2 SAMUELA 20 - Mara Bible RV (BSI)

Sebâ adyuhna

¹ Cha liata Benzami chi Bikhari sawchapawpa a moh Sebâ ama tahpa chyhsa leilôpa pakha y ta, ano chata chiahmie tô ta, “Dâvi liata tovyuh hnei leipa pi ta, Zese sawchapawpa liata ryuto hnei ma pi; Hy Izarei, nama poh o chyu lâta a di teh u!” tah ta.

² Chatanachata Izarei chyhsa zydua ta Dâvi ama pazipa cha a liesaipa ta, Bikhari sawchapawpa Sebâ cha pazi ha ei ta. Zudâh mo deikua cha ama bei a bai ei ta, Zawdâh tawhta Zerusale taihta pazi ei ta.

³ Dâvi cha Zerusale liata a o kei tlô ta, abei ta o hâ awpa ta a nôtho a sopa pahrawhzy kha a chhi ta, o kha liata soh pakhy ta, âmo cha a chyh pazao lymâ ei. Ama hnohta deikua a ngia khao vei. Ama thi noh taihta khawhlôhpa ta y ei ta, ama vahpa a hroh thlâh hana chôta nôhmeipa ta ama y.

⁴ Abei ta Amâsâ hnohta, “Noh thôh chhôh ta Zudâh chyhsazy na awpa la, nâ chhao y hra mah y,” tah ta.

⁵ Amâsâ cha Zudâh mozy awpakhy awpa ta sie ta, anodeikua a daihti raopa hlâta hawh via ha ta.

⁶ Dâvi ta Abisai hnohta, “Bikhari sawchapawpa Sebâ heta Absalaw hlâta eima chô liata chhiena a tlôkhei via aw. Na zibeipa chakaotuhpazy he a chhi la, a kei chadai teh. Chataleipatala thokhy hneipa khihpizy liata a ngia hmâ aw ta, eima mohmô tawhta â râ pathlah pathlei aw na,” tah ta.

⁷ Zôabâ chyhsazy, Kere mo, Pele mo nata pasaipha zydua ta Sebâ cha a chadai ei ta. Bikhari sawchapawpa Sebâ a chadai awpa ta Zerusale tawhta pua ei ta.

⁸ Kibiô liata lôpanô yna ama kei tlô nahta, Amâsâ ta âmo cha vaw dy ta. Zôabâ cha adyuhna chhaichhi a tobi ta, a chô liata zaozi a vaopa ta chaisaihna liata a saih ta, a sie nota tla ha ta.

⁹ Zôabâ ta Amâsâ hnohta, “Ei unawhpa, na pha ma?” tah ta. Zôabâ cha Amâsâ a pahnâ a chhuahpa ta, a ku chachâh lâta a kâhhmi kei patu ta.

¹⁰ Zôabâ ku liata zaozi a ypa cha Amâsâ ta hmô leipa ta, Zôabâ ta Amâsâ cha a py liata dy ta, a rihzy puapa ta alei lâ tla ta, dy chanei byuh leipa ta thi ha ta. Zôabâ nata a unawhpa Abisai ta Bikhari sawchapawpa Sebâ cha a chadai lymâ ei ta.

¹¹ Zôabâ chakaotuhpazy hry liata thyutliapa pakha cha Amâsâ ri kiapâh liata a duah ta, “Zôabâ chhâh a châpa nata Dâvi chyhsa maihta Zôabâ pazi mawh sy,” tah ta.

¹² Amâsâ cha lâlai liah liata a thi chhaota a thy thlâh ha ta. A chapiapa maihta Amâsâ ri cha ama hmô nahta a duah lymâ ei ta. Amâsâ ri yna a vaw tlôpa maihta amâ duah lymâpa cha, thyutliapa ta a hmô nahta, a ri cha lâlai tawhta lyurâhpa lâ pasie ta, poh ta khu ta.

¹³ Amâsâ ri cha lâlai tawhta pasiepa a châ tawhta, Bikhari sawchapawpa Sebâ a chadai awpa ta chyhsa zydua ta Zôabâ cha pazi ei ta.

¹⁴ Sebâ cha Abela Bemâkâ taihta Izarei chi zydua chahryh khai ta, Beri mo zydua chhao tly khai ta. Beri mo chhao cha a hmaohpakhy ei ta, Sebâ cha pazi ha hra ei ta.

¹⁵ Zôabâ nata a pheisaihzy ta Sebâ cha Abela Bemâkâ khihpi liata dôh ei ta, a khih cha alei pacho thlu ei ta, alei cha khôtho thokhy liata kaw pacho ei ta. Zôabâ hnohta chyhsa a ypa zydua ta, thokhy cha papao awpa ta thata a chô ei ta.

¹⁶ Chanô sopa pakha ta khihpi tawhta vaw awh ta, “Nathlie teh u! Nathlie teh u! Ngiachhiepa ta Zôabâ chho teh u, a vaw hnia sala, a hnohta bie ei vaw reih aw,” tah ta.

¹⁷ Zôabâ cha a kei hnia ta, chanô ta, “Zôabâ na châ ma?” tah ta. Ano ta, “Ei châ,” tah ta. Chanô ta a hnohta, “Na seichanô bie reipa he vaw nathlie mah y,” tah ta. Ano ta, “Ei nathlie na,” tah ta.

¹⁸ Chanô ta “Hlâno ta cha, ‘Abela liata ryhraona tlua teh u,’ tah ei ta, biepeipa ama pathlâ tyh.

¹⁹ Kei he Izarei liata aryhna a khohpa nata chyhsa ngâchhihpazy hry liata a hlaopa ei châ. Nâ deikua cha Izarei nô a châpa khihpi parao nâ chhuah. Abeipa ryuto he khazia parao khai ha awpa nâ chhuah tly?” tah ta.

²⁰ Zôabâ ta a chhy ta, “Cha hawhta châ vei, châ cheita vei. Palâ khai awpa tlyma, parao awpa tlyma a chhuah tiarâh va na.

²¹ Cha hawhpa lâ kyh cha châ vei. Epharai tlâh râh liata chyhsa pakha, Bikhari sawchapawpa a moh Sebâ ama tahpa ta, Bei Dâvi a dyuhpa ta a ku hy ta, ano cha na vaw pie u la, khihpi he ei sysai ha aw,” tah ta. Chanô ta Zôabâ hnohta, “Moh tua, thokhy khôtho lâ a luh ei cha vaw thypa aw,” tah ta.

²² Chanô cha a sona hmâpa ta zawpi zydua pahnie awpa ta sie ta. Bikhari sawchapawpa Sebâ luh cha tai ei ta, Zôabâ lâ vaw thy ei ta. Zôabâ ta chiahmie tô ta, pheisaihzy cha khihpi tawhta pai ei ta, ama poh o chyu lâta a di ha ei ta. Zôabâ chhao cha Zerusale liata abei lâ a lie ha heih ta.

Dâvi chakaotuhpazy

²³ Zôabâ cha Izarei pheisaih zydua hyutuhpa châ ta, Zahôdâ sawchapawpa Benai cha Kere mo nata Pele mo hyutuhpa a châ.

²⁴ Adôrâ cha ku raihriatuhpazy hyutuhpa châ ta, Ahilu sawchapawpa Zehôsaphâ cha thâtih rohtuhpa a châ.

²⁵ Sevâ cha chârohtuhpa châ ta, Zadô nata Abiathâ cha theihthaipazy ama châ.

²⁶ Zairi chyhsa Irâ cha Dâvi theihthaipa a châ.