2 THÂTIHZYRONA 13 - Mara Bible RV (BSI)

Zudâh bei Abizah

¹ Zerôbaw kô hrawh hleicharie â bei kô ta, Abizah cha Zudâh râh liata a bei pathao ta.

² Zerusale liata kô thôh a bei ta, a nô moh cha Kibia chyhsa Urie sawchanô Mikhai a châ. Abizah nata Zerôbaw likawh liata adyuhna vaw y ta.

³ Abizah cha pasaipha pheisaih atlyhpatluapa 400,000 chhaota adyuhna lâ sie ta. Zerôbaw ta pasaipha pheisaih atlyhpatluapa 800,000 paziahpa ta a vaw duakhâh ta.

⁴ Abizah cha Epharai tlâh râh liata Zemarai Tlâh liata a duah ta, “Hy Zerôbaw nata Izarei saw zydua saih u, vaw nathlie teh u!

⁵ Izarei bei châna cha Dâvi nata a sawchapawzy hnohta, Izarei Khazohpa Zehôvâh ta alôh ta biehraipa ta, chhâzaw châta a piepa a châ tahpa a pahnopa châ veih ei chi ma?

⁶ Chatanachôta Dâvi sawchapawpa Sawlawmaw chakaotuhpa Nebâ sawchapawpa Zerôbaw ta a zibeipa cha a chariah ta.

⁷ Chyhsa dyutlaileipa nata chhorupazy a hnohta a hmaoh ei ta, Sawlawmaw sawchapawpa Rehôbaw cha a dyuh ei ta. Rehôbaw cha palôh pachyu leipa hawtipa a châ chypa vâta, âmo cha pakhâ thei leipa ta.

⁸ “Tahmâ chhao he pheisaih hluh ngaita ei chi ta, Zerôbaw ta nama châta ngôh viahchaotaw khazoh nothlahpa a taopa nama hneipa vâta, Dâvi sawchapawzy ku liata Abeipa khinarâh cha toh thei namâ pangiasa.

⁹ Arawna pathla Abeipa theihthaipazy nata Livai pathlazy papuapa ta, râh hropazy liata phopizy taozie hawhta theihthaipazy namâ taopa châ vei ma? Viahchao tôh dawpa pô kha tlyma, mietaku tôhpa pô sari tlyma a vaw cheihpa maih cha, Khazoh hmeiseihpa a châ leipa khazohzy theihthaipa ta nama tao lymâ.

¹⁰ Keimo deikua la, Abeipa cha eima Khazohpa châ ta, ano cha tleisai ma pi. Abeipa châta chakaona rai hria awpa ta Arawna pathla theihthaipazy hnei pi ta, âmo chakaona rai chyu a hria awpa Livai pathlazy chhao eima hnei.

¹¹ Noh chareih nata zâ chareih ta Abeipa lâ raopa hlânazy nata ia-ô pahâhpa ropahâhpazy hlâ ei ta, ngôh suapa ta taopa tlâhkhai liata viahchhâ chaluahpazy soh tyh ei ta, zâ to ta a khaih thei nawpa ta meiôh patyuna nata a meiôhzy ama mohôh lymâ. Keimo la Abeipa eima Khazohpa biepiepa zyh pi ta, nâmo deikua la Abeipa nama tleisai haw.

¹² Pachâ teh u, eima hnohta y ta, keimo miah chhituhpa cha Khazohpa châ ta, a theihthaipazy ta ama chiahmiezy tô ei ta, nâmo a dyuh awpa ama pahrua. Hy Izarei sawzy saih u, Abeipa châ pathlatuhpazy Khazohpa cha a dyuh cheita khuh vy. Nama hlaotloh aw vei,” tah ta.

¹³ Châhrasala Zerôbaw ta Rehôbaw pheisaihzy cha ama hnôh lâ tawhta pua thlu awpa ta a pheisaihzy pabyhsa ta. Zerôbaw pheisaih thokha cha Zudâh pheisaihzy hmia lâta y ei ta, thokha ta Zudâh pheisaihzy cha ama hnôh lâ tawhta a byh ei ta.

¹⁴ Zudâh pheisaihzy cha a heih ei ta, ama hmia nata hnôh ta chariah ta ama chadô hapa hmô ei ta. Abeipa pado ei ta, theihthaipazy ta chiahmie tô ei ta.

¹⁵ Zudâh pheisaihzy cha chariah a dyuh awpa ta a pahô pahâhpa ta thata awh ei ta. Zudâh pheisaihzy ta thata ama awh nahta, Khazohpa ta Zerôbaw nata Izarei maw lâ pheisaih zydua cha Abizah nata Zudâh pheisaihzy hmiakô liata panawh ha ta.

¹⁶ Izarei maw lâ pheisaihzy cha Zudâh pheisaihzy hmiakô liata a râpai ei ta, Khazohpa ta Zudâh ku liata a pie ha ei.

¹⁷ Abizah nata a pheisaihzy ta Izarei maw lâ pheisaihzy cha thata thie ei ta, Izarei pheisaih atlyhpatluapa 500,000 thiepa ama châ.

¹⁸ Cha daihti liata Izarei maw lâ pheisaihzy cha panawhpa ta y ei ta, Zudâh pheisaihzy deikua cha, ama pathlatuhpazy Khazohpa Abeipa liata amâ pahniehpa vâta, pahniena patosapa ama châ.

¹⁹ Abizah ta Zerôbaw cha a chadai ta, a khihpizy la ta, Bethel nata a khichapeihzy, Zesanah nata a khichapeihzy, Epharaw nata a khichapeihzy la ta.

²⁰ Abizah â bei chhôh cha Zerôbaw a duah heih thei khao vei. Abeipa ta tu ta, a thi haw.

²¹ Abizah deikua cha a thatlô via lymâ ta. Lapinô pahrawh hleipalih hnei ta, sawchapaw pakih nata pano nata sawchanô pahrawh hleicharu a hnei.

²² Abizah thâtih hropazy nata a yziezy nata a bie reipazy cha hrohsopa Idô châbu liata ropa a châ.