2 THÂTIHZYRONA 11 - Mara Bible RV (BSI)

¹ Rehôbaw cha Zerusale a tlô nahta, Izarei maw lâ chizy a dyuh ta, a khinarâh zydua la pathi khai awpa ta, Zudâh nata Benzami chizy tawhta pasaipha chaipazy 180,000 pahmaoh ta.

² Châhrasala Khazohpa chyhsa Semiah hnohta Abeipa bie vaw tlô ta:

³ “Sawlawmaw sawchapawpa, Zudâh bei Rehôbaw nata Zudâh râh nata Benzami râh liata Izarei saw zydua hnohta,

⁴ ‘Abeipa ta hetana heta a tah: Nama khy awpa châ leipa ta, nama chiheihzy namâ dyuh awpa châ vei. Chyhsa to nama o lâ a di khai teh u. He hmo he keima tawhta a vaw tlôpa a châ,’ tahpa ta chho teh,” tah ta. Abeipa bie cha nathlie ei ta, a lie ei ta, Zerôbaw a dyuh awpa ta sie kho veih ei.

Rehôbaw hneirôna

⁵ Rehôbaw cha Zerusale liata pahrâ ta, a vaih nawpa ta Zudâh râh liata khihpizy padua ta.

⁶ Bethlehe, Etamâ, Tekô,

⁷ Bezu, Sôkô, Adulâ,

⁸ Kâthâ, Maresâ, Ziphi,

⁹ Adôrai, Lakhi, Azekâ,

¹⁰ Zôrâh, Aizalô nata Hebraw khihpizy padua ta. Chazy cha Zudâh nata Benzami râhzy liata thokhy hneipa khihpizy a châ.

¹¹ Thokhyzy cha pa-i ta, cha liata pheisaih hyutuhpazy soh ta, niedo, sathaw nata kresawhti zy sohpakhy ta.

¹² Khihpi to liata vyhphaozy nata aseizy soh ta, khihpizy cha â i ngaitapa ta tao ta. Cha hawhna chata Zudâh nata Benzami râhzy cha ano ryureina ry liata a soh lymâ thei ei.

Theihthaipazy nata Livai pathlazy Zerusale ama pangai

¹³ Izarei maw lâ râh zydua liata theihthaipazy nata Livai pathlazy cha ama yna su chyu tawhta Rehôbaw lâ pangai ei ta.

¹⁴ Zerôbaw nata a sawchapawzy cha theihthaipa chakaona rai ama hriana tawhta ama pabâ hapa vâta, amâ hlypa râh nata ama o nata lyuzy puasaipa ta, Zudâh râh nata Zerusale lâ ama pangai haw.

¹⁵ Zerôbaw ta su sâhpazy nata mie tôhpa nata viahchaotaw nothlahpa a taopazy châta ano khopa theihthai­pazy rao ta.

¹⁶ Izarei chi zydua hry tawhta Izarei Khazohpa Zehôvâh padona lâta ama palôh a heihpa zydua ta, ama pathlatuhpazy Khazohpa Zehôvâh lâ atheihna hlâ awpa ta, theihthaipazy nata Livai pathlazy cha Zerusale lâ pazi ei ta.

¹⁷ Zudâh khinarâh cha thapatlô ei ta, kô thôh chhôh Dâvi nata Sawlawmaw lâpi a chhihpa ta, Sawlawmaw sawchapawpa Rehôbaw cha kô thôh chhôh â bohpa ta paysa ei ta.

Rehôbaw pathlazy

¹⁸ Rehôbaw ta Dâvi sawchapawpa Zerimô sawchanô Mâhalâ cha lapinô ta hnei ta, ano cha Zese sawchapawpa Eliabâ sawchanô Abihai sawchanô a châ.

¹⁹ Mâhalâ ta Rehôbaw cha sawchapawzy, Zeu, Semariah nata Zehâ zy sapa ta.

²⁰ Mâhalâ a hnei khai tawhta, Absalaw sawchanô Mâkâ hnei ta, ano ta Abiza, Atai, Ziza nata Selômi zy sapa ta.

²¹ Rehôbaw ta Absalaw sawchanô Mâkâ cha a lapinô hropazy nata a nôtho zydua hlâta kyhpachâ chai ta. Rehôbaw cha lapinô pahrawh hleicharie nata nôtho sycharu hnei ta, sawchapaw pakih nata pacharie nata sawchanô sycharu a hnei.

²² Rehôbaw ta Mâkâ sawchapawpa Abizah cha, abei ta tao awpa â chhuahpa vâta, a unawhzy hry liata hyutuh chaipa ta tao ta.

²³ So ngaitapa ta ryhrao ta, a saw­chapaw thokhazy cha Zudâh râh nata Benzami râh liata thokhy hneipa khihpi zydua liata paysa ta. A sawchapawzy cha ama nie awpa hluhpi piepa ta, lapinô hluhpi a hiapa ei.