2 THÂTIHZYRONA 12 - Mara Bible RV (BSI)

Izi ta Zudâh a siehnao

¹ Rehôbaw cha a ryureina liahsa a i ta, a tha a vaw tlô nahta, Abeipa ryhpa tleisai ha ta. Ano chhâh a châpa Izarei saw zydua chhao ta Abeipa ryhpa cha tleisai ha hra ei ta.

² Abeipa liata ngâ amâ chhih leipa vâta, Bei Rehôbaw abeina kô pangawhna liata, Izi bei Sisâ ta Zerusale kaw siehnao ta,

³ talailih 1,200 nata arâ pheisaih 60,000 ta kaw sie ta. Izi râh tawhta a hnohta hrâ a kaw siepa pheisaih, Libia mo, Suki mo nata Kusi mozy hluhzie cha rei tiah awpa châ veih ei.

⁴ Zudâh râh liata thokhy hneipa khihpizy la lymâpa ta, Zerusale kei tlô ta.

⁵ Hrohsopa Semiah cha, Sisâ vâta Zerusale liata a hmaohpakhypa Rehôbaw nata Zudâh beimachâzy lâ vawh ta, ama hnohta, “Abeipa ta hetana heta a tah: ‘Nâ heihsai ei chi ta, chavâta kei chhao ta châ heihsai ei na ta, Sisâ ku liata ei cha hlâ ha ei,’ a tah,” tah ta.

⁶ Chatanachata Izarei beimachâzy nata abei cha a panawh ei ta, “Abeipa cha mosiapa a châ,” tah ei ta.

⁷ Amâ panawhpa cha Abeipa ta a hmô nahta, Semiah hnohta Abeipa bie vaw tlô ta. Abeipa ta, “A panawh ha ei ta, pahleipadia khao aw veih ei na. Pachhana a rakhapa ta ei pie aw ei. Ei pathiiana cha Sisâ hmâpa ta Zerusale chô liata patlai thlu khao aw va na.

⁸ Chatahrasala Sisâ chakaotuhpazy ta ama y aw. Chatanachata keima chakaopa nata khizaw khinarâhzy chakaopa ânanonazie ama pahno aw,” tah ta.

⁹ Izi bei Sisâ cha Zerusale kaw siehnao ta. Abeipa o liata ryusôhpazy nata abei o liata ryusôhpazy lapa ta, hmo to siekhei ta. Sawlawmaw taopa ngôh vyhphaozy chhao a siekhei khai haw.

¹⁰ Bei Rehôbaw ta ngôh vyhphaozy vyuhpa ta dawh vyhphaozy tao ta, chazy cha abei o ochhi vaituhpa pheisaih hyutuhpazy pavaosa ta.

¹¹ Zehôvâh o liata abei â ngiana maihta, vaituhpazy a vy ei ta, vyhphaozy cha cheih ei ta, vaituhpazy yna chhôhpadâhpa liata ama soh heih tyh.

¹² Bei Rehôbaw cha â panawhpa vâta, Abeipa pathiiana ta ano cha a liesai ta, tlokhuh pahleipadiapa châ khao vei. Cha dei châ vei, hmo phapazy Zudâh liata a y chypa vâta, tlokhuh pahleipadia leipa ama châ.

¹³ Bei Rehôbaw cha Zerusale liata liahsa a pa-i ta, ryureih lymâ ta. Rehôbaw cha â bei pathao nota kô sypalih nata kô khapa a châ. Abeipa ta a moh y nawpa ta Izarei chi zydua tawhta â tlyhpa khihpi Zerusale liata kô hrawh hleisari a bei ta. A nô moh cha Amawna zuah Nâmâh a châ.

¹⁴ Rehôbaw cha Abeipa padona lâ a palôh a pahei leipa vâta, moleina hmozy tao tyh ta.

¹⁵ Rehôbaw thâtih cha âthaona tawhta achhâna taihta, hrohsopa Semiah nata hmôtheituhpa Idô zy ropa thyutôna châbuzy liata ropa a châ. Rehôbaw nata Zerôbaw likawh liata adyuhna y lymâ ta.

¹⁶ Rehôbaw cha a pathlatuhpazy hnohta a mô ta, Dâvi khihpi liata pabu ei ta, a sawchapawpa Abizah ta ano su liata â bei.