2 THÂTIHZYRONA 1 - Mara Bible RV (BSI)

Sawlawmaw ta sona a hiah

¹ Dâvi sawchapawpa Sawlawmaw cha a khinarâh liata a pa-i ta, Abeipa a Khazohpa cha a hnohta y ta, thata parônahsa ta.

² Sawlawmaw ta Izarei saw zydua, pheisaih sâh kha hyutuhpazy, pheisaih za kha hyutuhpazy, ryureihtuhpazy, Izarei râh zydua liata chhituhpa chhôh to pawhrâhpa zydua hnohta bie reih ta.

³ Sawlawmaw cha zawpi zydua chhaota Kibiô khihpi liata su sâhpa lâ sie ta. Cha su liata Abeipa chakaotuhpa Mawsi ta râhchawhpa liata a taopa Khazohpa ahmaohna poh o kha y ta.

⁴ Khazohpa Byh deikua cha, Dâvi ta Kiriaziari tawhta khykhei ta, a so nawpa su â chhuanohpa, Zerusale liata poh o a raipa liata soh ta.

⁵ Hurâ sawchapawpa Uri saw­chapawpa Bezale ta dawh maisâh a taopa chhao kha, Kibiô liata Abeipa achhyna byureih kiapâh liata y ta. Sawlawmaw nata zawpizy ta maisâh cha kei pangai ei ta.

⁶ Sawlawmaw ta ahmaohna poh o kiapâh liata dawh maisâh yna lâ khy ta, cha liata Abeipa hmiakô ta raopa hlâna sâh kha hlâ ta.

⁷ Cha zâ ta Sawlawmaw hnohta Khazohpa a vaw luah ta, a hnohta, “Khâpa ei cha pie aw, na hiah teh,” tah ta.

⁸ Sawlawmaw ta Khazohpa hnohta, “Ei paw Dâvi hnohna khata ngiachhiena thata paluahsa chi ta, ano su liata bei ta eina tao chi.

⁹ Hy Zehôvâh Khazohpa y, ei paw Dâvi hnohta na bietai kha tahmâ patlô mah y. Nâma tlai ta alei dohlei zie ta a hluhpa phopi chô liata bei ta eina tao chi hih.

¹⁰ Chavâta he phopi hmiakô liata ei pua nawpa nata ei ngia nawpa châta a ngiahpa sona nata novâhna na pie mah y. Chataleipatala he tlu ta a hluhpa na phopi chô liana he ahy ma ryu a reih thei aw?” tah ta.

¹¹ Khazohpa ta Sawlawmaw hnohta, “Cha hmo cha na palôh liata y ta, sôh nata piah, hneirôna, palyupalihna, châ haotuhpazy hrona nata hro pareihna zy hiah leipa chi ta, ama bei ta ei cha taopa ei phopi chô liata ryu na rei thei nawpa ta, sona nata novâhna tlao eina hiapa vâ chi ta,

¹² sona nata novâhna cha piepa na châ haw. Nâma hlâta bei a vaw châ tuapa ahy hmahta ama hnei thei leipa nata nâma khai tawhta bei a vaw châ awpa ahy hmahta ama hnei thei lei awpa sôh nata piah, hneirôna nata palyupalihna zy chhao ei cha pie aw,” tah ta.

¹³ Chatanachata Sawlawmaw cha Kibiô su sâhpa liata ahmaohna poh o hmiakô tawhta Zerusale lâ a lie ta. Izarei sawzy chô liata ryureih ta.

Sawlawmaw hneirôna

¹⁴ Sawlawmaw ta talailihzy nata arâ pheisaihzy pahmaoh pakhy ta. Talailih 1,400 nata arâ pheisaih 12,000 hnei ta, chazy cha talailih sona khihpizy nata abei yna Zerusale liata soh ta.

¹⁵ Abei ta tâkâ nata ngôh cha, alô hawhta pachâna taihta Zerusale liata pachô ta. Sidy tho chhao Sephelâ liata theiku tho hawhta hluhpa ta a pachô.

¹⁶ Sawlawmaw hneipa arâzy cha Izi nata Kue tawhta lapa châ ta, bei sôhpalietuhpazy ta a mâ piepa ta Kue liata ama za chalei tyh.

¹⁷ Talailih miakha ta tâkâ sekel 600, arâ pô kha ta tâkâ sekel 150 lymâ ta Izi râh lâ za chalei tyh ei ta, âmo tawhta Hiti bei zydua nata Aramia beizy lâta ama zuah pachhuah tyh.