2 SAMUELA 9 - Mara Bible RV (BSI)

Dâvi nata Mephibôse

¹ Dâvi ta, “Zawnathâ vâta a pathlazy chô liata ngiachhiena ei palâsa thei nawpa ta, Sawla pathlazy hry liata a hrohpa pakha chhâ ama y tlyma i?” tah ta.

² Sawla o liata chakaotuhpa pakha a moh Zibâ ama tahpa y ta, ano cha Dâvi lâ a vaw chhi ei ta, abei ta a hnohta, “Zibâ na châ ma?” tah ta. Ano ta, “Châ chakaotuhpa he Zibâ na ei châ,” tah ta.

³ Abei ta, “Khazohpa ngia­chhiena a chô liata ei palâsa thei nawpa ta, Sawla pathla hry liata a hrohpa pakha chhâ ama y tlyma?” tah ta. Zibâ ta abei hnohta, “Zawnathâ sawchapawpa pakha y ta, pheisypa a châ,” tah ta.

⁴ Abei ta a hnohta, “Khataih liata ma a y?” tah ta. Zibâ ta abei hnohta, “Lôdebâ liata Amie sawchapawpa Mâkhi o liata a y,” tah ta.

⁵ Chatawhcha Bei Dâvi ta chyhsa tuah ta, Lôdebâ khih liata Amie sawchapawpa Mâkhi o liata a ypa Zawnathâ sawchapawpa cha kei padysa ta.

⁶ Sawla sawchapawpa Zawnathâ saw­chapawpa Mephibôse cha Dâvi lâ a vy ta, a hmia lâta pao ta, a naoh ta. Dâvi ta, “Mephibôse!” tah ta. Ano ta, “Châ chakaotuhpa ei châ,” tah ta.

⁷ Dâvi ta a hnohta, “Chi kha, na paw Zawnathâ vâta na chô liata ngiachhiena ei palâsa aw. Na mapaw Sawla râh zydua kha cha pie pakhua khai aw na ta, ei tlâhkhai liata pati na dôh lymâ aw,” tah ta.

⁸ Mephibôse ta a naoh ta, a hnohta, “Kei i thiruapa, châ chakaotuhpa hawhpa na he, khâpa ma châ na ta, cha hawhta eina pachâ khoh chi tly?” tah ta.

⁹ Bei Dâvi ta Sawla chakaotuhpa Zibâ cha aw ta, a hnohta, “Sawla hneipa zydua nata a pathlazy hmo zydua kha na zibeipa samohpa he ei pie khai haw.

¹⁰ Ano châta alei palie aw ei chi ta, nâ nata na sawchapawzy nata châ chakaotuhpazy ta kôveizy vaw cheih tyh aw chi ta, chatanachata na zibeipa samohpa cha niedo a hnei aw. Na zibeipa samohpa Mephibôse deikua cha, ei tlâhkhai liata pati a dôh lymâ aw,” tah ta. Zibâ cha sawchapawpa pahrawh hleipangawh nata chakaotuhpa pakih hnei ta.

¹¹ Zibâ ta abei hnohta, “Ei zibeipa abei ta a chakaotuhpa bie a piepa hawhta, châ chakaotuhpa heta a tao aw,” tah ta. Chatanachata Mephibôse cha Dâvi tlâhkhai liata bei saw­chapaw pakha hawhta pati a dôh lymâ hra.

¹² Mephibôse cha sawchapawpa thyutliapa pakha, a moh Mikhâ ama tahpa hnei ta. Chatanachata Zibâ o liata a pahrâpa zydua cha Mephibôse chakaotuhpa ta y khai ha ei ta.

¹³ Mephibôse cha bei tlâhkhai liata pati a dôhpa a châpa vâta, Zerusale liata pahrâ ta. Ano he a phei kârano ta a sypa a châ.