2 SAMUELA 8 - Mara Bible RV (BSI)

Dâvi ta a râh a pakawh

¹ Cha khai tawhta Dâvi ta Philistinâ mo a dyuh ta, pahnie ta. Dâvi ta Philistinâ mo ku tawhta Methekamâ la ta.

² Môabâ pahnie ta, Môabâ mo cha a tlâh tlâh ta alei liata paziasa ta, thliena ri ta thlie ta, tlâh thôh liata tlâh no thie ta, tlâh kha cha a tlâh dua ta a pahlôh lymâ ei. Chatanachata Môabâ mo cha Dâvi chakaotuhpa ta y ei ta, râhpaw ama pie lymâ.

³ Dâvi cha Ufrâti chavah liata a biehneina padua awpa ta a siena liata, Rehô sawchapawpa Zôbâ bei Hadâdeze chhao pahnie ta.

⁴ Dâvi ta arâ pheisaih 1,700 nata alei pheisaih 20,000 patu ta. Dâvi ta talailih a daophipa arâ zydua cha ama chazaw chhawh ta, talailih 100 a daophi awpa rakha pahlôh ta.

⁵ Dâmaskâ liata Aramia mo ta Zôbâ bei Hadâdeze pachha awpa ta a vy ei ta, Dâvi ta Aramia pheisaih 22,000 thie ta.

⁶ Dâvi ta Dâmaskâ liata Aramia mo hry liata pheisaih suzy soh ta, chatanachata Aramia mo cha Dâvi chakaotuhpa ta y ei ta, ano lâ râhpaw ama pie lymâ. Abeipa ta Dâvi cha a siena maih liata pahniena pie lymâ ta.

⁷ Dâvi ta Hadâdeze chakaotuhpazy ta ama siekheipa ngôh vyhphaozy la ta, Zerusale lâ phaoh ta.

⁸ Hadâdeze khihpi Betâ nata Berôthai tawh chhao ta, Bei Dâvi ta dawh a hluhpi la hra ta.

⁹ Dâvi ta Hadâdeze pheisaih zydua a pahnie khai hapa thâtih Hâmathi bei Tôi ta a thei nahta,

¹⁰ Dâvi ta Hadâdeze a dyuh ta a pahnie hapa vâta, a hnatlâna kyh hiahri awpa nata byhnâ awpa awpa ta, a sawchapawpa Zôrâ cha ano lâ tuah ta. Hadâdeze he Tôi a vaw dyuh ngâ thlâh ha tyhpa a châ. Zôrâ cha tâkâ, ngôh nata dawh hmobaohzy vaw phaoh ta.

¹¹ Chazy cha Bei Dâvi ta râh a pahniepa zydua tawhta tâkâ nata ngôh a lapazy chhaota Abeipa lâ hlâ ta.

¹² Cha hraona sôhzy cha Aramia tawhta zy, Môabâ tawhta zy, Amawna mo tawhta zy, Philistinâ mo tawhta zy, Amale tawhta nata Rehô sawchapawpa Zôbâ bei Hadâdeze tawhta ama lapazy a châ.

¹³ Dâvi cha Alôh Saikao liata Aramia mo 18,000 a thie tawhta â vaw lie heihpa cha a moh thata pathâh ta.

¹⁴ Edômâ râh liata pheisaihzy soh ta. Edômâ râh su hluhpi liata pheisaihzy soh ta, chatanachata Edômâ mo zydua cha Dâvi chakaotuhpazy ta y ha ei ta. Abeipa ta Dâvi cha a siena maih liata pahniena a pie lymâ.

Dâvi beimachâzy

¹⁵ Chatanachata Dâvi cha Izarei saw zydua chô liata ryureih ta. Dâvi cha a phopi zydua châta adona nata siana ta ryureih ta.

¹⁶ Zeru sawchapawpa Zôabâ cha pheisaih hyutuh chaipa châ ta, Ahilu sawchapawpa Zehôsaphâ cha thâtih rohtuhpa a châ.

¹⁷ Ahitu sawchapawpa Zadô nata Abiathâ sawchapawpa Ahimele zy cha theihthaipazy châ ei ta, Seriah cha chârohtuhpa a châ.

¹⁸ Zehôdâ sawchapawpa Benai cha Khere mo nata Pele mo hyutuhpa châ ta, Dâvi sawchapawzy cha theihthaipazy ama châ.