2 THÂTIHZYRONA 14 - Mara Bible RV (BSI)Zudâh bei Âsâ ( 1 Abei 15.9-12 ) 1 Abizah cha a pathlatuhpazy hnohta a mô ta, Dâvi khihpi liata pabu ei ta, a sawchapawpa Âsâ ta ano su liata â bei. Ano â bei chhôh cha, râh chhao kô hrawh chhôh thlalôhpa ta a y. 2 Âsâ cha Abeipa a Khazohpa mohmô liata hmo phapa nata hmo dopa tao lymâ ta. 3 Râh hropa khazoh maisâhzy nata su sâhpazy pahleipadia ta, lôbôzy paraopa ta, Aseri tôhzy thlu ta. 4 Zudâh mo cha ama pathlatuhpazy Khazohpa Abeipa tlua awpa nata a ryhpa nata a biepiepa zyh awpa ta biepie ta. 5 Zudâh khihpi zydua liata su sâhpazy nata ropahâhpa raona maisâhzy pahlei khai ta. Ano â bei chhôh cha khinarâh chhao kô hrawh chhôh tlai thlalôhpa ta a y. 6 Râh cha thlalôhpa ta a ypa vâta, thokhy hneipa khihpizy Zudâh râh liata padua ta. Abeipa ta apahâna a piepa vâta, cha kôzy liata chariah a dyuhpa hnei vei. 7 Zudâh pathlazy hnohta, “Khihpizy he padua sih la, thokhyzy ta dôh sih la, o sâhpazy, thokhy chhikaozy, ahrainazy tao ei suh u. Abeipa eima Khazohpa eima tluapa vâta, râh he keimo eih châ lymâ ta, ano eima tluapa vâta, kaokih liata apahâna miah a pie ha hih,” tah ta. Chatanachata khihpizy padua ei ta, thlaochhipa ta ama y lymâ. 8 Âsâ cha vyhphao laipa nata asei a chabapa Zudâh pheisaih 300,000 hnei ta, vyhphao chabapa ta libaw a hmâhpa Benzami pheisaih 280,000 hnei hra ta, ama zydua ta pasaipha thatlôpa sai ama châ. 9 Kusi chyhsa Zerâ ta Âsâ nata a pheisaihzy a dyuh awpa ta, pheisaih thy za kha nata talailih 300 chhaota kaw pua ta, Mâresâ taih vaw tlô ta. 10 Âsâ cha Zerâ a dyuh awpa ta kei pua ta, Mâresâ liata Zephathâ saikao liata a kei paziah ei ta. 11 Âsâ cha Abeipa a Khazohpa pado ta, “Hy Abeipa, thatlôpa ku tawhta chiehleipa a pachha thei awpa cha, nâ leipa ta ahy hmah y veih ei. Hy Abeipa eima Khazohpa y, rie miah bao mah y. Nâma a ngâchhâpa ta, na moh ta he pheisaih hluh ngaitapa he eimâ vaw dyuh. Hy Abeipa y, nâ cha eima Khazohpa châ chi ta, chyhsapa ta cha pahnie khah sy,” tah ta. 12 Abeipa ta Âsâ nata Zudâh pheisaihzy hmiakô liata Kusi mo cha pahnie ta, Kusi mo cha amâ râpai haw. 13 Âsâ nata a pheisaih ta Kerâ taih a chadai ei ta, Kusi mo cha ahrohpa pakha hmah y leipa ta thie ei ta, Abeipa nata a pheisaihzy hmiakô liata panawhpa ta y ei ta, Zudâh pheisaihzy ta hraona hmo hluhpi ama siekhei haw. 14 Abeipa china ta chyhsazy chalyusa ta, Zudâh pheisaihzy ta Kerâ chheipâh liata khihpi zydua a dyuh ei ta, khihpi zydua hrao ei ta, hraona sôh hluhpi la ei ta. 15 Sahroh pasatuhpazy poh ozy parao ei ta, mietaku nata râraoseihpa hluhpi a chhipa ta, Zerusale lâ ama kua haw. |