2 SAMUELA 19 - Mara Bible RV (BSI)

Zôabâ ta Dâvi a chhorei

¹ Chatawhcha Zôabâ hnohta, “Pachâ tua, abei ta Absalaw cha chakhei ta mâchhie a sa,” tahpa ta chho ei ta.

² Zawpizy ta, “Abei cha a sawchapawpa vâta a tao kaw na,” tahpa ama theipa vâta, cha noh ta ama pahniena cha chyhsa zydua châta mâchhiesana tlao châ ha ta.

³ Pheisaihzy cha adyuhna liata ama nawhpa vâta ama nozapa ta arulâta amâ râpa hawhta, cha noh liata cha arulâta khihpi a ngia ei ta.

⁴ Abei cha a hmia a chahu ta, “Hy ei sawchapawpa Absalaw, Hy Absalaw y, ei sawchapawpa, ei sawchapawpa y!” tahpa ta aoh tlili ta cha ta.

⁵ Zôabâ cha abei o lâ a vy ta, abei lâ a ngia ta, a hnohta, “Tanoh cha, nâma hrona nata na sawchapawzy nata na sawchanôzy hrona nata na lapinôzy nata na nôthozy hrona a pabohsatuhpa châ chakaotuhpazy hmia cha, nozana ta na khu ha ei hih.

⁶ Châ haotuhpazy kyhpachâ chi ta, kyh châ pachâtuhpazy hmâchhâh tlao nâ hao ha ei. Pheisaih hyutuhpazy nata châ chakaotuhpazy pi he na châta khâpa hmah vaw châ ma pi tahpa tanoh ei pahno haw. Tanoh he Absalaw hroh sala, keimo zydua he thi khai ha ei sih la, cha cha nâ lynazie a châ tahpa tanoh ei pahno haw.

⁷ Chavâta thyu la, a kei luah la, châ chakaotuhpazy châta thlalôhna bie kei reih teh. Nâ luah vei khiahta la, Abeipa liata ei rei ngâh, chyhsa pakha hmah tazâ na hnohta y khao aw veih ei. Cha cha na thyudyu tawhta tahmâ taihta na chô liata hmo pha leipa a vaw tlôpa zydua hlâta na châta a pha lei via aw,” tah ta.

⁸ Chatawhcha abei cha thyu ta, thokhy chhikao liata a kei tyuh ta. “Moh teh u, thokhy chhikao liata abei â tyuh huh,” tahpa ta zawpi zydua cha chho ei ta. Zawpi zydua abei hmiakô lâ a vy ei ta. Izarei sawzy deikua cha ama poh o chyu lâta a râ ha ei ta.

Dâvi Zerusale lâ a kua

⁹ Chatawhcha Izarei chi zydua liata zawpi zydua cha a eichhia ei ta, “Abei ta eima chariahpazy ku tawhta miah pachha ta, Philistinâ mo ku tawhta miah a pachha haw. Tahmâ Absalaw vâta, he râh tawhna heta a râ ha ta.

¹⁰ Eima bei châta sathaw eima thupa Absalaw hra cha adyuhna liata thi ha ta, khazia abei aw pakhua awpa kyh kawh kha chhao nama rei vei?” tah ei ta.

¹¹ Bei Dâvi ta theihthaipa Zadô nata Abiathâ lâ chyhsa tuah ta, “Zudâh machâzy hnohta, abei ta hetana heta a tah: ‘Abei he a o lâ a chhi pakhua heih nawpa kyh liata, khazia a reih hawh chaipa châ namâ chhuah? Izarei zydua ta abei he a o lâ a chhi pakhua awpa kyh ama reipa abei kô a vaw tlô haw.

¹² Nâmo cha ei unawhzy châ ei chi ta, ei rupa nata ei sapa mah nama châ tâh, abei a chhi pakhua heih nawpa kyh liata, khazia a reih hawh chaipa nama châ aw?’ nama kei tah aw.

¹³ Amâsâ hnohta chhao, abei ta, ‘Ei rupa nata ei sapa châ va chi ma? Zôabâ vyuhpa ta ei hmiakô liata pheisaih hyutuhpa ta ei cha tao leipa khiahta la, Khazohpa ta ei chô liata tao sala, cha hlâta pasa viapa chhao ta tao mawh sy,’ a tah na nama kei tah aw,” tah ta.

¹⁴ Chatanachata Zudâh chyhsa zydua palôh cha chyhsa pakha palôh hawhta pahei ha ta, abei cha bieta ei ta, “Vaw kua ha mah y, nâ nata châ chakaotuhpazy kha vaw kua ha muh vy,” tah ei ta.

¹⁵ Chatanachata abei cha vaw kua ta, Zawdâh vaw tlô ta. Zudâh mo cha abei dy awpa nata Zawdâh chaka khei awpa ta Kilkal lâ a vy ei ta.

¹⁶ Bahuri khihpa Benzami chyhsa Kerâ sawchapawpa Simei cha a para ngaitapa ta Bei Dâvi dy awpa ta Zudâh mo hnohta zu hra ta.

¹⁷ A hnohta Benzami chyhsa sâh kha zu ei ta. Sawla chhôhkha chakaotuhpa Zibâ chhao a sawchapaw pahrawh hleipangawh nata a chakaotuhpa pakih chhaota abei hmia lâta Zawdâh lâ a chatliepa ta zu hra ta.

¹⁸ Abei chhôhkha nata hmobaohzy balyh ta paly lymâ ei ta, abei khopa maih tao lymâ ei ta. Bei Davi Zawdâh a chaka chy ta, Kerâ sawchapawpa Simei cha a hmiakô liata â khu lâta pao ta,

¹⁹ abei hnohta, “Ei zibeipa heta thailei a châpa ta na rao leipa sala, ei zibeipa abei ta Zerusale a puasai nota châ chakaotuhpa heta â do lei ngaitapa ta ei vaw tao hapazy kha a thei thlâh ha leipa sala, abei ta a palôh liata rie a vao khah sy.

²⁰ Châ chakaotuhpa heta ei molei haw tahpa pahno na ta, chavâta ei zibeipa abei dy awpa ta Zawsi chhôhkha zydua tawhta tanoh a zu tua chaipa ei châ hih,” tah ta.

²¹ Zeru sawchapawpa Abisai ta a chhy ta, “Abeipa sathawthupa chô liata chhie a sapa vâna khata, Simei he thie awpa châ vei ma?” tah ta.

²² Dâvi ta, “Nâmo Zeru sawchapawpa saih u, kheihta ma ei cha tao aw ei tly? Khazia tanoh he nâ dyuhtuhpa nama châ tly? Tanoh he Izarei liata chyhsa thie awpa noh a châ ma? Tanoh he Izarei chô liata abei ei châ tahpa pahno va na mâ?” tah ta.

²³ Abei ta Simei hnohta, “Thi aw va chi,” tah ta. Abei ta Simei cha bie a taih ta.

²⁴ Sawla samohpa Mephibôse cha abei dy awpa ta zu ta. Abei a pua noh tawhta thlalôhpa ta â vaw lie heih noh taihta, a pheizy mohôh leipa ta, a hmaohmi chhao ngyu leipa ta, a chysiazy chhao pasu hra vei.

²⁵ Abei dy awpa ta Zerusale a vaw tlô nahta, abei ta a hnohta, “Mephibôse, khazia ei hnohta na vaw sie hra vei?” tah ta.

²⁶ Ano ta a chhy ta, “Ei zibeipa, Hy abei y, nâ chakaotuhpa ta eina dôpa vâta a châ. Châ chakaotuhpa heta, ‘Abei hnohta ei sie hra aw, ei kia awpa alâ ky na padiapa para teh,’ tah na ta. Châ chakaotuhpa he pheisypa châ tlôh na ta.

²⁷ Châhrasala nâ chakaotuhpa ta châ chakaotuhpa he ei zibeipa abei lâta â do leipa ta eina leih hapa tlao a châ. Ei zibeipa abei cha Khazohpa vâlyuhchâpa hawhta châ chi ta, pha na tahpa hawhta tao mah y.

²⁸ Ei paw chhôhkhapa zydua cha ei zibeipa abei hmiakô liata a thi khai tlâh châ tlai ei ta, châhrasala châ chakaotuhpa he pati na dôh lâhpazy hry liata eina pahlao chi. Abei hnohta a haw via awpa ta khâpa thaichâna ma ei hnei khao?” tah ta.

²⁹ Abei ta a hnohta, “Na reipa cha â daih na. Nâma nata Zibâ ta râh kha a pachhaih teh u,” tah ta.

³⁰ Mephibôse ta abei hnohta, “Ano ta hnei khai thlâh ha lah vâ, ei zibeipa abei ano o lâ thlalôhpa ta a vaw tlô hapa liana heta kei la ei palôh a tlâh na,” tah ta.

³¹ Kilia chyhsa Bâzilai chhao abei hnohta Zawdâh taih sie awpa nata Zawdâh chaka khei awpa ta Rôkeli tawhta a zu ta.

³² Bâzilai cha machâ kaw bâ ta, kô sychariepa châ ha ta. Chyhsa hneirôh ngaitapa châ ta, Mâhanai liata abei a y chhôh kha, nie awpazy a vaw pie tyhpa a châ.

³³ Abei ta Bâzilai hnohta, “Zawdâh na chaka khei hra mah y. Zerusale liata ei hnohta y aw chi ta, keima ta ei cha mohôh aw,” tah ta.

³⁴ Bâzilai ta abei hnohta, “Hrona kô nata noh zy khazie hnei chy na ta ma, abei hnohta Zerusale lâ cha ei sie hra aw tly?

³⁵ Tanoh he kô sycharie châ ha na ta, hmo chhiepa nata hmo phapa chhao ei pachhaih thai khao ma? Châ chakaotuhpa heta ei niepa nata ei dopazy a pahâh nata pahâh lei zy ei pahno khao ma? Chapaw hlasathaipazy nata chanô hlasathaipazy ao chhao ei thei thei khao ma? Châ chakaotuhpa he khazia ma ei zibeipa abei châta phaori a baichhatuhpa ei châ aw?

³⁶ Châ chakaotuhpa he abei Zawdâh chaka khei ta, lâcho rakha taih deita cha vaw pathlie awpa ei chhuah. Khazia abei ta phana ty cha cha hawhta eina thô cheingei aw tly?

³⁷ Ei khih bôpi, ei nô nata ei paw thlâ kiapâh liata ei thi thei nawpa ta, ngiachhiepa ta châ chakaotuhpa he na pakuasa ha mah y. Anodeikuacha, moh tua, châ chakaotuhpa Kihâ hih, ano he ei zibeipa abei hnohta vaw sie sala, pha na tahpa hawhta ano châta tao hri mah y,” tah ta.

³⁸ Abei ta a chhy ta, “Kihâ cha ei hnohta sie aw ta, pha na tahzie lymâ hawhta ano châta ei tao aw. Hmo khâpa rai eina hiapa maih chi cha ei cha taopa lymâ aw,” tah ta.

³⁹ Zawpi zydua cha Zawdâh haosâ chaka ei ta, abei chhao chaka hra ta. Abei ta Bâzilai cha a pahnâ ta, byhnâ awpa ta. Bâzilai cha a o lâ a lie ha ta.

⁴⁰ Abei cha Kilkal pangai ta, Kihâ chhao a hnohta sie hra ta. Zudâh chyhsa zydua ta abei cha a chhi ei ta, Izarei chyhsa chhao â khophie amâ hlao hra.

⁴¹ Izarei chyhsa zydua cha abei lâ a vy ei ta, abei hnohta, “Khazia eima unawhpa Zudâh mo heta cha paru ei ta, abei nata a chhôhkhazy nata Dâvi chyhsa zydua Zawdâh haosâ ama cha kia khei tly?” tah ei ta.

⁴² Zudâh mo zydua ta Izarei mo cha a chhy ei ta, “Abei he eima heinawh hniapa a châpa vâta a châ. Khazia ma he kyh liata nama hie a hâh tly? Abei pati eima nie ma? Hmo miah a piepa a y ma?” tah ei ta.

⁴³ Izarei mo ta Zudâh mo cha a chhy ei ta, ama hnohta, “Abei liana heta tovyuh vyuh hrawh hnei pi ta, Dâvi liana heta nâmo hlâta tovyuh eima hnei via mâh tâh. Khazia ma khâpasaw ta miah nama rei vei? Eima bei a vaw chhi heih nawpa kyh he a pahrua tuatuhpa châ ma pi mâ?” tah ei ta. Châhrasala Zudâh mo bie cha Izarei mo bie hlâta pachyu via ha ta.