2 SAMUELA 22 - Mara Bible RV (BSI)

Dâvi pachhana hla

¹ Dâvi cha a chariahpa zydua ku tawhta nata Sawla ku tawhta Abeipa ta a pachha noh ta, he hla biezy he hmâpa ta Abeipa reithai ta:

² “Abeipa cha ei lôpanô châ ta, Ei thokhy nata nâ pachhatuhpa a châ.

³ Khazohpa cha ei lôpanô châ ta, Ei chhaina nata ei vyhphao a châ. Ei pachhana ki nata ei thokhy a sâhpa châ ta, Ei chhaina nata nâ pachhatuhpa a châ. Thachahra thyuna tawhta eina pachha ha chi.

⁴ Reithai tlâh Abeipa cha pado na ta, Ei chariahpazy tawhta pachhapa ta ei y.

⁵ Thina tichatlaopazy ta na vao ta, Raona tily ta eina phaoh.

⁶ Athihkhih chaorizy ta na chahry ta, Thina khoheihzy ta eina chadô.

⁷ Nôpopa ta Abeipa cha pado na ta, Ei Khazohpa tlai cha ei aw. Achhyna o tawhta ei ao thei ta, Ei awna ao a nah liata â ngia.

⁸ “Alei he a chathopa ta a chalyu ta, A hie a hâhpa vâta, Avâzy abôna a chachhao ta â sih.

⁹ A hnapasu tawhta meikhuh puapa ta, A pakah tawhta meipaleih pua ta, Ano tawhta meiia a vaw pua.

¹⁰ Avâzy pahnaipa ta za chô ta, A phei ry liata zoh kaluhna a y.

¹¹ Cherubi chô liata kiapa ta a zaw ta, Thlih mathlawzy chô liata ama hmô.

¹² Zohna cha a vâphuh ta a khu ta, Vâti meihdo chhapazy â chadôsa.

¹³ A hmiakô liata khaihna tawhta, Mei paleihzy a vaw pua.

¹⁴ Abeipa cha avâ tawhta a vaw thua ta, Chônôchaipa ta a ao a papua.

¹⁵ Châtaizy kapa ta âmo cha papai ta, Dôhla chakeihsa ta a chadaipai ha ei.

¹⁶ Abeipa ta ra ta, A hnapasu hu a tôpa vâta, Tilaipi khaoh a vaw lâ ta, Khizaw abônazy â lâ khai.

¹⁷ “Chô lâ tawhta za pazapa ta na patu ta, Tisaih tawhta einâ daophi.

¹⁸ Ei chariah thatlôpa tawhta na pachha ta, Nâ haotuhpazy tawhta eina pachha, Ei châta ama tha a tlô tupa vâta.

¹⁹ Vâchhiena ei tyh noh ta na tei lao ei ta, Châhrasala Abeipa cha nâ baotuhpa a châ.

²⁰ Ei chô liata â lypa vâta, Na pachha ta, Su kawhpa lâ einâ chhi haw.

²¹ “Ei sianazie hawhta Abeipa ta ei chô liata tao ta, Ei ku pathaihnazie hawhta lymâ eina pie.

²² Abeipa lâpizy a chhih na ta, Ei Khazohpa a heihsaipa ta moleina hmo tao beih va na.

²³ A ryureina zydua ei hmiakô liata y ta, A bieraopazy a heihsai beih va na.

²⁴ A hmiakô liata seina hnei leipa na ta, Thaileichâna tawhta keimasasyh ta ei pabohsa.

²⁵ Chavâta Abeipa ta ei sianazie hawhta lymâ na pie ta, A mohmô liata ei pathaihnazie hawhta lymâ eina pie.

²⁶ “Zawngiah theipa hnohta zawngiahna palâsa chi ta, Seina hnei leipa hnohta seina hnei leipa na châna na palâsa.

²⁷ Pathaihpa hnohta na pathaihna palâsa chi ta, Piehpiepa cha a piehpiena hawhta na hrie tyh.

²⁸ Areisipa pachha chi ta, Akhotlâhpa deikua cha, Moh pahroh chi ta na panawh tyh.

²⁹ “Hy Abeipa, ei meiôh châ chi ta, Abeipa ta ei zohna a pakhaihsa tyh.

³⁰ Na baona ta pheisaihzy chanaoh na ta, Ei Khazohpa baona ta thokhy ei zawpakhô.

³¹ “He Khazohpa lâpi cha phapaki ta, Abeipa bie cha â dozie pasia hapa châ ta, Ano a chhaituhpa zydua châta vyhphao a châ.

³² “Abeipa dei leipa ta ahy ma Khazohpa a y? Eima Khazohpa dei leipa ta ahy ma lôpanô a y?

³³ Khazohpa cha ei thokhy a ipa châ ta, Ei lâpi a patlâsatuhpa a châ.

³⁴ Ei pheizy sakhih phei hawhta tao ta, Su sâhpazy liata â bohpa ta eina paysa.

³⁵ Ei kuzy he adyuhna châta pachu ta, Ei bâhzy ta dawh libaw â kei thei.

³⁶ Na pachhana vyhphao na pie chi ta, Nâma nônaina cha keima rônahna a châ.

³⁷ Ei phei chakâna su pakawh chi ta, Ei pheizy a chakhao beih vei.

³⁸ Ei Chariahzy a chadai ei na ta, Ei pahleipadia ha ei; Palâ khaipa ama châ hlâlei cha, A lie va na.

³⁹ Palâ ei na ta, Ei chhawh pathlah ha ei; Thyu khao veih ei, Ei phei ry liata ama pao haw.

⁴⁰ Adyuhna châta thatlôna ta ei chai na saih chi ta, Nâ thyuhnaopazy ei ry liata na panawh ei.

⁴¹ Ei chariahpazy kei tawhta parâpaisa chi ta, Nâ haotuhpazy ei pahleipadia ha ei.

⁴² Mohmia pasaih ei ta, A pachha awpa y veih ei; Abeipa aw ei ta, Châhrasala âmo a chhy vei.

⁴³ Alei dohlei hawhta phy padi ei na ta, Khiliah chiatlao hawhta tly ei na ta ei pazao khai ha ei.

⁴⁴ “Ei phopi ta eina teina tawh ei ta na pachha chi ta, Râhzy chhituhpa châ awpa ta na pabohsa chi ta, Ei pahno beih leipa phopi ta eina chakao ei.

⁴⁵ Chihropazy ei ry a vaw daoh ei ta, Ei bie ama theipa nahta ei rei amâ ngiah lymâ.

⁴⁶ Chihropazy ama palôh chhâ ta, Chalyuna chôta ama thokhyzy tawhta ama vaw pua.

⁴⁷ “Abeipa cha hroh ta, Ei lôpanô cha reithaipa ta y mawh sy; Ei Khazohpa cha palyupalihpa ta y sala, Ei pachhana lôpanô cha palyupalihpa ta y mawh sy.

⁴⁸ Ano cha phuh nâ lapatuhpa Khazohpa châ ta, Phopizy ei ry liata panawh ta,

⁴⁹ Ei chariahzy tawhta nâ chhi papuatuhpa a cha. Nâ thyuhnaopazy chô lâta na chalo chi ta, Thachahra a hmâhpa chyhsazy tawhta eina pachha ha chi.

⁵⁰ “Cha vâna chata Hy Abeipa, Phopizy hry liata cha reithai aw na ta, Na moh reithaina hla ei sa aw.

⁵¹ Abeipa cha ano paduapa bei hnohta pachhana rônahpa pie ta, A sathawthupa Dâvi nata a pathlazy chô liata, Zawngiahna chhâzaw ta a palâsa.”