2 SAMUELA 24 - Mara Bible RV (BSI)

Izarei nata Zudâh maluhpi reina

¹ Abeipa cha Izarei chô liata a pathi ia heih ta, chatanachata âmo patypamâ awpa ta Dâvi cha pasyu ta, a hnohta, “Sie la, Izarei nata Zudâh maluh kei reih teh,” tah ta.

² Abei ta a hnohta a ypa pheisaih hyutuhpa Zôabâ hnohta, “Izarei chi zydua chahryh la, Dânâ tawhta Besebâ taihta, chyhsa maluh ei pahno thei nawpa ta, chyhsa mohzy kei roh khai mah y,” tah ta.

³ Zôabâ ta abei hnohta, “Abeipa na Khazohpa ta chyhsa a lie za kha ta papôh sala, cha cha ei zibeipa abei mo tlai ta hmô mawh sy! Châhrasala ei zibeipa abei heta he hawhpa hmo he khazia a tao khoh tly i?” tah ta.

⁴ Châhrasala abei bie ta Zôabâ nata pheisaih hyutuhpazy cha pahnie ha ta. Chatanachata Zôabâ nata pheisaih hyutuhpazy cha Izarei phopi maluhpi rei awpa ta abei hmiakô tawhta pua ei ta.

⁵ Zawdâh haosâ chaka ei ta, Kâdâ saikao liah khophie chachâh lâta khih a ypa Arôerâ liata Zaze taihta riehmo paryh ei ta.

⁶ Cha khai tawhta Kilia nata Hiti râh tlô ei ta, Dânâ tlô ei ta, Dânâ tawhta Sidaw lâta chahlô ei ta.

⁷ Tyre thokhy tlô ei ta, Hivi mo nata Kâna mo khih zydua chahryh ei ta, Zudâh chho lâ sie ei ta, Besebâ tlô ei ta.

⁸ Râh zydua chahryh khai ei ta, thla chaki nata noh kihna noh liata Zerusale vaw tlô ei ta.

⁹ Zôabâ ta Izarei phopi maluh pahlyhpakhypa cha abei chho ta. Izarei liata zaozi a chaba theipa pasaipha 800,000 y ei ta, Zudâh mo cha 500,000 ama châ.

¹⁰ Châhrasala chyhsa maluh a rei khai nahta, Dâvi cha a palôh liata thata a tymâ ta. Dâvi ta Abeipa hnohta, “Ei hmo taopa liata thata ei vaw molei haw. Châhrasala tahmâ he, Hy Abeipa y, ei châ haw na, châ chakaotuhpa paraona he rie pahlei ha mah y. Hru ngaitapa ta na ei vaw tao haw,” tah ta.

¹¹ My ta Dâvi a thyu nahta, Dâvi hrohsopa Kâdâ hnohta Abeipa bie vaw tlô ta,

¹² “Vawh la, Dâvi hnohta, ‘Abeipa ta hetana heta a tah: A tlyh awpa hmo miathôh cha pie na ta, miakha a tlyh aw chi ta, cha cha ei cha taopa aw, a tah na,’ tahpa ta na kei chho aw,” tah ta.

¹³ Kâdâ cha Dâvi lâ vawh ta, kei chho ta, a hnohta, “Na râh liata kô thôh chakâhna tlô awpa ma, na chariahpazy ta cha chadai ei sala thla thôh chhôh ama hmiakô liata a râ awpa ma, na râh liata noh thôh potlana charei awpa ma, a kheihawhpa ma na khoh? Nâ vaw tuahtuhpa hnohta kheihta ma ei chhy aw? A pachâ la na chho mah y,” tah ta.

¹⁴ Dâvi ta Kâdâ hnohta, “Ei nô a po ngaita. Abeipa ku liata eima pao thlu aw, ano cha zawngiah thei ngaitapa châ tlôh ta. Chyhsapa ku liata la na papaosa khah y,” tah ta.

¹⁵ Chatanachata Abeipa ta Izarei chô liata my tawhta daihti raopa taihta potlana patlôsa ta, Dânâ tawhta Besebâ taihta chyhsa 70,000 thi ei ta.

¹⁶ Vâlyuhchâpa ta parao awpa ta Zerusale lâ a ku a hy nahta, Abeipa cha hmo pha leipa tao a chhuahpa tawhta a palôh vaw nai ta, chyhsazy a pahleipadiatuhpa vâlyuhchâpa hnohta, “Â daih, na ku hy khao kha,” tah ta. Abeipa vâlyuhchâpa cha Zebu chyhsa Araunâ sawhri kiapâh liata y ta.

¹⁷ Dâvi ta chyhsa a thietuhpa vâlyuhchâpa a hmô nahta, Abeipa bie a chho ta, a hnohta, “Pachâ teh, ei vaw molei haw, a do lei ngaitapa ta hmo ei vaw tao haw. Châhrasala he mietakuzy heta khâpa hmo ma ama tao tly? Ei châ haw na, na ku cha keima chô liata tla sala, ei paw chhôhkha chô liata tla mawh sy,” tah ta.

¹⁸ Cha noh ta Kâdâ cha Dâvi lâ vawh ta, a hnohta, “Khy la, Zebu chyhsa Araunâ sawhri liata Abeipa châta maisâh kaw padua teh,” tah ta.

¹⁹ Kâdâ ta Abeipa biepiepa a chhopa hawhta Dâvi cha khy ta.

²⁰ Araunâ cha a zâ heih ta, ano lâ pangaipa ta abei nata a chakaotuhpazy amâ khy haipa hmô ta. Araunâ cha pua ta, a hmia alei lâ a khupa ta abei hmiakô liata a bôh ta.

²¹ Araunâ ta, “Khâpa vâta ei zibeipa abei cha a chakaotuhpa lâ â khypa ma a châ tly?” tah ta. Dâvi ta, “Izarei phopi tawhta potlana â pai thei nawpa ta, na sawhri hmo he chalei ta, he liata Abeipa lâta maisâh tao awpa ta ei khy,” tah ta.

²² Araunâ ta Dâvi hnohta, “Ei zibeipa abei ta pha a tahpa cha la sala hlâ mawh sy. Moh teh, raopa hlâna châta viahchao tôhpazy y ta, tho châta sawhri chhaichhizy nata viahchao raopakyzy a y.

²³ Hy abei y, he zydua he Araunâ ta abei a pie khai haw,” tah ta. Araunâ ta, “Abeipa na Khazohpa ta châ pyh mawh sy,” tah ta.

²⁴ Châhrasala abei ta Araunâ hnohta, “Châ bao va, a mâ cha pie aw na ta, a chalei tlai ta tlao ei cha chalei aw. Khâpa hmah a pahryuh leipa ta Abeipa ei Khazohpa lâta raopa hlânazy hlâ chachei ta aw va na,” tah ta. Dâvi ta sawhri hmo nata viahchao tôhpazy cha tâkâ sekel sypangawh ta chalei ta.

²⁵ Dâvi ta cha liata Abeipa châta maisâh tao ta, raopa hlânazy nata aryhna hlânazy hlâ ta. Chatanachata râh châta thlahchhâna cha Abeipa chyh-ei ta, potlana cha Izarei râh tawhta pai ha ta.