2 SAMUELA 2 - Mara Bible RV (BSI)

Zudâh bei châta Dâvi sathawthuna

¹ Cha hnôh lâ liata hetana heta vaw châ ta, Dâvi cha Abeipa a saohiah ta, “Zu­dâh khihpi miakha lâ chhâ ei khy aw ma?” tah ta. Abeipa ta a hnohta, “Khy mah y,” tah ta. Dâvi ta, “Khataih lâ ma ei khy aw?” tah ta. Abeipa ta, “Hebraw lâ,” tah ta.

² Chatanachata Dâvi cha a lapinô pano, Zezari zuah Ahinô nata Nâbâ ta a panôhmeipa Kâmel zuah Abikai chhaota Hebraw lâ cha khy ta.

³ Dâvi ta a hnohta a ypa a pheisaihzy cha ama chhôhkhazy chhaota a chhi ta, Hebraw khihpizy liata pahrâ ei ta.

⁴ Zudâh chyhsazy a vy ei ta, cha liata Dâvi cha Zudâh pathlazy chô liata bei châ awpa ta sathaw ama thu. “Sawla ri cha Zebekilia mo ta ama pabu,” tahpa ta Dâvi cha chho ei ta,

⁵ Dâvi ta Zabekilia mo lâ chyhsa tuah ta, ama hnohta, “Nama zibeipa Sawla chô liata nama ngâchhihna palâsapa ta, a ri nama pabupa vâta Abeipa ta byhnâ cha pie mawh ei sy.

⁶ Abeipa ta nama chô liata phana nata ngâchhihna palâsa mawh sy! He hmo nama taopa vâna heta, kei chhao ta phana ta ei cha thô aw ei.

⁷ Chavâta tahmâ nama kuzy thatlôpa ta y sala, riahphapa ta y teh u. Nama zibeipa Sawla cha thi ha ta, Zudâh pathlazy ta ama bei châ awpa ta kei he sathaw eina thu ei hih,” tah ta.

Abane ta Isabôse Izarei bei ta a tao

⁸ Cha nota, Sawla pheisaih hyutuhpa, Nerâ sawchapawpa Abane ta Sawla sawchapawpa Isabôse cha Mâhanai lâ a chhi ta.

⁹ Kilia chô liata zy, Asuri mo chô liata zy, Zezari chô liata zy, Epharai chô liata zy, Benzami chô liata nata Izarei zydua chô liata bei ta tao ta.

¹⁰ Sawla sawchapawpa Isabôse cha Izarei chô liata ryu a rei pathao nota kô sypalihpa châ ta, kô no ryureih ta. Zudâh pathlazy deikua cha Dâvi pazi ei ta.

¹¹ Dâvi ta Hebraw liata Zudâh pathlazy chô liata ryu a reina cha kô sari nata thla charu vaw châ ha ta.

Kibiô liata adyuhna

¹² Nerâ sawchapawpa Abane nata Saw­la sawchapawpa Isabôse chakaotuhpazy cha Mâhanai tawhta pua ei ta, Kibiô lâ sie ei ta.

¹³ Zeru sawchapawpa Zôabâ nata Dâvi chakaotuhpazy chhao vaw pua ei ta, Kibiô tipo liata a kei tyh ei ta. Tipo haosâ lâ hlao kha a tyuh ei ta, tipo hesâ lâ hlao kha a tyuh ei ta.

¹⁴ Abane ta Zôabâ hnohta. “Satliazy thyu ei sala, eima hmiakô liata a taopasua tua ei se,” tah ta. Zôabâ ta, “Thyu ei se,” tah ta.

¹⁵ Chatanachata thyu ei ta, maluh â khopa ta, Benzami nata Sawla sawchapawpa Isabôse tawhta pahrawh hleino, Dâvi chakaotuhpazy tawhta pahrawh hleino vaw pua ei ta.

¹⁶ Amâ supa chyu ta ama luh ta a patu ei ta, amâ supa cha zaozi ta ama kâ liata dy ei ta, pao khoh ha ei ta. Chavâta cha su cha Hekâhazuri tahpa a châ. Kibiô liata a y.

¹⁷ Cha noh ta amâ dyuhna cha ru ngaita ta. Abane nata Izarei pheisaihzy cha Dâvi chakaotuhpazy hmiakô liata pahniepa ta y ha ei ta.

¹⁸ Cha liata Zeru sawchapawpa pathôh, Zôabâ, Abisai nata Asahe zy y ei ta. Asahe cha sakhih tlu ta phei chatliepa a châ.

¹⁹ Asahe ta Abane cha a chadai ta, Abane â chadaina tawhta chachâh lâ tlyma, chavei lâ tlyma tlei leipa ta, a chadai lymâ ta.

²⁰ Abane cha a vaw heih ta, “Nâma ma na châ, Asahe?” tah ta. Asahe ta, “Keima na ei châ,” tahpa ta a chhy ta.

²¹ Abane ta a hnohta. “Na chachâh lâ tlyma, na chavei lâ tlyma kha tlei la, satlia pakha patu la, a chariah chhaichhi kha chhu teh,” tah ta. Châhrasala Asahe ta ano â chadaipa cha tleisai khoh leipa ta.

²² Abane ta Asahe hnohta, “Nâ chadai khao leipa la, na tleisai ha mah y. Khazia cha dysao aw na ta, alei liata ei cha papao aw? Kheihta ma na unawhpa Zôabâ hmia ei hmô ngâh khao aw?” tah ta.

²³ Châhrasala tleisai khoh hlei leipa ta. Chavâta Abane ta asei luh lâta a py liata dy ta, asei ta a ky chhô pahlie ta, cha liata pao ta, cha su liata thi ha ta. Asahe pao ta a thina su a vaw tlôpa maihta a chalihpa ta a duah ei ta.

²⁴ Zôabâ nata Abisai ta Abane cha a chadai lymâ ei ta, Âmâ tlâh ama tlô nahta, noh tla ha ta. Âmâ tlâh cha Kibiô râhchawhpa pangaina lâpi liata Kiâ khih tlô chy liata a ypa a châ.

²⁵ Benzami pathlazy cha Abane hnohta a pahmaoh ei ta, hlao kha ta y ei ta, tlâh laki liata yna paryh ei ta.

²⁶ Abane ta Zôabâ cha awsao ta, “Zaozi cha chhâzaw ta ma a thie ngâ thlâh ha aw? A chhâna cha pachârôhna deita a châ aw tahpa pahno va chi ma? Khachâ ma zawpizy kha ama unawhzy amâ chadaina tawhta pakuasa awpa ta chho leipa ta na y aw?” tah ta.

²⁷ Zôabâ ta, “Khazohpa hrona reipa ta ei reih, bie a reih leipa châ la cha, pheisaihzy heta ama unawhzy cha mylâ mydi taihta chadai amâ chhuahpa a châ,” tah ta.

²⁸ Chatawhcha Zôabâ ta chiahmie tô ta, pheisaih zydua a chalih ei ta, Izarei cha a chadai khao leipa ei ta, a dyuh khao veih ei.

²⁹ Abane nata a pheisaihzy cha Arabâ siepahliepa ta azozâkhihdei sie ei ta. Zawdâh chaka ei ta, my râh zydua sie ei ta, Mâhanai kei tlô ei ta.

³⁰ Zôabâ cha Abane â chadaina tawhta a lie ta, zawpi zydua pahmaoh ta, Asahe rei leipa ta, Dâvi chakaotuhpazy pahrawh hleichaki ta a ki leipa ei ta.

³¹ Dâvi chakaotuhpazy ta Abane pheisaih Benzami mo cha maluh 360 thie ei ta.

³² Asahe ri cha la ei ta, Bethlehe liata a paw thlâ liata pabu ei ta. Zôabâ nata a pheisaihzy cha azozâkhihdei sie ei ta, Hebraw ama tlô nahta khihdei ha ta.