2 THÂTIHZYRONA 10 - Mara Bible RV (BSI)

Izarei râh apachhaihna

¹ Izarei saw zydua ta Rehôbaw cha bei ta tao awpa ta Sekhe liata a hmaoh ei ta, chavâta Rehôbaw cha Sekhe lâ sie ta.

² Cha thâtih cha Nebâ sawchapawpa Zerôbaw ta a theipata nahta, Izi râh tawhta a kaw lie ta. Zerôbaw cha Bei Sawlawmaw riahchi ta â râna Izi râh liata a y thlâh hapa châ ta.

³ Chyhsa tuah ei ta, kei padysa ei ta. Zerôbaw nata Izarei saw zydua cha a vy ei ta, Rehôbaw hnohta,

⁴ “Na paw khata eima raopaky pahri ngaita tyh ta. Chavâta na paw ta rie miah patheipa nata raopaky a hri ngaitapa eima chô liata a pahniehpa he miah pahuapa la, chatanachata eima cha chakao aw,” tah ei ta.

⁵ Rehôbaw ta ama hnohta, “Noh thôh khai tawhta a vy heih muh vy,” tah ta. Chatanachata zawpizy cha sie ha ei ta.

⁶ Bei Rehôbaw ta a paw Sawlawmaw a hro nota, a hmiakô liata a duah tyhpa pawhrâhpazy a saohiah ta, ama hnohta, “He zawpizy he kheihawhta a chhy awpa ta ma ryh eina raokhei aw ei chi?” tah ta.

⁷ Âmo ta a hnohta, “He zawpizy chô liata phana palâsa la, bie phapa chhopa ta na palysa khiah ei ta cha, chhâzaw ta ama cha chakao aw,” tah ei ta.

⁸ Châhrasala pawhrâhpazy ryhraokheina cha thy ta, ano richâhkha thyutlia a hmiakô liata a duah tyhpazy tlao a saohiah ta.

⁹ Ama hnohta, “‘Na paw ta raopaky miah a pakypa miah pahuapa teh,’ nâ tahpa zawpizy he kheihta a chhy awpa ta ma ryh eina raokhei aw ei chi?” tah ta.

¹⁰ A richâhkha thyutliazy ta a hnohta, “‘Na paw khata eima raopaky pahri ngaita tyh ta, nâ ta cha miah pahuapa teh,’ châ tahtuhpa zawpizy hnohna chata, ‘Ei paw byhpizy hlâta ei kuparo tieta a lai via.

¹¹ Ei paw khata raopaky a hri ngaitapa cha pakysa ei ta, kei ta nama raopaky ei baichha aw. Ei paw ta sôsi ta cha chhorei ei ta, kei ta râh cha-ia ta ei cha chhorei aw ei,’ tahpa ta nâ chhy aw,” tah ei ta.

¹² Abei ta, “Noh thôhna noh ta a vy heih muh vy,” a tahpa hawhta, Zerôbaw nata zawpi zydua cha, a noh thôhna noh ta Rehôbaw lâ a vy ei ta.

¹³ Abei ta âmo cha reih chahrâh kawpa ta a chhy ta. Pawhrâhpazy ryhraokheina cha a pyh leipa ta,

¹⁴ Bei Rehôbaw ta thyutliazy ryhraokheina hawhta âmo cha a chhy ta, ama hnohta, “Ei paw ta raopaky a hri ngaitapa cha paky ei ta, kei ta nama raopaky ei baichha aw. Ei paw ta sôsi ta cha chhorei ei ta, kei ta râh cha-ia ta ei cha chhorei aw ei,” tah ta.

¹⁵ Zawpi bie cha abei ta nathlie khoh vei. Abeipa ta Silô chyhsa Ahiza hmâpa ta Nebâ sawchapawpa Zerôbaw hnohta bie a reipa a vaw tlô thei nawpa ta, Khazohpa ta a pataosapa a châ.

¹⁶ Abei ta ama bie nathlie khoh vei tahpa Izarei saw zydua ta ama hmô nahta, zawpizy ta, “Dâvi liata tovyuh hnei leipa pi ta, Zese sawchapawpa liata ryuto hnei ma pi! Hy Izarei, nama poh o chyu lâ a di teh u! Nâ Dâvi, na chhôhkha tlâ pachâ teh,” tahpa ta abei cha a chhy ei ta, Izarei saw zydua cha ama poh o lâ chyu a di ha ei ta.

¹⁷ Rehôbaw cha Zudâh khihpizy liata a pahrâpa Izarei sawzy chô lia deita â bei.

¹⁸ Bei Rehôbaw ta raihriatuhpazy hyutuhpa Hadôrâ cha zawpizy lâ tuah ta, châhrasala Izarei sawzy ta ano cha alô ta ama vawhsao haw. Chavâta Bei Rehôbaw cha a talailih chhôh lâ thlai a ngia ta, Zerusale lâ â râ haw.

¹⁹ Chatanachata Izarei sawzy cha tanoh taihta Dâvi pathlazy amâ chariah lymâ.