2 SAMUELA 15 - Mara Bible RV (BSI)

Absalaw beidyuchhai achhuna

¹ Cha khai tawhta hetana heta vaw châ ta, Absalaw ta talailih miakha nata arâzy nata chyhsa sypangawh a hmia lâta a râ awpa zy a chhuanoh ta.

² Absalaw cha mydi ta thyu ta, thokhy chhikao lâpi kiah liata a duah tyh ta. Bie pachia awpa abei hnohta a vaw tlôkheipa maih Absalaw ta aw ta, a hnohta, “Khataih khihpa ma na châ?” tah ta. Ano ta, “Châ chakaotuhpa he Izarei chi, cha hawh kha hawhpa na ei châ,” a tah nahta,

³ Absalaw ta, “Na reipa cha pha ta, â do. Châhrasala a pachâtuh awpa ta abei ta ahy hmah rao vei,” tah tyh ta.

⁴ Absalaw ta, “Kei he râh liata ryureituhpa châ sala ei tah kaw dia! Ryureituhpa ei châ khiahta cha, biepeipa nata leihna bie a hneipa maihta kei lâ a vy aw ei ta, â dopa ta ei pachiapa tyh awpa ei tlai!,” tah tyh ta.

⁵ Ahy rai ano a naoh awpa ta a vaw hniapa maih cha paza ta, patu ta, a pahnâ tyh ta.

⁶ Cha hawhna chata Absalaw ta abei hnohta biepeipa a vaw tlôkheipa Izarei saw zydua chô liata tao tyh ta. Chatanachata Absalaw ta Izarei chyhsazy palôh cha ano lâta sy lymâ ta.

⁷ Kô sypalih tlohna noh ta, Absalaw ta abei hnohta, “Ngiachhiepa ta Abeipa lâta bie ei taihpa ei patlô thei nawpa ta Hebraw lâ na pasiesa mah y.

⁸ Châ chakaotuhpa heta Aramia râh Kesu liata ei y no kha, ‘Abeipa ta Zerusale lâ einâ chhi pakhua heih tlai khiahta cha, Abeipa ei chakao aw,’ tah­pa ta bie a vaw tai ha na ta,” tah ta.

⁹ Abei ta a hnohta, “Thlalôhpa ta sie mah y,” tah ta. Absalaw cha thyu ta, Hebraw lâ sie ta.

¹⁰ Absalaw ta, “Chiahmie pyu nama theipa nahta, ‘Absalaw cha Hebraw liata bei a châ haw,’ tah muh vy,” tahpa ta Izarei chi zydua lâ arulâta lyuhchâpazy tuah ta.

¹¹ Zerusale chyhsa hrua eihpa za no chhao Absalaw hnohta sie hra ei ta. Palôh phapa ta sie ei ta, khâpa hmahta pahno veih ei.

¹² Absalaw ta atheihnazy a hlâ chhôh ta chyhsa tuah ta, Kilô khihpa Ahitôphe, Dâvi ryhraokheituhpa cha, a khih Kilô lâ kei palasa ta. Teiparuna cha a thatlô via lymâ ta. Absalaw py chhao pôh via lymâ ei ta.

Dâvi Zerusale tawhta â râ

¹³ Zikyurâtuhpa pakha Dâvi lâ a vy ta, a hnohta, “Iza­rei chyhsa palôhzy cha Absalaw lâ â heih haw,” tah ta.

¹⁴ Chatawhcha Dâvi ta a hnohta Zerusale liata a ypa a chakaotuhpa zydua hnohta, “Thyu u la, a râ ei suh u, chataleipatala Absalaw tawhta ahy hmahta a boh aw ma pi. Pua para teh u, chataleipatala thlai ta miah vaw pha aw ta, eima chô liata chhiena patlôsa aw ta, zaozi ta khihpi he â vaw dyuh pathlei aw na,” tah ta.

¹⁵ Abei chakaotuh­pazy ta abei hnohta, “Châ chakaotuhpazy he eima zibeipa abei ta a reipa maih tao awpa ta eimâ mâ thlâh haw,” tah ei ta.

¹⁶ Abei cha pua ta, a o liata a ypa zydua ta pazi ei ta. A nôtho pahrawhzy deikua cha, o hâ awpa ta abei ta siesai ta.

¹⁷ Abei cha pua ta, zawpi zydua ta zi ei ta. O chhâna liata a pahâ ei ta.

¹⁸ A chakaotuhpa zydua ta Dâvi cha chapia ei ta, Khere mo zydua, Pele mo zydua, Kâthâ tawhta a vaw pazipa Kiti mo za charupa zydua cha abei hmia lâta sie ei ta.

¹⁹ Abei ta Kiti chyhsa Itai hnohta, “Khazia eima hnohta na vaw sie hra? Kua la abei hnohta kei y mah y. Chihropa na châ tho ta, na o a puasai hapa na châ khaw.

²⁰ Zâhnia tliata liata vaw tlô chi ta, tanoh he eima hnohta chakhâ kiah ta, chhutla chô awpa ta ei cha tao aw ma? Vaw pua taraw na ta, khataih lâ ma ei sie aw tahpa chhao pahno va na hih? Kua ha mah y. Na unawhzy chhao na hnohta a chhi ha mah y. Ngiachhiena nata ngâchhihna na hnohta y mawh sy,” tah ta.

²¹ Châhrasala Itai ta abei cha a chhy ta, a hnohta, “Abeipa hrona na­ta ei zibeipa abei hrona reipa ta ei reih, ei zibeipa abei yna maih liata, thina rai châ sala, hrona rai châ sala, cha liata châ chakaotuhpa chhao he ei y lymâ hra aw,” tah ta.

²² Dâvi ta Itai hnohta, “Cha khiahta la, sie la, sie lymâ mah y,” tah ta. Chatanachata Kiti chyhsa Itai cha a chyhsa zydua nata hawti zydua chhaota sie ha hra ta.

²³ Râh zydua ta aoh tlili ta cha ei ta. Zawpi zydua cha sie ei ta, abei cha Kidaraw chavah chaka ta, zawpi zydua cha râhchawhpa lâ pangaipa ta sie ei ta.

²⁴ Abiathâ chhao sie hra ta, Zadô nata Livai chi zydua chhao Khazohpa Biehrai Byh a sypa ta sie hra ei ta. Khazohpa Byh cha pachhô ei ta, zawpi zydua ta khihpi ama puasai khaina taihta hâ ei ta.

²⁵ Abei ta Zadô hnohta, “Khazohpa Byh kha khihpi chhôh lâ a sy pakhua teh u. Abeipa modypa ta ei y khiahta cha, nâ vaw chhi pakhua heih aw ta, Kha­zohpa Byh nata a pahrâna cha eina pahmôsa heih aw.

²⁶ Châhrasala ano ta, ‘Na chô liata a ly va na,’ eina tah ha khiahta deikua cha, moh teh u, he liata ei y hih, pha a tahpa hawhta ei chô liata tao mawh sy,” tah ta.

²⁷ Abei ta theihthaipa Zadô hnohta, “Hmôtheituhpa châ va chi ma? Thlalôhpa ta khihpi lâ kua ha mah y. Na sawchapawpa pano, nâma sawchapawpa Ahimazi nata Abiathâ sawchapaw Zawnathâ zy chhaota kua ha muh vy.

²⁸ Bie eina vaw pahnosa hlâlei chi cha, râhchawhpa chavahzy liata ei vaw hâ chy aw,” tah ta.

²⁹ Chatawhcha Zadô nata Abiathâ ta Khazohpa Byh cha Zerusale lâ kuakhei ei ta, âmo chhao Zerusale liata a ngua ha ei ta.

³⁰ Dâvi cha Ôli Tlâh lâ khyna lâpi lâta khy ta, chana chôta sie ta, a luh a khu ta, phei ruapa ta sie ta. A hnohta a ypa chyhsa zydua chhao ama luh a khu chyupa ta khy ei ta, cha lymâna chôta sie ei ta.

³¹ Chyhsa pakha ta Dâvi hnohta, “Ahitôphe cha Absalaw hnohta y ta, teiparutuhpazy hry liata â hlao hra,” tahpa ta chho ei ta. Dâvi ta, “Hy Abeipa, ei châ haw na, Ahitôphe ryhraokheina cha hruna lâta rie pachâsa mah y,” tah ta.

³² Dâvi cha Khazohpa achhyna tlâh laki a tlô nahta, Arakhi chyhsa Husai cha viahkao a hriepa a kypa ta, a luh liata alei chhaota ano dy awpa ta a vy ta.

³³ Dâvi ta a hnohta, “Ei hnohta na vaw sie hra khiahta la, ei châta phaohri tlao na châ aw.

³⁴ Châhrasala khihpi lâ a liepa ta, Absalaw hnohta, ‘Hy abei y, châ chakaotuhpa ta ei y aw, kha hlâta na paw chakaotuhpa ta ei y tyhpa hawhna khata, tahmâ he nâma chakaotuhpa ta ei y aw,’ na kei tah khiahta cha, Ahitôphe ryhraokheina tlao eina pahniepa aw chi.

³⁵ Cha liata na hnohta theihthaipa Zadô nata Abiathâ zy chhao ama y hra aw. Abei o tawhta bie a puapa na theipa maih theihthaipa Zadô nata Abiathâ zy na chho lymâ aw ei.

³⁶ Ama sawchapaw pano, Zadô sawchapawpa Ahimazi nata Abiathâ sawchapawpa Zawnathâ zy chhao ama hnohta ama y. Na theipa maih âmo liata eina vaw paphao lymâ aw chi,” tah ta.

³⁷ Chatanachata Dâvi viasa Husai cha, Absalaw Zerusale â ngia hai nota, ano chhao khihpi a ngia ha hra ta.