2 THÂTIHZYRONA 15 - Mara Bible RV (BSI)

Âsâ taopathipazy

¹ Ôdedâ sawchapawpa Azariah chô liata Khazohpa Thlahpa vaw tlo ta.

² Âsâ dy awpa ta pua ta, a hnohta, “Asâ nata Zudâh nata Benzami pathla zydua saih u, na nathlie teh u: Ano chhâh namâ châh chhôh zydua cha, Abeipa chhao ta nama chhâh a châ ta, ano nama tlua khiahta cha, hmô aw ei chi ta, ano namâ heihsai khiahta cha, ano chhao ta a châ heihsai aw ei.

³ Bohpi chhôh Izarei cha Khazoh hmeiseihpa hnei leipa ta y ta, pachutuhpa theihthaipa nata ryhpa zy hnei leipa ta a y.

⁴ Châhrasala ama nô vaw po ta, Abeipa, Izarei Khazohpa lâ a heipa ta ano cha ama tlua nahta, Abeipa ta âmo cha vaw hmô ta.

⁵ Cha daihtizy liata, râh liata a pahrâpazy chô liata tymâna thata a tlôpa vâta, khô pua awpa nata o a di awpa chhao thlalôhna hnei khao veih ei.

⁶ Ama keichheih khai haw. Khazohpa ta tymâna to ama chô liata a patlôsapa vâta, phopi miakha cha phopi hropa ta parao ta, khihpi miakha ta khihpi hropa a parao.

⁷ Châhrasala nâmo la thatlôpa ta y u la, nama ku tha pachhâ khuh vy. Nama hmotaopa lymâ nama hmô aw,” tah ta.

⁸ Ôdedâ sawchapawpa Azariah biereipazy cha Âsâ ta a thei nahta, a riah a papha ta. Nothlahpa pasichhihpazy cha Zudâh nata Benzami râh zydua nata Epharai tlâh râh khihpi a lapazy tawhta pahlei khai ta. Abeipa o aikah liata Abeipa maisâh padua pathi ta.

⁹ Zudâh nata Benzami pathla zydua nata ama hnohta khih a sa hrapa Epharai nata Manase nata Simeôna pathlazy awpakhy ta. Zehôvâh Khazohpa a hnohta a y tahpa ama hmô nahta, Izarei maw lâ râh tawhta chyhsa hluhpi ano lâ a bai ei ta.

¹⁰ Âsâ ko hrawh hleipangawh â bei kô, a thla thôhna liata Zerusale liata a hmaohpakhy ei ta.

¹¹ Cha noh ta, hraona sôh ama vaw phaopa tawhta viahchao tôhpa 700 nata mietaku 7,000 ta Abeipa lâ atheihna hlâ ei ta.

¹² Ama pathipalôh nata ama thlahpa tlokhuh ta ama pathlatuhpazy Khazohpa Abeipa tlua awpa ta biehrai tao ei ta.

¹³ Ahy rai Abeipa, Izarei Khazohpa a tlua leipa cha, hawti machâ, chanô chapaw, thie awpa ta biehrai ama tao.

¹⁴ Chiahmiezy nata mietaku tôhpa kizy tôpa ta, ao paro ngaitapa ta thata awhpa ta, Abeipa hnohta bie a taih ei ta.

¹⁵ Ama pathipalôh hmeiseihpa ta bie a taih ei ta, Abeipa cha khopasa ngaitapa ta ama tluapa vâta, Abeipa ta âmo cha hmô ta, su to liata apahâna a piepa vâ ei ta, ama bietai liata amâ ly ngaita.

¹⁶ A nô Mâkâ tlai chhao, khazoh nothlahpa pasichhihpa Aseri tôh a taopa vâta, beinô a châna tawhta pabâh ta, a nô khazoh nothlahpa cha chhawh pachhô ta, pazao khai ta, Kidaraw vahtiepa liata mei ta a rao haw.

¹⁷ Su sâhpazy deikua cha, Izarei râh tawhta pahlei vei. Chatahrasala Âsâ cha â bei chhôh zydua ta palôh dopa a phaohpa a châ.

¹⁸ A paw hmohlâpa pathaihpazy nata ano hmohlâpa pathaihpa tâkâ, ngôh nata hmobaohzy cha Khazohpa o liata a ngiakhei ta.

¹⁹ Âsâ abeina kô sythôh nata kô pangawh chhôh cha adyuhna y vei.