2 SAMUELA 4 - Mara Bible RV (BSI)

Isabôse ama thie

¹ Sawla sawchapawpa Isabôse cha Hebraw liata Abane a thipa thâtih a thei nahta, a ku pathliah ta, Izarei saw zydua cha nôpopa ta y ei ta.

² Sawla sawchapawpa ta hrâsiepa pheisaih hyutuhpa pano hnei ta, pakha moh cha Bânâ châ ta, a hropa moh cha Rekhâ a châ. Âmo he Berô chyhsa Benzami pathla Rimô sawchapawzy ama châ. Berô cha Benzami râh hawhta pachâpa châ ta,

³ Berô mo cha Kitai lâ a râ ei ta, cha liata mapaihpa ta tanoh taih ama y.

⁴ Sawla sawchapawpa Zawnathâ ta sawchapaw pheisypa hnei ta. Sawla nata Zawnathâ thâtih Zezari tawhta a vaw tlô nota kô pangawhpa dei châ chy ta. Ano a mohôhtuhpa ta a pyh ta, a râkhei ta, a râ awpa ta â parana liata pathla ta, a phei a sy hapa a châ. A moh cha Mephibôse a châ.

⁵ Berô chyhsa Rimô sawchapawpa Rekhâ nata Bânâ zy cha sie ei ta, nohchhô locho ta Isabôse o kei tlô ei ta, Isabôse cha nohchhô a pahâpa ta rakhô liata â zia thlâh ha no châ ta.

⁶ Sâh la awpa hawhta a taopa ta, o chhôh lâ a ngia ei ta, a py liata dy ei ta, Rekhâ nata Bânâ cha a râ ha ei ta.

⁷ O chhôh lâ amâ ngia nota, Isabôse cha â ziana chhôhpadâhpa rakhô liata a vaw zia thlâh ha ta, dy ei ta ama thie haw. A luh tai ei ta, Arabâ lâpi a chhihpa ta azozâkhihdei ta ama siekhei haw.

⁸ Isabôse luh cha Hebraw liata Dâvi lâ vaw tlôkhei ei ta. Abei hnohta, “He he thie châ chhuahpa, na chariahpa Sawla sawchapawpa Isabôse luh a châ. Abeipa ta ei zibeipa abei phuh cha tanoh he Sawla nata a pathlazy chô liata a lapa haw,” tah ei ta.

⁹ Dâvi ta Berô chyhsa Rimô sawchapawpa Rekhâ nata a unawhpa Bânâ cha a chhy ta, ama hnohta, “Ei nôpona zydua tawhta nâ pachhatuhpa Abeipa hrona reipa ta ei reih.

¹⁰ Chyhsa pakha ta, thâtih phapa a vaw tlôkheipa hawhta â pachâpa ta, ‘Sawla a thi haw,’ tahpa ta na vaw chho ta. Ano cha patu na ta, Zikalâ liata ei thie ha khawh. Cha cha a thâtih vaw tlôkheipa lymâ châta ei piepa a châ.

¹¹ Chyhsa moleipazy ta chyhsa siapa ano o chhôh liata a rakhô lia cheingei ta ama thiepa cha, moleina rarôh y chaipa a châ. Chavâta a thisaih maoh nama ku tawhta a hnaw aw na ta, alei tawhna heta ei cha pahleipadia thlyu aw ei” tah ta.

¹² Dâvi ta a satliazy biepie ta, Rekhâ nata Bânâ zy cha thie ei ta, ama ku nata pheizy tai ei ta, Hebraw liata tipo kiapâh liata bangieh ei ta. Isabôse luh deikua cha la ei ta, Hebraw liata Abane thlâ liata ama pabu haw.