2 SAMUELA 21 - Mara Bible RV (BSI)

Kibiô mo chô liata phuh lana

¹ Dâvi ryureina daihti liata, â zaopa ta kô thôh chakâhna tlô ta. Dâvi ta Abeipa hmia pado ta. Abeipa ta, “Sawla ta Kibiô mo a thiepa vâta, ano nata a chhôhkha chô liata thisaih maoh a y,” tah ta.

² Abei ta Kibiô mo cha aw ta, bie a chho ta. Kibiô mo he Izarei pathlazy châ leipa ei ta, Amawri mo laibâhpazy châ ei ta. Âmo he cha pahlôh awpa ta Izarei sawzy ta bie amâ vaw taih hapa a châ. Sawla ta Izarei pathlazy nata Zudâh pathlazy châta phahnai â ngiah tuna liata Kibiô mo cha pamua khai ha awpa â vaw chhuahpa a châ.

³ Dâvi ta Kibiô mo hnohta, “Khâpa ma ei cha taopa aw ei? Abeipa ryuto râh he byhnâ nama awpa thei nawpa ta, kheihta ma chatlaina ei tao aw?” tah ta.

⁴ Kibiô mo ta a hnohta, “He hmo he Sawla nata a chhôhkha nata keimo likah liata tâkâ nata ngôh lâ kyh châ vei. Izarei râh liata chyhsa pakha hmahta thie a chhuah hra ma pi,” tah ei ta. Dâvi ta, “Nama reipa maih ei cha taopa aw ei,” tah ta.

⁵ Kibiô mo ta abei hnohta, “Miah a palâ khai hapa nata Izarei râh liata eima y hra lei nawpa ta miah pamua a chhuahpa chyhsa kha,

⁶ a sawchapawpa pasarizy miah vaw pie la, Abeipa ta â tlyhpa Sawla khih Kibia liata Abeipa hmiakô ta eima paaosao aw,” tah ei ta. Abei ta, “Ei cha pie aw ei,” tah ta.

⁷ Châhrasala Dâvi nata Zawnathâ cha bie a taih ei ta, ama likah liata Abeipa liata bietai a ypa vâta, abei ta Sawla sawchapawpa Zawnathâ sawchapawpa Mephibôse cha pahlôh ta.

⁸ Rizpâ sawchapawpa pano, Amôni nata Mephibôse nata Mikâli sawchapawpa papangawh zy a chhi ta. Rizpâ he Aihza sawchanô châ ta, Sawla liata a sapa a châ. Mikâli he Sawla sawchanô châ ta, a sawchapaw papangawhpazy he Mehôlâ chyhsa Bâzilai sawchapawpa Adari liata a sapazy ama châ.

⁹ Âmo cha Kibiô mo ku liata pie ta, Abeipa hmiakô liata tlâh liata paaosao ei ta. Ama pasari ta hmaohkha ta ama thi haw. Âmo he sâh hria daihti noh hmiatuapa lâ, bâli sâh hria pathao daihti liata thiepa ama châ.

¹⁰ Aihza sawchanô Rizpâ cha latho poh la ta, lôpanô chô liata phaw ta, sâh hria a thao daihti tawhta cha liata y ta, avâ lâ tawhta avâ a vaw suana taihta y ta. Nohchhô ta vâ pavawzy ta lôpanô chô liata amâ cho awpa pasaih leipa ta, zâ ta lyurâhpa sazy ta a chô liata ama y awpa chhao pasaih hra vei.

¹¹ Sawla nôtho Aihza sawchanô Rizpâ hmotaopa cha Dâvi chho ei ta.

¹² Dâvi cha sie ta, Sawla ruzy nata a sawchapawpa Zawnathâ ruzy cha Zabekilia lâ za la ta. Philistinâ mo ta Kibô liata Sawla ama thie noh ta, Sawla nata Zawnathâ cha Besâ bypi liata bangieh ei ta, cha tawhtapa cha Zabekilia mo ta arulâta ama ri ama vaw lapa kha a châ.

¹³ Sawla ruzy nata a sawchapaw Zawnathâ ruzy cha Zabekilia tawhta kaw phaoh ta, ama paaosaopazy ru chhao pakhy ei ta.

¹⁴ Sawla ruzy nata a sawchapawpa Zawnathâ ruzy cha Benzami râh Zelâ khih liata a paw Kisâ thlâ liata pabu ei ta. Abei biepiepa zydua tao lymâ ei ta. Cha khai tawhta cha, Khazohpa ta râh châta thlahchhâna cha chyh-ei ha ta.

Philistinâ mo nata adyuhna

¹⁵ Philistinâ mo ta Izarei a dyuh heih ei ta. Dâvi cha a chyhsazy chhaota zu ta, Philistinâ mo cha zâ dyuh ei ta. Dâvi cha a thachhâ kaw ta.

¹⁶ Mopahreihpa pathlazy hry liata Isbibenô ta Dâvi cha thie a chhuah ta. Isabibenô asei cha dawh sekel za thôh a hripa châ ta, zaozi thiehpa a vao ta.

¹⁷ Châhrasala Zeru sawchapawpa Abisai ta pachha ta, Philistinâ chyhsa cha a dyuh ta, thie ha ta. Dâvi chyhsazy ta, “Izarei meiôh na pachhai lei nawpa ta, adyuhna lâ eima hnohta pua khao cheita aw va chi,” tahpa ta a hnohta bie a taih ei ta.

Dâvi chakaotuhpazy ta mopahreihpazy ama thie

¹⁸ Cha khai tawhta, Philistinâ mo nata adyuhna Kôbi khih liata y heih ta. Husâ chyhsa Sibekai ta mopahreihpa pathlazy hry liatapa Sâphi cha thie ta.

¹⁹ Philistinâ mo nata Kôbi khih liata adyuhna y heih ta, Bethlehe khihpa Zareôreki sawchapawpa Ehânâ ta Kiti khihpa Kôliathâ cha thie ta, a asei bih cha thaisana bâtlâh hawhta a châ.

²⁰ Kâthâ liata adyuhna y heih ta. Cha khihpi liata chyhsa mopahreih ngaitapa, a ku chavei chachâh kuparo miacharu hnei ta, a phei chavei chachâh ta pheiparo miacharu a hneipa, a zydua ta kuparo nata pheiparo mia kih nata miapalih a hneipa y ta. Ano chhao cha mopahreihpazy pathla châ ta.

²¹ Cha chyhsa chata Izarei sawzy cha pahao ta, Dâvi unawhpa Simei sawchapawpa Zawnathâ ta a thie haw.

²² Cha papalihpazy cha Kâthâ khihpi liata mopahreihpa pathlazy châ ei ta, Dâvi ku ta nata a chakaotuhpazy ku ta ama thi khai haw.