2 SAMUELA 14 - Mara Bible RV (BSI)

Zerusale lâ Absalaw a vaw kua

¹ Zeru sawchapawpa Zôabâ ta abei palôh cha Absalaw chô liata a y tahpa pahno ta.

² Chavâta Zôabâ ta Tekô khih lâ chyhsa tuah ta, cha liata chanô sopa pakha kei palasa ta, a hnohta, “Mâchhiesapa hawhta y pakhei la, mâchhiesana poh a bu la, sathaw chhao a thu khah y. Athipa châta bohpi mâchhie a sapa chanô hawhta y la,

³ abei lâ vawh aw chi ta, a hnohta hetana heta na tah aw,” tah ta. Zôabâ ta a pakah liata biezy pachy ta.

⁴ Tekô chanô ta abei cha bie a chho ta, a hmia alei lâ a khupa ta a naoh ta, a hnohta, “Hy abei y, na bao teh,” tah ta.

⁵ Abei ta a hnohta, “Khâpa rairuna ma na hnei?” tah ta. Ano ta, “Ei vahpa ta na thisai ha ta, nôhmei ei châ.

⁶ Na seichanô heta sawchapaw pano hnei na ta, lyu liata a tu ei ta, a pachhaih awpa y leipa ei ta, pakhapa ta a unawhpa cha tu ta a thie haw.

⁷ Ama pho zydua ta a baopasupa ta na seichanô he na thyuhnao ei ta, ei hnohta, ‘A unawhpa a thietuhpa kha miah pie teh, a unawhpa thie ta a hrona a lapa vâta, ano chhao eima thie aw. A ryutotuhpa chhao eima pahleipadia aw,’ tah ei ta. Cha hawhna chata ei mei a ia chhôhpa cha pachhai aw ei ta, ei vahpa cha moh hnei leipa nata alei chô liana heta pathla rai hnei leipa ta a y aw,” tah ta.

⁸ Abei ta chanô hnohta, “Na o lâ a di la, nâma kyh liata biepiepa ei vaw tao aw,” tah ta.

⁹ Tekô chanô ta abei hnohta, “Hy ei zibeipa abei y, thisaih maoh cha keima nata ei paw chhôhkha chô liata y sala, abei nata a beidyuchhai cha maophaoh khah sy,” tah ta.

¹⁰ Abei ta, “Ahy rai na chô liata khâpa bie rai a reihpa maih cha, kei lâ a vaw chhi mah y, cha hria heih khao aw vei,” tah ta.

¹¹ Chanô ta, “Ei châ haw na, thisaih phuh a latuhpa ta chyhsa thie khao leipa sala, ei sawchapawpa cha pahleipadiapa ta a y lei nawpa ta, abei heta Abeipa na Khazohpa rie a thei mah y,” tah ta. Abei ta, “Abeipa hrona reipa ta ei reih, na sawchapawpa sâbu miakha chhao alei liata tla aw vei,” tah ta.

¹² Chanô ta, “Ngiachhiepa ta, na seichanô heta ei zibeipa abei hnohta bie kawh khata ei reih via tua aw,” tah ta. Abei ta, “Reih teh,” tah ta.

¹³ Chanô ta, “Cha hawhpa khiahta cha, khâpa vâta ma he hawhpa hmo he taopa ta Khazohpa phopi a dyuh nâ chhuah? Abei heta ano eih a râ hapa dy a chhuah tlôh leipa ta, ano bie ta abei cha anosasyh thailei â pachâ haw.

¹⁴ Eima zydua ta eima thi khai aw. Alei liata ti patlaipa hawhta eima châ. Li pakhua thaipa châ khao vei. Hrona cha Khazohpa ta la aw vei. A râ hapa cha ano tawhta â hla pathlah lei nawpa ta ryh tlao a rao tyh hri.

¹⁵ Chyhsazy ta eina pachisapa vâ ei ta, he bie he rei awpa ta, tahmâ ei zibeipa abei hnohta ei vypa a châ. Na seichanô heta ei palôh liata, ‘Abei hnohta reih aw na ta, abei ta a seichanô hiapa cha a taopa ngyu aw lah.

¹⁶ Abei ta thei aw ta, Khazohpa ryu eima to lei nawpa ta kei nata ei sawchapawpa pahleipadia miah a chhuahpa chyhsa ku tawhtapa a seichanô he a pachha aw,’ tahpa ta pachâ na ta.

¹⁷ Abei, nâ ei zibeipa chi cha, Khazohpa vâlyuhchâpa hawhta, a chhiepa nata a phapa a pahrua thaipa na châpa vâta, na seichanô heta, ‘Ei zibeipa abei bie ta thlah eina palôh aw,’ tahpa ta ei pachâ. Abeipa na Khazohpa cha na hnohta y maw sy!” tah ta.

¹⁸ Abei ta chanô cha a chhy ta, a hnohta, “Ei cha hiahripa maih khâpa hmah na phih khah y,” tah ta. Chanô ta, “Ei zibeipa abei ta reih mawh sy,” tah ta.

¹⁹ Abei ta, “He kyh zydua liana heta Zôabâ ku â hlao ma?” tah ta. Chanô ta a chhy ta, a hnohta, “Ei zibeipa abei y, na thlahpa hrona reipa ta ei reih, ei zibeipa abei ta a rei hapa tawhta ahy hmahta chachâh lâ tlyma, chavei lâ tlyma, tlei thei aw veih ei. Châ chakaotuhpa Zôabâ ta bie na pie ta, ano ta he bie zydua he na seichanô pakah liata eina pachypa a châ.

²⁰ Hmo yzie panano awpa ta, he hmo he châ chakaotuhpa Zôabâ ta a tao. Ei zibeipa cha alei chô liata hmo zydua pahno thei awpa ta, Khazohpa vâlyuhchapa sona hawhpa sona a hneipa na châ,” tah ta.

²¹ Chatawhcha abei ta Zôabâ hnohta, “Pachâ teh, tahmâ na khozie hawhta ei tao aw. Sie la, thyutliapa Absalaw cha a vaw chhi mah y,” tah ta.

²² Zôabâ cha a hmia alei lâ a khupa ta pao ta, a naoh ta, abei cha byhnâ awpa ta. Zôabâ ta, “Hy ei zibeipa abei y, abei ta a chakaotuhpa hiapa hlao a patlohna liana heta, tanoh cha châ chakaotuhpa he na modypa ei châ tahpa ei pahno,” tah ta.

²³ Chatawhcha Zôabâ cha thyu ta, Kesu lâ sie ta, Absalaw cha Zerusale lâ a vaw chhi ta.

²⁴ Abei ta, “Ano o lâ a di sala, ei hmia na hmô khah sy,” tah ta. Absalaw cha a o lâ a di ta, abei hmia cha hmô leipa ta.

²⁵ Izarei zydua hry liata Absalaw tlu ta a chhithaina ama reithaipa pakha hmah y veih ei. A phei padih tawhta a luh laki taihta sei nawpa rai ano liata y vei.

²⁶ A sâ â hri kaw tyhpa vâta kô chhâna lâta a ngyu tyh ta, a sâ â ngyu nahta, a luh liata a sâ cha khopathliah tyh ta, abei khopathliahna hmâpa ta sekel za no a tloh ty.

²⁷ Absalaw cha sawchapaw pathôh nata sawchanô pakha sa ta, a sawchanô moh cha Tâmâri châ ta, chhithai ngaitapa a châ.

²⁸ Absalaw cha kô no bohloh Zerusale liata y ta, châhrasala abei hmia rai hmô leipa ta.

²⁹ Absalaw ta Zôabâ cha abei lâ tua awpa ta bieta ta, châhrasala a vy khoh leipa ta. A ei nona ta bieta heih ta, châhrasala a vy khoh pyly leipa ta.

³⁰ A chakaotuhpazy hnohta, “Moh tua u, Zôabâ lyu cha ei lyu â vaw daih. Bâli sâh hnei ta, sie u la, mei ta kei rao ha muh vy,” tah ta. Absalaw chakaotuhpazy ta lyu cha mei ta kei rao ei ta.

³¹ Zôabâ cha thyu ta, Absalaw cha a o liata a kei hmô ta, a hnohta, “Khâpa vâta ma châ chakaotuhpazy ta ei lyu mei ta ama rao?” tah ta.

³² Absalaw ta Zôabâ cha a chhy ta, a hnohta, “Pachâ teh, abei lâ cha tuahpa ta, a hnohta, ‘Khâpa­ vâta ma Kesu tawhta ei vy ngâ kawna tly? Kha liana kha vaw y thlâh ha aw sah la ei châta a pha via awpa tlai,’ tahpa ta kei chho awpa ta bie cha vaw ta na ta. Chavâta abei hmia cha tahmâ na pahmôsa teh. Paraona a hneipa ei châ khiahta cha, na thie thlâh ha mawh sy,” tah ta.

³³ Zôabâ cha abei lâ vawh ta, chho ta. Abei ta Absalaw cha aw ta, abei lâ vawh ta, a hmia alei lâ a khupa ta abei hmiakô liata a bôh ta, abei ta Absalaw cha a pahnâ ta.