2 SAMUELA 23 - Mara Bible RV (BSI)

Dâvi bieta hnôhchaipazy

¹ Hezy he Dâvi bieta hnôhchaipazy a châ: Hezy he Zese sawchapawpa Dâvi biereipa châ ta, Â sâhpa ta cheihchalopa biereipa a châ. Zakaw Khazohpa sathawthupa biereipa châ ta, Izarei hlaphi thaipa hla phipazy a châ.

² “Abeipa Thlahpa ta keima hmâpa ta reih ta, A bie cha ei paleih liata a y.

³ Izarei Khazohpa ta reih ta, Izarei Lôpanô ta eina chho: Adona ta chyhsazy chô liata ryureihpa ta, Khazohpa china ta ryu a reihpa cha,

⁴ My noh khaihpa hawhta châ ta, Noh vaw chhi ta meihdo a y leipa my hawh a châ. Vâsua khai noh khaih pha ry liata, Alei si panyupa a kaw pyuhpa hawhta a châ.

⁵ “Ei pathlazy he Khazohpa hmiakô liata paduapa châ veih ei ma? Khazohpa ta chhâzaw biehrai ei hnohta hraih ta, Ato yzie pahneisapa ta a pa-i. Chavâta ei pachhana kih patlô leipa ta ypa ta, Ei khopa na pie leipa ta a y aw ma?

⁶ Chyhsa leilôpa zydua deikua cha, Ahloh hawhta ku ta la theipa ama châ leipa vâta, Ahloh hawhta thypa ama châ.

⁷ Ahlohzy a hriapa cha, Thua nata asei bih zy hmâpa ta, A su liata mei ta tlokhuh a rao khai ha tyh.”

Dâvi pasaiphazy

⁸ Hezy he Dâvi pasaiphazy moh a châ: Takemô chyhsa Zôsebâsebe cha pheisaih hyutuhpa pathôhzy hry liata hyutuh chaipa a châ. Ano he Ezni chyhsa Adinô tahpa ta pahnopa a châ hra. Chyhsa 800 chô liata a asei pahieh ta, ei kha ta a thie khai hapa a châ.

⁹ Pasaipha pathôhzy hry liata ano a pazipa cha, Ahôhi sawchapawpa Dôdô sawchapawpa Eliaza châ ta, a dyuh awpa ta a hmaohpakhypa Philistinâ mo chipa ta Izarei mo hnôh amâ sy nota, ano he Philistinâ mo thlahsa hlei leipa ta a pahao ngâhpa, Dâvi pasaipha pathôh hry liata pakha a châ.

¹⁰ Eliaza cha thyu ta, a ku a si khai hana taihta nata a ku zaozi liata â baipâ khai hana taihta Philistinâ mo thie ta, cha noh liata Abeipa ta pahniena rônahpa patlôsa ta, zawpizy cha athipazy hrao awpa deita ta Eliaza lâ â lie heihpa dei ama châ.

¹¹ A pazi heihpa cha Hârâ chyhsa Aki sawchapawpa Sâmâh a châ. Abie thih phi kaluhna lyu liata Philistinâ mo cha Izarei a dyuh awpa ta a pahmaoh ei ta, Izarei cha Philistinâ mo hmiakô tawhta a râpai ha ta.

¹² Sâmâh deikua cha abie thih liah khophie liata a duah ta, liahsa vaih ta, Philistinâ mo cha thie ta, Abeipa ta pahniena rônahpa a patlôsa.

¹³ Pheisaih hyutuhpa sythôhzy hry liata pathôh zu ei ta, sâh hria daihti liata Dâvi yna Adulâ lôpu za tlô ei ta. Philistinâ pheisaihzy cha Rephai saikao liata riehmo paryh ei ta.

¹⁴ Cha nota Dâvi cha thokhy chhôh liata y ta, Philistinâ pheisaihzy cha Bethlehe liata y ei ta.

¹⁵ Dâvi cha a dâhphi kaw ta, “Aw, Bethlehe liata tikhaoh ti, thokhy chhikao kiapâh liatapa kha doh awpa ta nâ piepa ama y mawh sala ei tah kaw dia!” tah ta.

¹⁶ Pasaipha pathôhzy ta Philistinâ pheisaihzy riehmo siepahliepa ta, thokhy chhikao kiapâh liata Bethlehe tikhaoh ti cha kei thaih ei ta, vaw phaoh ei ta, Dâvi lâ vaw cheih ei ta. Châhrasala doh ngâh khao leipa ta, Abeipa châta tlao patlai ta.

¹⁷ Dâvi ta, “Hy Abeipa y, he hmo he tao cheita aw va na. Ama hrona sokhâhpa ta he ti a kei thaihpa chyhsazy thisaih ei doh aw ma?” tah ta. Chavâta ti cha doh khao vei. Cha hmozy cha pasaipha pathôhzy ta ama tao.

¹⁸ Zeru sawchapawpa Abisai, Zôabâ unawhpa cha sythôh hry liata hyutuh chaipa châ ta, chyhsa 300 asei pahieh thlu ta a thie khai hapa a châ. Chavâta pasaipha pathôhzy moh pha tona liata â hlao hra.

¹⁹ Pasaipha pathôh hry liata pahlaopa a châ leipa chhao ta, âmo hlâta palyupalih tlâh viapa châ ta, Sythôh hry liata palyupalih tlâh chaipa châ ta, chavâta ama hyutuhpa ta ama tao.

²⁰ Zehôdâ sawchapawpa Benai cha Kâbaze chyhsa riahphapa châ ta, hmo rônahpazy a taotuhpa a châ. Môabâ chyhsa riahphapa pano thie ta, dâhaw tla daihti liata zu ta, khaohtlô liata chakeibarôhneipa a thiepa a châ.

²¹ Izi chyhsa hmiphapa chhao thie ta. Izi chyhsa cha asei a chaba ta, Benai deikua cha chôchahrei chabapa ta za pangai ta, Izi chyhsa asei chabapa cha chhu ta, Izi chyhsa cha ano asei ta a dysao haw.

²² Cha hmozy cha Zehôdâ sawchapawpa Benai ta tao ta, chavâta pasaipha pathôhzy hawhta moh phana a to hra.

²³ Sythôhpazy hry liata cha palyupalih tlâh chaipa châ ta, châhrasala pasaipha pathôh hry liata deikua rei pâpa châ vei. Dâvi ta Benai cha abei vaituhpazy hyutuhpa ta a rao.

²⁴ Zôabâ unawhpa Asahe cha sythôh hry liata pakha a châ hra. Ahropazy cha Bethlehe khihpa Dôdô sawchapawpa Ehânâ,

²⁵ Hârôdi chyhsa Sâmâh, Hârôdi chyhsa Elikâ,

²⁶ Pâti chyhsa Helezi, Tekô chyhsa Ike sawchapawpa Irâ,

²⁷ Anathô chyhsa Abieze, Husâ chyhsa Mebunai,

²⁸ Ahôh chyhsa Zamô, Netôpha chyhsa Mâharai,

²⁹ Netôpha chyhsa Bânâ sawchapawpa Helebi, Benzami pathla Kibia khihpa Ribai sawchapawpa Itai,

³⁰ Pirathô chyhsa Benai, Kâsi vahtiepazy liata a pahrâpa Hidai,

³¹ Abâthi chyhsa Abiabô, Bahuri chyhsa Azamâve,

³² Sâbô chyhsa Eliabâ, Zase sawchapawpa Zawnathâ,

³³ Hârâ chyhsa Sâmâh, Hârâ chyhsa Sârâri sawchapawpa Ahiama,

³⁴ Mâkâ chyhsa Ahâsabai sawchapawpa Eliphele, Kilô chyhsa Ahitôphe sawchapawpa Eliami,

³⁵ Kâmel chyhsa Hezrô, Arabi chyhsa Pârai,

³⁶ Zôbâ khihpa Nâthâ sawchapawpa Ikâ, Kâdâ chyhsa Bâni,

³⁷ Amawna chyhsa Zele, Zeru sawchapawpa Zôabâ chariah chhaichhi chabatuhpa Berô chyhsa Nâharai,

³⁸ Ithari chyhsa Irâ, Ithari chyhsa Kâre nata

³⁹ Hiti chyhsa Uria zy ama châ. Ama zydua ta sythôh nata pasari ama châ.