2 SAMUELA 6 - Mara Bible RV (BSI)

Khazohpa Byh Zerusale a vaw tlô

¹ Dâvi ta Izarei pheisaih pha chaipazy 30,000 awpakhy ta.

² Dâvi cha thyu ta, cherubizy likawh beidyuchhai liata patyupa Pheisaihzy Abeipa moh ta awpa Khazohpa Byh cha la awpa ta, a pheisaih zydua chhaota Zudâh râh liata Bâle khihpi lâ sie ta.

³ Khazohpa Byh cha talailih thiehpa liata khaih ei ta, tlâh liata Abinadâ o tawhta puakhei ei ta. Abinadâ sawcha­pawpa Uza nata Ahiô ta talailih thiehpa cha haoh ei ta.

⁴ Khazohpa Byh a phaohpa talailih cha tlâh liata Abinadâ o tawhta puakhei ei ta, Ahiô cha Khazohpa Byh hmia lâ sie ta.

⁵ Dâvi nata Izarei saw zydua cha totâzy, tlaipihzy, khoh chyhpazy, sakizy nata paotlâzy tôpa ta hla sa ei ta, Abeipa hmiakô liata a ly ngaitapa ta y ei ta.

⁶ Nakô sawhri ama tlô nahta, viahchao tôhpazy amâ chapiapa vâta, Uza ta Khazohpa Byh cha pazapa ta patu ta.

⁷ Abeipa cha Uza chô liata a hiehâh ta, a hmotaopa doleipa vâta Khazohpa ta cha liata thie ta, Khazohpa Byh kiapâh liata thi ha ta.

⁸ Abeipa ta Uza chô liata ku a pathlapa vâta, Dâvi cha a hiehâh kaw ta. Chavâta cha su cha tanoh taihta Perezuza tahpa a châ.

⁹ Cha noh ta Dâvi cha Abeipa chi ngaita ta, “Kheihta ma Abeipa Byh he kei lâ a vaw tlô thei rai aw?” tah ta.

¹⁰ Chavâta Dâvi ta Abeipa Byh cha Dâvi khihpi lâ phao awpa khoh khao leipa ta, Kiti chyhsa Ôbededô o lâ tlao tlei khei ha ta.

¹¹ Abeipa Byh cha Kiti chyhsa Ôbededô o liata thla thôh y ta, Abeipa ta Ôbededô nata a chhôhkha zydua byhnâ pie ta.

¹² “Kha­zohpa Byh vâta Ôbededô chhôhkha nata a hneipa zydua Abeipa ta byhnâ a pie,” tahpa ta Bei Dâvi cha chho ei ta. Chavâta Dâvi cha sie ta, Khazohpa Byh cha Ôbededô o tawhta Dâvi khihpi lâ a ly ngaitapa ta za phaoh ta.

¹³ Abeipa Byh a sytuhpazy kei charu ama chakâ nahta, viahchao tôhpa nata sahroh taw thawhpa ta atheihna hlâ lymâ ta.

¹⁴ Dâvi cha pala rih dipa ephaw a kypa ta, a thatlôna zydua papua khaipa ta Abeipa hmiakô liata lâh ta.

¹⁵ Dâvi nata Izarei saw zydua ta rahaona chôta nata chiahmie tôna chôta Abeipa Byh cha kaw tlôkhei ei ta.

Dâvi nata Mikâli

¹⁶ Abeipa Byh cha Dâvi khihpi â ngia hai nota, Sawla sawchanô Mikâli cha opy tawhta vaw sai ta, Bei Dâvi cha Abeipa hmiakô liata lâh ta, â zawzâ ngâ kawpa hmô ta, a palôh liata zakhei kaw ta.

¹⁷ Abeipa Byh cha a ngiakhei ei ta, a so nawpa ta Dâvi ta a paraipa poh o chhôh liata a su raopa liata soh ei ta. Dâvi ta raopa hlânazy nata aryhna hlânazy Abeipa hmiakô liata hlâ ta.

¹⁸ Dâvi ta raopa hlânazy nata aryhna hlânazy a hlâ khai nahta, Pheisaihzy Abeipa moh ta zawpizy cha byhnâ awpa ta.

¹⁹ Izarei zawpi zydua cha a chanô chapaw ta chyhsa to viahchhâ tlâ kha, savyuh vyuh kha, kre thei pachawhpa sao kha sai rai ta. Cha khai tawhta chyhsa zydua cha ama o chyu lâta a di ha ei ta.

²⁰ Dâvi cha a chhôhkhazy châta byhnâ aw awpa ta o lâ a vaw di ta. Sawla sawchanô Mikâli cha Dâvi dy awpa ta vaw pua ta, a hnohta, “Tanoh la Izarei bei kha a rônah kaw na! Chyhsa leilôpa, nozana chhao a pahno leipa ta thluahruapa ta a ypa hawhta, Izarei bei cha ano chakaotuhpazy a chakao pachhuahpa chanôzy mohmô liata thluahruapa ta a y thlâh ha kha zaw!” vaw tah ta.

²¹ Dâvi ta Mikâli hnohta, “Na paw chô lâta nata a chhôhkha zydua chô lâta nâ tlyhtuhpa Abeipa hmiakô liata lâh na ta, Abeipa phopi Izarei chô liata bei ta nâ raotuhpa hmiakô liata ei lâpa a châ. Abeipa hmiakô liata la ei lâh lymâ aw.

²² Kha hlâta zakhei a chhih viapa ta y aw na ta, na mohmô liata ei nawh via rili aw. Anodeikua la chakaotuhpa chanôzy kyh na reipa khaw, âmo khata la eina palyupalih aw ei,” tah ta.

²³ Chavâta Sawla sawchanônô Mikâli cha­ a thina taihta saw hnei vei.