2 SAMUELA 17 - Mara Bible RV (BSI)

Husai ta Dâvi a pachha

¹ Ahitôphe ta Absalaw hnohta, “Chyhsa 12,000 a tlyh aw na ta, tazâ Dâvi a chadai awpa ta ei pua aw.

² A riethei thachhâ kaw nota pachhai aw na ta, ei pachisa aw. Chatanachata a hnohta chyhsa a ypa zydua cha a râpai aw ei ta, abei deita ei thie aw.

³ Myuh ta myuhneituhpa lâ â dipa hawhta, zawpi zydua nâ lâta ei vaw kuakhei khai aw ei. A hrona na teipa chyhsa pakha thina cha chyhsa zydua vaw kuana châ aw ta, chatanachata chyhsa zydua thlalôhpa ta ama y aw,” tah ta.

⁴ Cha bie chata Absalaw nata Izarei machâ zydua cha palysa kaw ta.

⁵ Absalaw ta, “Arakhi chyhsa Husai kha kei aw u la, ano reipa nathlie tua hra ei suh u,” tah ta.

⁶ Husai cha Absalaw kô a vaw tlô nahta, Absalaw ta a hnohta, “Ahitôphe ta hetana heta reih ta, a reipa hawhna heta eima tao aw ma? Tao lei awpa a châ khiahta cha, kheihta tao awpa ma a châ, vaw reih tua,” tah ta.

⁷ Husai ta Absalaw hnohta, “Tahmâ tahpa liana heta la Ahitôphe ryhraona he pha vei,” tah ta.

⁸ Husai ta, “Na paw nata a chyhsazy cha na pahno ei, pasaiphazy châ ei ta, chyhsa chhyu ngaitapa, lyurâhpa liata chavyh a taw la hapa hawhta amâ hrâh. Cha dei châ vei, na paw cha a dyuhpa chyhsa châ ta, zawpi hry liata a rie ngyu aw vei.

⁹ Pachâ tua, tahmâ chhao he khataih khaohtlô liata tlyma, khataih su liata tlyma, â nyu ha bâ aw. Âmo ta na chyhsazy tlao a vaw dyuh tua aw ei ta, zawpi ama pao hôlô khiahta cha, a theipa maihta, ‘Absalaw a zituhpazy thata ama thie,’ tah aw ei ta,

¹⁰ chakeibarôhneipa palôh a phaohpa pasaiphazy palôh taihta a dua khai ha aw. Na paw cha chyhsa thatlôpa châ ta, a hnohta a ypazy chhao pasaiphazy ama châzie Izarei zydua ta pahno khai tlôh ei ta.

¹¹ Keima ryhraopa cha he he a châ: Izarei zydua Dânâ tawhta Besebâ taihta, tilaipi kiah liata sadi zie tlai ta nâ lâta awpakhy khaipa châ sala, adyuhna lâ cha pôhpa tlai ta na sie hra aw.

¹² Khataih su liata tlyma cha, âmo tlô thlupa ta hmô aw pi ta, alei liata diati a tlapa hawhta tla thlu aw pi ta, ano nata a hnohta a ypa zydua pakha hmahta pahlôh aw ma pi.

¹³ Cha dei châ vei, khihpi lâ â sy khiahta cha, Izarei zydua ta khawhhri a cheipa ta, cha khihpi lâ cha vawh aw pi ta, khihpi liata lôchapo dikaripa chhao a y khao leina taihta saikao lâ eimâ daophi khai ha aw,” tah ta.

¹⁴ Absalaw nata Izarei chyhsa zydua ta, “Arakhi chyhsa Husai ryhraopa he Ahitôphe ryhraopa hlâta a pha via na,” tah ei ta. Absalaw chô liata Abeipa ta chhiena a patlôsa thei nawpa ta, Ahitôphe ryhraona phapa cha pahnie awpa ta Abeipa ta a vaw pachhuahpanoh hapa a châ.

¹⁵ Chatawhcha Husai ta theihthaipa Zadô nata Abiathâ hnohta, “Ahitôphe ta Absalaw nata Izarei machâzy châta, cha hawh kha hawhta ryhrao ta, kei ta cha hawh kha hawhta ryh ei rao.

¹⁶ Chavâta a chatliepa ta chyhsa tuah u la, ‘Tazâ cha râhchawhpa chavah kiahzy liata a rie khao leipa u la, khâpa rai châ sala chavah chaka ha teh u, chataleipatala abei nata a hnohta a ypa zydua kha ama palâ khai pathlei aw,’ tahpa ta Dâvi kei pachhosa teh u,” tah ta.

¹⁷ Zawnathâ nata Ahimazi cha Erôke liata y ei ta. Khihpi amâ ngiapa ahy hmahta ama hmô awpa a pha leipa vâta, chakaotuhnô pakha ta âmo cha bie kei chho tyh ta, âmo ta Bei Dâvi ama chho pachhuah tyh.

¹⁸ Châhrasala satlia pakha ta âmo cha vaw hmô ta, Absalaw kei chho ta. Ama pano ta thlai a râ ei ta, Bahuri liata chyhsa pakha, a tlyhmia liata tikhaoh a hneipa o lâ pangai ei ta, tikhaoh chhôh lâ chô ei ta.

¹⁹ Chanô ta tikhaoh cha a phiehru ta thlai chhiehruh ta, a chô liata sâh zawh ta, tikhaoh a y tahpa chhao pahno thei awpa châ khao leipa ta.

²⁰ Absalaw chakaotuhpazy cha chanô o lâ vawh ei ta, a hnohta, “Ahimazi nata Zawnathâ kha khataih liata ma ama y?” tah ei ta. Chanô ta ama hnohta, “Chavah ama chaka bâ aw,” tah ta. Tlua ei ta, hmô leipa ei ta, Zerusale lâ a lie ha heih ei ta.

²¹ Ama khô nahta, tikhaoh tawhta kaw pua ei ta, sie ei ta, Bei Dâvi cha kei chho ei ta. Dâvi hnohta, “Thyu u la, chavah chaka para teh u, Ahitôphe ta cha hawh kha hawhta nâma a dyuh nawpa ta ryhraona a tao,” tah ei ta.

²² Dâvi nata a hnohta chyhsa a ypa zydua cha thyu ei ta, Zawdâh chaka ei ta. Khih vaw deih ta, Zawdâh chaka leipa ta siesaipa pakha hmah y veih ei.

²³ Ahitôphe cha ano ryhraona hawhta taopa a châ leipa a pahno nahta, alâ ky padia ta, pua ta, ano khih liata a o lâ sie ha ta. A chhôhkha khihsatôhtuna paryh ta, a paaosao ta, thi ta, a paw thlâ liata ama pabu haw.

Dâvi ta Mâhanai â chhai

²⁴ Dâvi cha Mâhanai kei tlô ta. Absalaw cha a hnohta Izarei chyhsa a ypa zydua chhaota Zawdâh chaka ei ta.

²⁵ Absalaw ta Amâsâ cha Zôabâ su liata pheisaih hyutuhpa ta soh ta. Amâsâ he Ismela chyhsa a moh Zithâ ama tahpa sawchapawpa a châ. Zithâ he Nahâsâ sawchanô Abikai vahpa châ ta, Nahâsâ cha Zôabâ nô Zeru narônô a châ.

²⁶ Izarei nata Absalaw cha Kilia râh liata riehmo paryh ei ta.

²⁷ Dâvi cha Mâhanai a vaw tlô nahta, Amawna pathla Râbâ khihpa Nahâsâ sawchapawpa Sôbi, Lôdebâ khihpa Amie sawchapawpa Mâkhi nata Rôkeli khihpa Kilia chyhsa Bâzilai zy ta

²⁸ hmohphawzy, rahôzy, alei beihzy, âtâ sâhzy, bâli sâhzy, viahchhâ pakâhpa zy, biazy, abiezy, abiah chateipazy,

²⁹ kheihtizy, sâhpiti kuapazy, mietakuzy nata viahchao sâhpiti kuapazy Dâvi nata a hnohta chyhsa a ypazy nie awpa ta vaw cheih ei ta. “Zawpizy cha râhchawhpa liata ama nodi ta, panao hôlô ei ta, ama dâh a phi ngaita,” tahpa ama theipa vâta a châ.