2 SAMUELA 18 - Mara Bible RV (BSI)

Absalaw thina

¹ Dâvi ta a hnohta chyhsa a ypazy maluh reih ta, pheisaih sâh kha chô liata hyutuhpazy nata za kha chô liata hyutuhpazy tao ta.

² Dâvi ta pheisaihzy cha tuah ta, su thôh su kha cha Zôabâ ta hyu ta, su kha cha Zôabâ unawhpa Abisai, Zeru sawchapawpa ta hyu ta, su kha hropa cha Kiti chyhsa Itai ta a hyu ei. Abei ta pheisaihzy hnohta, “Keima chhao nama hnohta ei vaw sie hra aw,” tah ta.

³ Châhrasala zawpizy ta, “Sie aw va chi. Keimo sahlao he cha a râ hapa rai châ sih la, pei tah leipa aw ei ta, â khophie thi ha hra sih la, pei tah aw veih ei, nâma deikua cha keimo sahlao 10,000 tlu ta a sôhpa na châ. Chavâta khihpi tawhta baona miah na vaw pie awpa a pha via aw,” tah ei ta.

⁴ Abei ta ama hnohta, “Pha nama tahpa maih ei tao aw,” tah ta. Abei cha thokhy chhikao kiah liata a duah ta, pheisaih zydua cha a za za ta nata a sâh sâh ta pua ei ta.

⁵ Abei ta Zôabâ, Abisai nata Itai zy cha, “Keima vâta thyutliapa Absalaw cha bâh kei chado muh vy,” tahpa ta biepie ta. Abei ta Absalaw kyh liata pheisaih hyutuhpa zydua bie a piepa cha zawpi zydua chhao ta thei ei ta.

⁶ Pheisaihzy cha Izarei a dyuh awpa ta lyurâhpa lâ sie ei ta, amâ dyuhna su cha Epharai râhmâhpa liata châ ta.

⁷ Cha liata Dâvi chyhsazy hmiakô liata Izarei chyhsazy cha pahniepa ta y ha ei ta. Cha noh ta, cha liata chyhsa hluhpi thi ei ta, thy no dua thiepa ama châ.

⁸ Adyuhna cha râh chhôh zydua liata tlô ta, cha noh ta râhmâhpa ta chyhsa a palâpa cha, zaozi ta a palâpa hlâ chhao ta ama hluh via.

⁹ Absalaw cha Dâvi chyhsazy a kei tyh ta. Absalaw cha a sabaitu kiah ta. Sabaitu cha ôkâ tho chiah buh ru ngaitapa ry liata a ngia ta. Absalaw luh cha ôkâ tho chiah liata a taw ha ta, avâ nata alei likawh liata a bangiehpa ta y thlâh ha ta. A ry liata sabaitu cha a râ syulyu ha ta.

¹⁰ Chyhsa pakha ta hmô ta, Zôabâ chho ta, “Ôkâ tho liata Absalaw a bangieh thlâh hapa ei hmô,” tah ta.

¹¹ Zôabâ ta a chhotuhpa hnohta, “Khâpa â? Na hmô tlai ma? Khazia thiepa ta alei lâ na pathla ha vei? Tâkâ tlaw hrawh nata chaisaihna ei cha pie awpa tlai,” tah ta.

¹² Cha chyhsa chata Zôabâ hnohta, “Ei ku liata tâkâ tlaw sâh kha ei daopa chhao ta, abei sawchapawpa chô liata ei ku hy cheita aw va na. Eima nah theina lia tlai ta abei ta nâma nata Abisai nata Itai hnohta, ‘Keima vâta thyutliapa Absalaw kha rie pahlôh muh vy,’ tahpa ta bie a cha piepa ei kha.

¹³ Â doleipa ta ano hrona lapa cha keima hrona lapa a châ aw, abei tawhta cha khâpa hmahta nyu theipa châ tlôh leipa ta, nâma cha a phih ha tlôh aw chi ta,” tah ta.

¹⁴ Zôabâ ta, “He hawhpa chyhsa hnohta la daihti pahryuh ngâ aw va na,” tah ta, asei miathôh a chei ta, Absalaw cha ôkâ tho liata a hrohpa ta a y thlâh ha nota a châh-ao liata a chô ta.

¹⁵ Zôabâ chhaichhi a chabatuhpa thyutlia pahrawhzy ta Absalaw cha vaw chadô ei ta, a chô ei ta, ama thie haw.

¹⁶ Zôabâ ta chiahmie tô ta, chatanachata pheisaihzy cha Zôabâ ta a chalihsa hapa vâ ei ta, Izarei ama chadaina tawhta amâ lie haw.

¹⁷ Absalaw ri cha la ei ta, râhmâhpa liata khaohtlô a thu ngaitapa liata thy ei ta, a chô liata alô hluhpi pacho thlu ei ta. Izarei zydua cha ama poh o chyu lâta a râ ha ei ta.

¹⁸ Absalaw kha a hro chhôh ta Bei Saikao liata lô a vaw bô ha ta, “Ei moh a chhy awpa sawchapaw hra hnei tlôh leipa na ta, chavâta ei moh a lei lei nawpa ta keimasasyh ta lô ei bô ha aw,” tah ta, chavâta lôbô cha ano moh bi ta, cha cha tanoh taihta Absalaw Lôbô tahpa a châ.

¹⁹ Zadô sawchapawpa Ahimazi ta, “A kei râ aw na ta, Abeipa ta a chariahpa ku tawhta a pachha hapa thâtih abei ei kei chho aw,” tah ta.

²⁰ Zôabâ ta a hnohta, “Tanoh la thâtih a chho awpa he nâma na châ awpa pha vei, a noh hro ta chho lah vâ chi, abei sawchapawpa thi ha tlôh ta, tanoh la nâ ta thâtih na chho awpa pha vei,” tah ta.

²¹ Zôabâ ta Kusi chyhsa hnohta, “Sie la, na hmo hmôpa kha abei kei chho teh,” tah ta. Kusi chyhsa cha Zôabâ hmiakô liata a bôh ta, a kei râ ta.

²² Zadô sawchapawpa Ahimazi ta Zôabâ hnohta, “Khâpa rai châ sala, Kusi chyhsa kha ei kei chadai thlâh ha tua aw,” tah ta. Zôabâ ta, “Ei sawchapawpa y, khazia nâ chadai khoh tly, thâtih tlôkheina lymâ a hmô awpa chhao châ chi vâ?” tah ta.

²³ Châhrasala ano ta, “Khâpa rai châ sala ei kei râ aw,” tah khâchâ ha ta. Zôabâ ta, “A kei râ teh,” tah ta. Ahimazi cha bypi lâpi lâta a râ ta, Kusi chyhsa cha chhao ha ta.

²⁴ Dâvi cha thokhy chhikao mianopa likawh liata a tyuh thlâh ha ta. Riahvaituhpa cha khôtho lâ a daihpa thokhy chhikao chô lâ kiah ta, mohmia pasaih ta, chyhsa pakha ano deita a vaw râpa hmô ta.

²⁵ Riahvaituhpa cha awh ta, abei chho ta, abei ta, “Ano dei a châ khiahta la, thâtih vaw tlôkheipa a hnei chuh,” tah ta. A vaw râpa cha a vaw hnia lymâ ta.

²⁶ Riahvaituhpa ta chyhsa hropa a vaw râpa hmô heih ta, riahvaituhpa ta chhikao vaituhpa aw ta, a hnohta, “Moh tua, chyhsa hropa ano dei ta â vaw râ heih huh!” tah ta. Abei ta, “Ano chhao thâtih a vaw tlôkhei awpa a châ chuh,” tah ta.

²⁷ Riahvaituhpa ta, “A hmia lâtapa a râzie hao Zadô sawchapawpa Ahimazi a râzie a lyu kawpa ta ei pahno,” tah ta. Abei ta, “Ano cha chyhsa phapa a châ, thâtih pha a vaw tlôkheipa a châ aw,” tah ta.

²⁸ Ahimazi ta awh ta, abei hnohta, “Thâtih a pha khai,” tah ta. A hmia alei lâ a khupa ta abei hmiakô liata a bôh ta, a hnohta, “Ei zibeipa abei he a dyuh ta, ku a hypa chyhsazy na ku liata châ pietuhpa Abeipa na Khazohpa cha reithaipa ta y mawh sy,” tah ta.

²⁹ Abei ta, “Thyutliapa Absalaw zaw a pha ma?” tah ta. Ahimazi ta a chhy ta, “Zôabâ ta abei chakaotuhpa, nâma châ chakaotuhpa kei he eina vaw tua nota, amâ tymâ ngaitapa hmô na ta, châhrasala khâpa hmo ma tahpa deikua la pahno va na,” tah ta.

³⁰ Abei ta, “Ei kâ lâ a hnei la, a duah chy teh,” tah ta. A kâ lâ a hnei ta, cha liata a duah ta.

³¹ Chatawhcha Kusi chyhsa cha vaw tlô ta, Kusi chyhsa chata, “Ei zibeipa abei châta thâtih ei vaw tlôkhei! Abeipa ta châ dyuhtuhpa zydua ku tawhta tanoh a cha pachha haw,” tah ta.

³² Abei ta Kusi chyhsa hnohta, “Thyutliapa Absalaw a pha ma?” tah ta. Kusi chyhsa ta a chhy ta, “Ei zibeipa abei chariahpazy nata na chhiena a tluatuhpa zydua cha, thyutliapa hawhta châ khai mawh ei sy,” tah ta.

³³ Abei cha a palôh pasa ngaita ta, thokhy chhikao chô lâta chhôhpadâhpa lâ khy ta, cha ta. A khy pâ ta, “Hy ei sawchapawpa Absalaw, ei sawchapawpa, ei sawchapawpa Absalaw! Nâma vyuhpa ta keima tlao ei thi thlâh ha awpa tlai! Hy Absalaw, ei sawchapawpa, ei sawchapawpa y!” tah ta.