aseri tôhzy râh tawhta pahleipadia chi ta, Abeipa tluana lâta na palôh na paheipa vâta, phana khazie rakha ma cha na hnei,” tah ta.

⁴ Zehôsaphâ cha Zerusale liata pahrâ ta. A chyhsazy tly awpa ta pua ta, Besebâ tawhta Epharai tlâh râh taihta chahryh ta. A chyhsazy cha Abeipa, ama pathlatuhpazy Khazohpa lâ a chhi heih ta.

⁵ Zudâh râh liata thokhy hneipa khihpi to liata ryureituhpazy rao ta.

⁶ Ryureituhpazy hnohta, “Nama hmotaopazy pakhâta ta pachâ u la, tao tyh muh vy. Chyhsapa châta ryu a reihpa châ leipa ei chi ta, Abeipa châta ryu a reihpa nama châ. Ryureina liata Abeipa nama hnohta â hlao lymâ.

⁷ Abeipa eima Khazohpa liata cha adoleina, khokhei viapa hneina nata panaopapana lapazy y vei. Chavâta Abeipa chi u la, hmo nama taopazy liata a sohsi ngaita muh vy,” tah ta.

⁸ Cha dei châ vei, Zehôsaphâ ta Zerusale khihpi liata Abeipa châta pachiana tao awpa nata biepeipazy paryh awpa ta Livai pathlazy nata theihthaipazy nata Izarei chhôhkha pawhrâhpazy rao ta.

⁹ Ama hnohta, “Abeipa china chôta, ngâchhihpa nata pathipalôh tlokhuh ta ryu nama reih awpa a châ.

¹⁰ Khihpizy liata a ypa nama chiheihzy ta thisaih palona kyh liata tlyma, ryhpa kyh liata tlyma, biepiepa kyh liata tlyma, bieraopa kyh liata tlyma, pachiana kyh liata tlyma, nama hnohta biepeipa ama vaw tlôkhei tita, Abeipa hmiakô liata thaileichâpa ta ama y lei nawpa nata nâmo nata nama chiheihzy chô liata Khazohpa pathiiana a vaw tlô lei nawpa ta, zikyu namâ râ awpa a châ. Cha hawhta tao u la, thailei châ aw veih ei chi.

¹¹ Nathlie teh u, Abeipa kyh zydua liata, theihthai beipa Amaria cha nama hyutuhpa châ ta; abei kyh zydua liata, Zudâh chi hyutuhpa Ismela sawchapawpa Zebadiah cha hyutuhpa châ ta; Livai pathlazy chhao nama hyutuhpa châpa ta ama cha chakao aw. Riahphapa ta hria u la, Abeipa cha chyhsa phapazy hnohta y mawh sy!” tah ta.