2 SAMUELA 7 - Mara Bible RV (BSI)

Dâvi hnohta Abeipa Biehrai

¹ Abei cha a o liata pahrâ ta, a chheipâh chariah zydua tawhta apahâna Abeipa ta a pie nahta,

² abei ta hrohsopa Nâthâ hnohta, “Pachâ tua, keima cha sidy o liata pahrâ na ta, Khazohpa Byh deikua cha poh o liata a pahrâ thlâh haw,” tah ta.

³ Nâthâ ta abei hnohta, “Sie la, na palôh liata a ypa zydua tao mah y, Abeipa na hnohta a y mâh tâh,” tah ta.

⁴ Châhrasala cha zâ lilaw ta Nâthâ hnohta Abeipa bie vaw tlô ta,

⁵ “Vawh la nâ chakaotuhpa Dâvi hnohta, ‘Abeipa ta hetana heta a tah: Ei pahrâ nawpa o cha nâma ta eina sapa aw chi ma?

⁶ Izarei sawzy Izi râh tawhta ei kaw chhi papua noh tawhta tanoh taihta o liata pahrâ mâh va na, poh o liata nata achhyna byureih liata ei pasiepasâ lymâ.

⁷ Izarei saw zydua hnohta su to liata ei pasie laihna liata, ei phopi Izarei chhihtha awpa ta bie ei piepa Izarei ryureituhpa ahy hnohta tlyma, “Khazia sidy tho ta o eina sapa veih ei chi,” tahpa ta bie kawh kha chhâ ei vaw reih beih ma?’

⁸ Chavâta tahmâ nâ chakaotuhpa Dâvi hnohta hetana heta kei chho teh. ‘Pheisaihzy Abeipa ta hetana heta a tah: Ei phopi Izarei chô liata ryureituhpa châ awpa ta sibiepa su tawhta nata mietakuzy na vaina tawhta cha la papua na ta,

⁹ na siena maih liata na hnohta y lymâ na ta, na chariah zydua na hmiakô tawhta ei chhawh pathlah ha ei. Alei chô liata chyhsa rônahpazy hawhta, moh rônahpa ei cha taopa aw.

¹⁰ Ei phopi Izarei châta su rao aw na ta, cha liata loh aw ei na ta, âmo su eihpa liata pahrâ aw ei ta, patypamâpa ta y khao aw veih ei. Eikhano hawhna khata, thachahra a hmâhpazy ta âmo cha pasasa khao aw veih ei.

¹¹ Ei phopi Izarei chô liata ryureituhpazy ei raona daihti hawhna khata châ khao aw vei. Na chariah zydua tawhta ei cha pahâsa aw. Cha dei châ vei, Abeipa ta na pathlazy a cha paduapa aw tahpa ta Abeipa ta na hnohta a phuah.

¹² Na hro chhôh kôzy a kipa ta, châ pathlatuhpazy hnohta nâ zia tita, nâma châ thla awpa na pathla, na chhôh tawhta a puapa cheingei, cha paduapa aw na ta, â beinarâh ei pa-i aw.

¹³ Ano ta ei moh châta o sa aw ta, kei ta â beinarâh beidyuchhai cha chhâzaw châta ei pa-i aw.

¹⁴ A paw châ aw na ta, ei sawchapawpa a châ aw. Hmo a parao khiahta cha, chyhsapa sôsi ta chhorei aw na ta, Âdâh sawzy chheina ta ei chhorei aw.

¹⁵ Châhrasala ei zawngiahna ta ano cha siesai beih aw vei. Na hmiakô tawhta ei la hapa Sawla tawhta ei zawngiahna ta a siesai hapa hawhna khata châ aw vei.

¹⁶ Na pathlazy nata nâ beinarâh cha ei hmiakô liata chhâzaw ta a duah aw ei ta, na beidyuchhai chhao chhâzaw ta â duah aw,’ tahpa ta kei chho teh,” tah ta.

¹⁷ Cha bie zydua nata cha aluahna hawh tlai ta, Nâthâ ta Dâvi cha chho ta.

Dâvi alyna biereina

¹⁸ Chatawhcha Bei Dâvi cha a ngia ta, Abeipa hmiakô liata a tyuh ta, a hnohta, “Hy Abeipa Zehôvâh y, ahy ma châ na ta, ei chhôhkha he khâpa châ ta ma, he taih heta einâ vaw chhi chi tly?

¹⁹ Hy Abeipa Zehôvâh y, chazy chhao cha nâma mohmô liata la hmo chyhpata a châ. Châ chakaotuhpa pathlazy chhichâ nawpa chhao kô hluhpi châta reih ha chi ta, Hy Abeipa Zehôvâh y, cha cha chyhsapa siezie awpa cha a châ.

²⁰ Dâvi heta nâ lâta reih awpa khâpa a hnei khao? Hy Abeipa Zehôvâh y, châ chakaotuhpa he na pahno mâh tâh.

²¹ Na bietai vâta nata na palôh hawhta châ chakaotuhpa pahnosa awpa ta, he hmo rônahpazy he na tao haw.

²² Chavâta Hy Abeipa Zehôvâh y, nâ cha rônahpa na châ. Eima nah ta eima thei khai hapa hawhta, nâma hawhpa he y leipa ei ta, nâma leipa ta Khazohpa rai y veih ei.

²³ Na phopi Izarei hawhpa he alei chô liata khâpa phopi ma a y? Khazohpa ta a moh rônah nawpa ta phopi miakha a tlyh ta, ano phopi ta tao awpa ta, sie ta a kei chatlaipa phopi ahy ma a y? Na phopi châ awpa ta Izi tawhta na chatlaipa, ama châta hmo rônahpa nata rarôh ypa taopa ta, ama hmiakô tawhta phopi nata a khazohzy na papuapa phopi ahy ma a y?

²⁴ Chatanachata na phopi Izarei cha chhâzaw ta nâma phopi châ awpa ta padua chi ta, nâma tlai cha, Hy Abeipa, ama Khazohpa na vaw châ haw.

²⁵ Chavâta tahmâ he, Hy Zehôvâh Khazohpa y, châ chakaotuhpa nata a pathlazy kyh na reipa kha, chhâzaw châta pa-i la, na reipa hawh tlai ta tao mah y.

²⁶ Chatanachata, ‘Pheisaihzy Abeipa cha Izarei Kha­zohpa a châ,’ tahpa ta, na moh cha chhâzaw ta palyupalihpa châ aw ta, châ chakaotuh­pa Dâvi pathlazy cha na hmiakô liata paduapa ama châ aw.

²⁷ Hy Pheisaihzy Abeipa, Izarei Khazohpa y, nâma tlai ta, châ chakaotuhpa hnohta, ‘Chipathlazy ei cha paduapa aw,’ tahpa ta phuah ha chi ta, chavâta châ chakaotuhpa heta he thlahchhâna he na hnohta ei vaw tlôkhei ngâhpa a châ.

²⁸ Hy Abeipa Zehôvâh y, nâ cha Khazohpa châ chi ta, na biezy cha a do ta, cha hmo phapa cha châ chakaotuhpa hnohta nâ taih haw.

²⁹ Chavâta châ chakaotuhpa pathlazy châta byhnâ awpa cha nâ lyna châ mawh sy. Chatanachata châ chakaotuhpa pathlazy cha na hmiakô liata chhâzaw ta ama y thei aw. Hy Abeipa Zehôvâh y, nâ ta reih ha chi ta, nâ ta byhnâ na aw hapa vâta, châ chakaotuhpa pathlazy cha chhâzaw ta vânoh topa ta y mawh ei sy,” tah ta.