2 THÂTIHZYRONA 18 - Mara Bible RV (BSI)

Hrohsopa Mikai ta Ahabâ zikyu â râ

¹ Zehôsaphâ cha thata vaw hneirôh ta, palyupalihna chhao thata hlao ta. Nôvah ahneina lâ tawhta Ahabâ nata azaokhina tao ta.

² Kô khazie tlyma a châ tawhta, Samâri liata a ypa Ahabâ za tly ta. Ahabâ ta ano nata a sahlaozy cha mietaku nata viahchao tôhpa hluhpi thiepa ta, Ramôkilia khihpi a dyuh awpa ta reipasao ta.

³ Izarei maw lâ râh bei Ahabâ ta Zudâh bei Zehôsaphâ hnohta, “Ramôkilia khihpi a dyuh awpa ta ei hnohta na kaw sie hra aw ma?” tah ta. Zehôsaphâ ta, “Nâ nata kei cha miakhapa châ pi ta, na chyhsazy nata ei chyhsazy chhao miakhapa ama châ. Adyuhna lâ cha na hnohta eima sie hra aw,” tah ta.

⁴ Zehôsaphâ ta Izarei bei hnohta, “Abeipa bie a saohiah ha tua mah y,” tah ta.

⁵ Izarei bei ta hrohsopa za palih awpakhy ta, ama hnohta, “Ramôkilia khihpi a dyuh awpa ta eima sie aw ma, ei chalih aw?” tah ta. Âmo ta, “A kaw dyuh teh, Khazohpa ta abei ku liata a pie aw,” tah ei ta,

⁶ Châhrasala Zehôsaphâ ta, “He liana heta Abeipa hrohsopa hropa pakha chhâ eimâ saohiah via awpa y khao veih ei ma?” tah ta.

⁷ Izarei bei ta Zehôsaphâ hnohta, “Abeipa miah a saohiahpa awpa chyhsa pakha cha y ta, ano cha Imlâ sawchapawpa Mikai a châ. Châhrasala ano la ei hao kaw. Keima kyh liata a phana lâta hrohsona bie reih beih vei, a chhiena lâ sai ta khâ a reih tyhpa a châ,” tah ta. Zehôsaphâ ta, “Abei ta cha hawhta tah khah sy,” tah ta.

⁸ Izarei bei ta beimachâ pakha aw ta, a hnohta, “Imlâ sawchapawpa Mikai kha kei aw para teh,” tah ta.

⁹ Izarei bei nata Zudâh bei Zehôsaphâ cha Samâri thokhy chhikao kiapâh sawhri liata abei poh a bupa ta, ama beidyuchhai chyu liata a tyuh ei ta. Hrohsopa zydua ta ama hmiakô liata hrohsona bie phuah ei ta.

¹⁰ Kenânâ sawchapawpa Zedekia ta thua kizy a tao ta, abei hnohta, “Abeipa ta hetana heta a tah, ‘Hezy hmâpa heta Aramia mo cha ama leidia khaina taihta na daih aw ei,’” tah ta.

¹¹ Hrohsopa hropa zydua chhao ta, “Ramôkilia lâ cha khy la kaw pahnie teh, Abeipa ta Ramôkilia cha abei ku liata a pie aw,” tahpa ta hrohsona bie phuah hra ei ta.

¹² Mikai aw awpa ta lyuhchâpa ama tuapa ta Mikai hnohta, “Pachâ teh, hrohsopazy ta reih kha tlapa ta abei khozie ta bie reih khai ei ta, nâma bie chhao âmo bie nata palyupa ta, abei khozie ta kei reih hra mah y,” tah ta.

¹³ Mikai ta, “Abeipa hrona reipa ta ei reih, ei Khazohpa ta a reipa deita ei reih aw,” tah ta.

¹⁴ Abei kô a tlô nahta, abei ta a hnohta, “Mikai, Ramô­kilia a dyuh awpa ta eima sie aw ma, ei chalih aw?” tah ta. Mikai ta, “Khy u la, kaw pahnie teh u, âmo cha nama ku liata piepa a châ aw,” tah ta.

¹⁵ Abei ta a hnohta, “Abeipa moh ta biehmeiseihpa reipa dei leipa ta cha, ei hnohta khâpa bie hmah rei lei awpa ta ei khazie ma bie ei cha pataihsa aw?” tah ta.

¹⁶ Mikai ta, “Izarei zydua cha vaituhpa a hnei leipa mietakuzy hawhta, tlâhzy liata viavipa ta ama ypa hmô na ta, Abeipa ta, ‘He sahlaozy he hyutuhpa hnei khao veih ei, chyhsa to ama o chyu lâta thlalôhpa ta a di mawh ei sy,’ a tah,” tah ta.

¹⁷ Izarei bei ta Zehôsaphâ hnohta, “Keima kyh liata la a phana lâta hrohsona bie reih awh vei, a chhiena lâ sai na a châ aw tahpa cha chho va na ma kha?” tah ta.

¹⁸ Mikai ta, “Chavâta Abeipa bie he nathlie teh: Abeipa cha a beidyuchhai liata â tyupa hmô na ta, vâmo zydua ta a chavei chachâh ta amâ duapa ei hmô.

¹⁹ Abeipa ta, ‘Izarei bei Ahabâ cha Ramôkilia lâ pakhysa ta, cha liata pao awpa ta ahy ma a reipasao aw?’ tah ta. Pakha ta hmo miakha reih ta, ahropa ta hmo hropa reih ta.

²⁰ Chatawhcha thlahpa pakha vaw pua ta, Abeipa hmiakô liata a duah ta, ‘Kei ta ei reipasao aw,’ tah ta. Abeipa ta a hnohta, ‘Khâpa ta maw?’ tah ta.

²¹ Thlahpa chata, ‘Vawh aw na ta, a hrohsopa zydua pakah liata thlahpa haih thaipa ei kei châ aw,’ tah ta. Abeipa ta, ‘Kei reipasao aw chi ta, na pahnie aw. Vawh la, cha hawhna chata kei tao teh,’ tah ta.

²² Chavâta tahmâ he pachâ tua, Abeipa ta na hrohsopazy pakah liata thlahpa haih thaipa soh ta. Abeipa ta na rao nawpa kyh a phuah haw,” tah ta.

²³ Cha khaipa nahta, Kenânâ saw­chapawpa Zedekia ta a kei hnia ta, Mikai baih liata kei chabaih ta, a hnohta, “Kei tawhta Thlahpa pua ta, na hnohta bie reih awpa ta â vy nona cha, kheihawhpa lâpi ma â vaw chhih?” tah ta.

²⁴ Mikai ta, “Pachâ teh, chhôhpadâhpa chhôh chaipa liata a nyu awpa ta nâ ngia noh ta na pahno aw,” tah ta.

²⁵ Izarei bei ta, “Mikai he patu u la, khihpi ryureituhpa Amawna nata bei sawchapawpa Zôasâ lâ a chhi pakhua u la,

²⁶ ama hnohta, ‘Abei ta hetana heta a tah, he chyhsa he patâhna o liata khô u la, thlalôhpa ta ei vaw kua heih hlâlei cha, viahchhâ chyhta nata ti chyhta dei nama pie aw,’ tahpa ta nama chho aw,” tah ta.

²⁷ Mikai ta, “Thlalôhpa ta na vaw kua heih khiahta cha, Abeipa ta keima hmâpa ta bie a rei leipa a châ aw,” tah ta. Mikai ta, “Nâmo, phopi zydua saih u, nathlie teh u,” tah ta.

Ahabâ nawhna nata thina

²⁸ Chatanachata Izarei bei nata Zudâh bei Zehôsaphâ cha Ramôkilia khihpi lâ khy ei ta.

²⁹ Izarei bei ta Zehôsaphâ hnohta, “Chysia nanopa a tobipa ta ei lânazie panano aw na ta, adyuhna lâ cha ei sie hra aw. Nâ deikua cha abei poh a bu mah y,” tah ta. Chatanachata Izarei bei cha â lânazie panano ta, adyuhna lâ cha sie ei ta.

³⁰ Aramia bei ta a talailih pheisaih hyutuhpazy hnohta, “Mochyhpa tlyma, molaipa tlyma, a dyuh leipa u la, Izarei bei deita a dyuh muh vy,” tahpa ta biepie ta.

³¹ Talailih pheisaih hyutuhpazy ta Zehôsaphâ ama hmôpata nahta, “Izarei bei a châ huh,” tah ei ta. Ano cha a heihnaopa ta a dyuh ei ta. Zehôsaphâ cha awh ta, Abeipa ta bao ta, a chadaituhpazy cha Khazohpa ta a pakuasa ha ei.

³² Talailih pheisaih hyutuhpazy ta Izarei bei châ vei tahpa ama pahno nahta, Zehôsaphâ ama chadaipa cha kuasai ha ei ta.

³³ Châhrasala chyhsa pakha ta â chhuahpa vâta châ leipa ta, a libaw a kei ta a ka chakhyhna liata, Izarei bei cha a chariah chhaichhi nata a chachôhna vyhphao likawh liata kei ka ta. Izarei bei ta a talailih haohtuhpa hnohta, “A lie la, adyuhna tawhna heta na puakhei teh, hmah ei phaoh haw,” tah ta.

³⁴ Cha noh ta adyuhna cha ru via lymâ ta. Izarei bei cha deichaka ei ta, Aramia mo lâ a heihpa ta a talailih liata zâlâ taih a duah ta. Noh a tla nahta thi ha ta.