2 SAMUELA 5 - Mara Bible RV (BSI)

Izarei bei châta Dâvi sathawthuna

¹ Izarei chi zydua cha Hebraw liata Dâvi lâ a vy ei ta, a hnohta, “Moh teh, na ru nata sa eima châ hih.

² Sawla eima chô liata â beina daihti liana chhao khata, Izarei puakhei ta a ngiakhei tyhpa cha nâ na châ. Abeipa ta na hnohta, ‘Ei phopi Izarei vaituhpa châ aw chi ta, Izarei chô liata bei ta na y aw,’ tahpa ta bie â taihpa na châ,” tah ei ta.

³ Chatanachata Izarei machâ zydua cha Hebraw liata abei lâ a vy ei ta. Bei Dâvi ta Hebraw liana chata Abeipa hmiakô liata ama hnohta bie hraih ta. Dâvi cha Izarei chô liata bei châ awpa ta sathawthu ei ta.

⁴ Dâvi cha kô sythôhpa a châ nota a bei pathao ta, kô sypalih chhôh â bei.

⁵ Hebraw liata Zudâh chô liata kô sari nata thla charu a bei ta, Zerusale liata Izarei nata Zudâh zydua chô liata kô sythôh nata kô thôh â bei.

Dâvi ta Zaio a la

⁶ Chatawhcha abei nata a pheisaihzy cha Zebu mo a dyuh awpa ta Zerusale lâ sie ei ta. Zebu mo he, he râh liata a pahrâpa châ ei ta, Dâvi hnohta, “He liata a vaw ngia thei aw va chi, mochaopa nata pheisypazy ta ama cha pakhâ aw,” tah ei ta, “Dâvi cha he liata a vaw ngia thei beih aw vei,” tahpa ta ama vaw pachâpa a châ.

⁷ Châhrasala Dâvi ta Zaio thokhy cha a la haw. Cha cha Dâvi khihpi a châ.

⁸ Cha noh ta Dâvi ta, “Zebu mo a dyuhpa maih cha, ti lâpi khaoh lâ tawhta khy ei sala, pheisypa nata mochaopa, Dâvi hro ta â haopazy cha a kaw dyuh ei se,” tah ta. He he “Mochaopa nata pheisypazy cha o liata a ngia thei vei ei,” tahpa bie a vaw puana a châ.

⁹ Dâvi cha thokhy chhôh liata pahrâ ta, cha cha Dâvi khihpi tahpa ta a moh a bi. Milô tawhta pathaopa ta khihpi chhôh zydua cha Dâvi ta thokhy ta dôh ta

¹⁰ Dâvi cha Zehôvâh, Pheisaihzy Khazohpa ta a hnohta a ypa vâta rônah via lymâ ta.

Hirâ nata Dâvi amâ viasa

¹¹ Tyre bei Hirâ ta Dâvi lâ chyhsa tuah ta. Sidy thozy paphao ta, tho zôthaipa nata lô zôthaipazy tuah ta. Âmo chata Dâvi châta o sapa ei ta.

¹² Dâvi ta Abeipa ta Izarei chô liata bei ta ano cha padua ta, a phopi Izarei vâta a khinarâh chhao a cheihchalo tahpa pahno ta.

Zerusale liata Dâvi saw a pihpazy

¹³ Dâvi cha Hebraw a puasai tawhta, Zerusale zuahzy cha nôthozy nata lapinôzy châta hnei heih ta, sawchapawzy nata sawchanôzy sa via heih ta.

¹⁴ Zerusale liata a saw a pihpazy cha, Sâmua, Sôbâ, Nâthâ, Sawlawmaw,

¹⁵ Ibâ, Elisua, Nephe, Zaphia,

¹⁶ Elisâmâ, Eliadâ nata Eliphele zy ama châ.

Dâvi ta Philistinâ mo a pahnie

¹⁷ Dâvi cha Izarei bei châta sathawthupa a châ tahpa Philistinâ mo ta ama thei nahta, Philistinâ mo zydua cha Dâvi tlua awpa ta khy ei ta. Cha thâtih cha Dâvi ta a thei nahta, thokhy lâ zu ta.

¹⁸ Philistinâ mo cha a vy ei ta, Rephai saikao liata a paziah ei ta.

¹⁹ Dâvi cha Abeipa a saohiah ta, “Philistinâ mo a dyuh awpa ta ei khy aw ma? Âmo cha ei ku liata eina pie aw chi ma?” tah ta. Abeipa ta Dâvi hnohta, “Khy mah y, Philistinâ mo cha na ku liata ei cha pie tlai aw,” tah ta.

²⁰ Dâvi cha Bâlâperâzi kei tlô ta, cha liata Dâvi ta Philistinâ mo cha pahnie ta, “Abeipa ta ei chariahpazy cha ti pasapa hawhta ei hmiakô liata a pasa ha ei,” tah ta. Chavâta cha su cha Bâlâperâzi tahpa ta a moh a bi.

²¹ Philistinâ mo ta ama khazoh nothlahpazy a râsai ha ei ta, chazy cha Dâvi nata a chyhsazy ta la ei ta.

²² Philistinâ mo cha a khy heih ei ta, Rephai saikao liata a paziah heih ei ta.

²³ Dâvi ta Abeipa a saohiah ta, Abeipa ta, “Khy aw va chi, ama hnôh lâta chahlô la, malburi kô dady liata âmo a kei dyuh teh.

²⁴ Malburi kôzy kithlao liata hrâsiepa pyu na thei nahta, a dyuh awpa ta na thyu aw. Philistinâ pheisaihzy a dyuh awpa ta, na hmia lâta Abeipa a sie haw,” tah ta.

²⁵ Dâvi cha Abeipa biepiepa hawhta tao ta, Philistinâ mo cha Kebâ tawhta Keze taihta a thie lymâ ei.