2 SAMUELA 16 - Mara Bible RV (BSI)

Dâvi nata Zibâ

¹ Dâvi cha tlâh laki bâhta a khô nahta, Mephibôse chakaotuhpa Zibâ ta vaw dy ta. Alâ ky padia chiehpa pô nozy cha viahchhâ tlâ za no, kre thei chawhpa sao za kha, nopi theilâpa za kha nata kresawhti ôh kha paphaosapa ta a vy ta.

² Abei ta Zibâ hnohta, “Khazia hezy he na vaw chei?” tah ta. Zibâ ta, “Alâzy he abei chhôhkhazy kia awpa châ ta, viahchhâ nata nopi theilâpazy he satliazy nie awpa châ ta, kresawhti he râhchawhpa liata thazeipazy do awpa a châ,” tah ta.

³ Abei ta, “Na zibeipa sawchapawpa zaw, khataih liata ma a y?” tah ta. Zibâ ta abei hnohta, “‘Tanoh he Izarei phopi ta ei paw khinarâh eina pie pakhua aw ei,’ tah ta, Zerusale liata a vaw y haw,” tah ta.

⁴ Abei ta Zibâ hnohta, “Nathlie teh, Mephibôse hneipa zydua nâma eih a châ,” tah ta. Zibâ ta, “Ei châ naoh na, Hy ei zibeipa abei y, na modypa ta y ei chhuah lymâ aw,” tah ta.

Simei ta Dâvi chhie a sapa

⁵ Bei Dâvi cha Bahuri a tlô nahta, Sawla pho heihpa Kerâ sawchapawpa a moh Simei ama tahpa cha vaw pua ta, chhiesa lymâna chôta a vy ta.

⁶ Bei Dâvi nata bei chakaotuhpa zydua cha alô ta vawh ta. Zawpi zydua nata pasaipha zydua cha bei chavei chachâh ta y thlâh ha ei ta.

⁷ Simei cha chhiesa ta, hetana heta tah ta, “Pua teh, nâ thisaih palo hmâhpa nata moleipa chyhsa chi kha, pua syulyu ha teh.

⁸ A ryureina na chhupa Sawla chhôhkha thisaih zydua kha Abeipa ta na chô liata vaw paliesa ta, khinarâh cha na sawchapawpa Absalaw hnohta Abeipa ta a pie haw. Pachâ teh, thisaih palo hmâhpa chyhsa na châpa vâta, nâmasasyh ta nâ parao haw,” tah ta.

⁹ Zeru sawchapawpa Abisai ta abei hnohta, “Hao i thiruapa hao ta ei zibeipa abei he khâpa vâta chhie a sapa ma a châ tly? Vawh aw na ta, a luh ei kei tai tua aw” tah ta.

¹⁰ Châhrasala abei ta, “Nâmo, Zeru sawchapawzy saih u, a chahraoh khoh khah u. Abeipa ta, ‘Davi chhiesapa teh,’ a tahpa a châ khiahta cha, chhiesa thlâh ha sa. Ahy ma, ‘Khazia kha hawhta na tao’ a tah thei aw?” tah ta.

¹¹ Dâvi ta Abisai nata bei chakaotuhpa zydua hnohta, “Pachâ teh u, ei sawchapawpa, ei chhôh chhipa cheingei ta thie einâ chhuahpa châ ta, he Benzami chyhsa chhochhi heta cha, thie einâ chhuah pachai aw dia! Kheihta hmahta tah khah u. Chhie cha sa thlâh ha lah vâ. Abeipa ta a pataosapa na a châ aw.

¹² Abeipa ta ei chô liata â doleipa ta a hmotaopa he hmô aw ta, tanoh ta ei chô liata chhie a sapa he a phapa lâta Abeipa ta eina thô thei mâh tâh,” tah ta.

¹³ Chatanachata Dâvi nata a chyhsazy cha lâpi liata sie lymâ ei ta, Simei cha âmo dady ta tlâh hiakha lâta sie lymâ hra ta, chhiesa pâna chôta sie laih ta, Dâvi cha alô ta vawh ta, buchâh zy hie ta.

¹⁴ Abei nata a hnohta chyhsa a ypa zydua cha, riethei kawpa ta Zawdâh tlô ei ta, cha liata a tha a pahno ta.

¹⁵ Absalaw nata Izarei phopi, Izarei zawpi zydua cha Zerusale lâ sie ei ta, a hnohta Ahitôphe chhao a hlao ta.

¹⁶ Dâvi viasapa Arakhi chyhsa Husai cha Absalaw kô a tlô nahta, Husai ta Absalaw hnohta, “Abei cha hroh pareih mawh sy! Abei cha hroh pareih mawh sy!” tah ta.

¹⁷ Absalaw ta Husai hnohta, “He hawhna heta ma na viasapa châta ngâ nâ chhihzie na palâsa? Khazia na viasapa hnohta na sie hra vei?” tah ta.

¹⁸ Husai ta Absalaw hnohta, “Sie aw va na, Abeipa nata he zawpizy nata Izarei chyhsa zydua ta amâ tlyhpa eih châ aw na ta, ano hnohta ei y lymâ aw.

¹⁹ Cha dei châ vei, ahy ma ei chakao aw? A sawchapawpa ei chakao bâ awpa châ vei ma? Na paw ei chakao tyhpa hawhna khata, tahmâ nâ ei cha chakao bâ aw,” tah ta.

²⁰ Absalaw ta Ahitôphe hnohta, “Khâpa ma eima tao tua chai aw? Na ryhraozie reih teh,” tah ta.

²¹ Ahitôphe ta Absalaw hnohta, “Na paw ta o hâ awpa ta a sopa a nôthozy lâ a kei ngia teh, chatanachata Izarei zydua ta na paw châta roh chhiepa ta nâ tao haw tahpa vaw pahno aw ei ta, na chhâh a châpa zydua ku thapatlôpa ta a y aw,” tah ta.

²² Chatanachata Absalaw châta vâphuh liata poh o parai ei ta, Izarei zydua mohmô ta a paw nôthozy lâ cha a ngia ta.

²³ Kha daihti liata cha, Ahitôphe ryhraona biezy cha Khazohpa bie hawhta pachâpa a châ tyh. Chavâta Ahitôphe ryhraokheinazy cha, Dâvi chhao, Absalaw chhao, ama pasô ngaitapa a châ.