2 SAMUELA 13 - Mara Bible RV (BSI)

Amanaw nata Tâmâri

¹ Cha khai tawhta hetana heta vaw châ ta, Dâvi sawchapawpa Absalaw ta sietanô hmi pha ngaitapa hnei ta, a moh cha Tâmâri a châ. Dâvi sawchapawpa Amanaw ta Tâmâri cha khoh ta.

² Amanaw cha a sietanô Tâmâri vâna chata a palôh rie thata theipa ta, pasakhei pâ ngâ kaw ta. Tâmâri he laihsa kôpa châ ta, chavâta a chô liata hmo kheihawhpa tlyma tao awpa cha Amanaw châta hmo ru ngaitapa a châ.

³ Amanaw heta viasa pakha, a moh Zônadâ ama tahpa hnei ta, ano he Dâvi unawhpa Simei sawchapawpa a châ. Zônadâ he chyhsa so piehpie ngaitapa châ ta.

⁴ Amanaw hnohta, “Aw, nâ abei sawchapawpa pi tlai chi ta, kheihtazieta ma my chareih ta palôh rietheipa ta na y thlâh haw? Na chho aw va chi ma?” tah ta. Amanaw ta a hnohta, “Ei unawhpa Absalaw sietanô Tâmâri ei khoh kawpa vâta a châ,” tah ta.

⁵ Zônadâ ta a hnohta, “Na rakhô liata a zia la, a tlâh leipa hawhta y pakhei la, na paw ta a cha vaw mo tita, a hnohta, ‘Ngiachhiepa ta ei sietanô Tâmâri a vy sala, viahchhâ ei nie awpa bâh na vaw pie mawh sy. Ei mohmô liata viahchhâ na taopa sala, a viahchhâ taopa cha moh aw na ta, ano ku ta eina paniesa aw,’ na vaw tah aw,” tah ta.

⁶ Amanaw cha a zia ta, tlâh leipa ta y pakhei ta, abei ta a vaw mo nahta, Amanaw ta abei hnohta, “Ngiachhiepa ta ei sietanô Tâmâri a vy sala, ei mohmô liata viahchhâ tlâ no na taopa sala, ano ku ta bâh na paniesa mawh sy,” tah ta.

⁷ Dâvi ta Tâmâri o lâ chyhsa tuah ta, a hnohta, “Na rilâhpa Amanaw o lâ vawh la, a nie awpa kei taopa mah y,” tah ta.

⁸ Tâmâri cha a rilâhpa Ama­naw o lâ vawh ta, Amanaw cha a vaw zia thlâh ha ta. Viahdie la ta, nyh ta, a mohmô liata viahchhâ taopa ta. Viahchhâ pakâhpazy taopa ta.

⁹ Ukâ cha cheihtha ta, viahchhâ thaoh ta a hmiakô liata kei soh ta, châhrasala nie khoh leipa ta. Amanaw ta, “Chyhsa zydua papua khai teh u,” tah ta. Chatanachata puasai khai ha ei ta.

¹⁰ Amanaw ta Tâmâri hnohta, “Pati kha chhôhpadâhpa lâ vaw cheih la, na ku ta bâh na vaw paniesa teh,” tah ta. Tâmâri ta viahchhâ a taopazy cha la ta, chhôhpadâhpa liata a rilâhpa Amanaw lâ a ngiakhei ta.

¹¹ Paniesa awpa ta a kiapâh lâ a vawkhei nahta, a ku vaw patu ta, a hnohta, “Ei sietanô, a vy la, ei hnohta a vaw zia teh,” tah ta.

¹² A sietanô ta a chhy ta, “Châ vei, ei rilâhpa, ei noh na pazao khah y. He hawhpa hmo he Izarei liata taopa chi châ vei. He hawhpa hmo hrupa he tao cheita khah y.

¹³ Kei he ei noh vaw zao ha sala, ahy hnohta ma ei tlôkhei khao aw? Nâ chhao, Izarei liata chyhsa hrupa ta pachâpa na châ aw mâh tâh. Chavâta tahmâ, ngiachhiepa ta abei chho mah y, eina hnei awpa chi cha paryhsa leipa ta y aw vei,” tah ta.

¹⁴ Châhrasala a bie nathlie khoh leipa ta. A sietanô hlâta a thatlô via tlôh ta, patupakhi ta, a ziakhei ha ta.

¹⁵ Cha khai tawhta Amanaw ta a sietanô cha a hao ngaita ta, â haona cha ano a kho nota a khona hlâ khata tha via syulyu ta. Amanaw ta a hnohta, “Thyu la, pua ha teh,” tah ta.

¹⁶ Tâmâri ta a hnohta, “Châ bao va, he hawhta eina papuapa vâ chi ta na moleina he, ei chô liata na taopa hlâna chhao khata a rarôh y via mâh tâh,” tah ta. Châhrasala Amanaw ta nathlie khoh hlei leipa ta.

¹⁷ A chakaotuhpa, ano a chakao ngâpa cha aw ta, a hnohta, “He chanô he keima tawhta papua la, ochhi khaw khâh ha mah y,” tah ta.

¹⁸ Tâmâri cha viahkao pasipa chapaipa a ky ta. He he abei sawchanô laihsa kôpazy amâ tobizie a châ. Amanaw chakaotuhpa ta Tâmâri cha papua ta, ochhi khaw khâh ha ta.

¹⁹ Tâmâri cha a luh buchâh a mia ta, a viahkao pasipa chapaipa â kypa cha hrie ta, a kuzy a luh liata khaih ta, aoh tlili ta cha laihpa ta a di ha ta.

²⁰ A rilâhpa Absalaw ta a hnohta, “Na rilâhpa Amanaw ma châ ykhei haw? Chatahrasala ei sietanô y, a chalih ha mah y, na rilâhpa a châ khawh, pachâ tu hlei khah y,” tah ta. Chatanachata Tâmâri cha a rilâhpa Absalaw o liata yru vâsâhpa ta y ta.

²¹ Cha hmo zydua cha Bei Dâvi ta a thei nahta, a hiehâh ngaita ta. Châhrasala Amanaw cha a sawchapaw uhtheipa a châpa vâta dao kaw ta, hrie a chhuah leipa ta.

²² Absalaw deikua cha Amanaw hnohta bie chhiepa tlyma, bie phapa tlyma, khâpa hmah reih leipa ta, a sietanô Tâmâri noh a pazaopa vâta, Absalaw ta Amanaw cha a hao ngaita ta.

Absalaw ta Amanaw a thie

²³ Kô no bohloh a lei nahta, Absalaw cha Epharai kiapâh Bâlâhazô liata mietaku hmi pangyusa ta. Absalaw ta abei sawchapaw zydua hrua ta.

²⁴ Absalaw cha abei lâ vawh ta, a hnohta, “Châ chakaotuhpa heta mietaku hmi pangyusa na ta, abei nata a chakaotuhpazy chhao châ chakaotuhpa hnohta vaw sie hra muh vy,” tah ta.

²⁵ Châhrasala abei ta Absalaw hnohta, “Châ vei, ei sawchapawpa y, eima zydua ta cha sie khah ei suh u, na phaori eima châ pathlei aw na,” tah ta. Hrua rialia ta, châhrasala sie a chhuah leipa ta, byhnâ tlao awpa ta.

²⁶ Absalaw ta, “Cha hawhpa khiahta cha, ei unawhpa Amanaw chhâ eima hnohta pasiesa mah y,” tah ta. Abei ta a hnohta, “Khazia Amanaw cha na hnohta a vaw sie aw,” tah ta.

²⁷ Absalaw ta abei cha â haw ngâ thlâh hapa vâta, Amanaw nata abei sawchapaw zydua cha Absalaw hnohta sie awpa ta paryhsa ha ta.

²⁸ Absalaw ta a chakaotuhpazy hnohta biepie ta, “Ngia u la, Amanaw palôh cha kresawhti vâta thapha ngaitapa ta a y nahta, nama hnohta, ‘Amnaw kha thie teh u,’ ei cha tah ti ei ta, thie muh vy. Chi khuh vy. Bie ei cha pie ei. Nama riah a papha u la, a pachyu teh u,” tah ta.

²⁹ Absalaw chakaotuhpazy ta Absalaw biepiepa hawhta Amanaw cha thie ha ei ta. Abei sawchapawpa zydua cha thyu ei ta, ama sabaitu chyu kiah ei ta, a râ ha ei ta.

³⁰ Lâpi liata ama sie hai nota, “Absalaw ta abei sawchapaw zydua a thie khai ha ei, pakha hmahta pahlôh vei,” tahpa ta Dâvi lâ thâtih vaw tlô ta.

³¹ Abeipa cha thyu ta, a chysiazy hrie ta, alei liata a zia ta. A kiapâh liata a duahpa a chakaotuhpazy chhaota ama chysiazy hrie ei ta.

³² Dâvi unawhpa Simei sawchapawpa Zônadâ ta a chhy ta, a hnohta, “Abei ta abei sawchapaw thyutliapa zydua ama thie khai hapa hawhta pachâ khah sy, Amanaw deita a thi. A sietanô Tâmâri noh a pazao noh tawhna khata, Absalaw ta he hmo he tao awpa â vaw chhuah hapa a châ.

³³ Chavâta ei zibeipa heta abei sawcha­pawpa zydua ama thi khai hapa hawhta pachâpa ta a pachâ chhie khah sy. Amanaw deita a thi,” tah ta.

³⁴ Absalaw deikua cha a râ ha ta. Riahvaituhpa satliapa ta a mo kaw pachhua ta, mohmia pasaih ta, a hnôh lâta tlâh baikhaihpa lâpi lâ tawhta chyhsa hluhpi a vaw tlôpa hmô ta.

³⁵ Zônadâ ta abei hnohta, “Moh tua, abei sawchapawzy cha ama vaw tlô ha huh. Châ chakaotuhpa reipa hawhna tlai khata a vaw châ,” tah ta.

³⁶ A rei khaipa nahta, abei sawchapawzy cha vaw tlô pâ ha ei ta. Aoh tlili ta cha ei ta, abei nata a chakaotuhpazy chhao aoh tlili ta cha ei ta.

³⁷ Absalaw deikua cha a râ ha ta. Amihu sawchapawpa Kesu bei Tâmai lâ sie ta. Dâvi cha noh ly chhi ki ta a sawchapawpa mâchhiesa ta.

³⁸ Absalaw cha a râ ta, Kesu râh lâ sie ta, cha liata kô thôh kei y ta.

³⁹ Bei Dâvi cha Amanaw a thi tawhta a zyh zyh ta thlah vaw lôh laih ta. Absalaw cha vâ pathao ta, ano lâ sie awpa khoh kaw ta.