2 SAMUELA 12 - Mara Bible RV (BSI)

Nâthâ ta Dâvi a chhorei

¹ Abeipa ta Dâvi lâ Nâthâ tuah ta. Nâthâ cha Dâvi lâ vawh ta, a hnohta, “Khih miakha liata chyhsa pano y ei ta, pakha cha chyhsa hneirôhpa cha ta, pakha deikua cha sipasapa a châ.

² Chyhsa hneirôhpa cha mietaku zaw hluhpi nata viahchao hri hluhpi hnei ta,

³ chyhsa sipasapa deikua cha, mietakutaw chanôpa chyhpata pô kha, a chalei ta a chaleipa tah leipa ta cha, khâpa hmah hnei vei. A phapa ta mohôh ta, ano nata a sawzy hnohta laiseih ta, a beikoh liata nie ta, a nyu ta doh ta, a kalachhôh liata ypa ta, a sawchanô hawhta a pachâpa a châ.

⁴ Noh kha cha chyhsa hneirôhpa o liata khichhai pakha vaw tlô ta, ano mietaku zaw tawhta tlyma, a viahchao hri tawhta tlyma, a o liata a vaw tlôpa khichhai châta thiepa khoh leipa ta, chyhsa sipasapa mietakutaw cha chhu ta, a o liata a vaw tlôpa chyhsa cha tlao a thiepa,” tah ta.

⁵ Dâvi cha cha chyhsa chô liata a hiehâh ngaita ta, Nâthâ hnohta, “Abeipa hrona reipa ta ei reih, cha hmo a taotuhpa cha thi tlâh a châ,

⁶ ngiachhiena rai hnei leipa ta, cha hawhpa hmo cha a taopa vâta, mietakutaw cha a lie palih ta a thô awpa a châ,” tah ta.

⁷ Nâthâ ta Dâvi hnohta, “Cha chyhsa cha nâma he na châ! Abeipa, Izarei Khazohpa ta hetana heta a tah: ‘Izarei bei châta sathaw cha thu na ta, Sawla ku tawhta ei cha pachha.

⁸ Na zibeipa o cha patosa na ta, na zibeipa lapinôzy na kalachhôh liata soh na ta, Izarei pathla nata Zudâh pathlazy ei cha pie. He he a chyh tu ha khiahta cha, a hluh via syulyu ta ei cha baichha thlâh ha awpa châ ta.

⁹ Khazia ma Abeipa bie khâpasaw ta rei leipa chi ta, a mohmô liata hmo pha leipa na tao? Hiti chyhsa Uria cha zaozi ta thie chi ta, a lapinô cha na lapinô châta hnei chi ta, Amawna mo zaozi ta Uria cha na thie haw.

¹⁰ Khâpasaw ta na rei leipa chi ta, Hiti chyhsa Uria lapinô cha na lapinô ta na hneipa vâta, zaozi ta na pathlazy puasai khao aw vei,’ tah ta.

¹¹ Abeipa ta hetana heta a tah, ‘Pachâ teh, na pathlazy cheingei tawhta na chô liata hmo pha leipa a tao awpa padua aw na ta, na mohmô liata na lapinôzy la aw na ta, na opapa pie aw na ta, nohchhô sawhvaw ta na lapinôzy cha â ziakhei aw ei.

¹² Nâ ta la, arulâta tao chi ta, kei deikua ta cha, Izarei zydua mohmô liata nata nohchhô sawhvaw ta ei tao aw,’ a tah,” tah ta.

¹³ Dâvi ta Nâthâ hnohta, “Abeipa chô liata hmo ei parao haw,” tah ta. Nâthâ ta Dâvi hnohta, “Abeipa chhao ta na moleina a pahlei haw, thi aw va chi.

¹⁴ He na hmotaopa heta Abeipa chariahpazy châta ano ama reipachhie nawpa rypaohpa na taopa vâta, na saw a pihpa deikua cha a thi aw,” tah ta.

¹⁵ Cha bie cha a rei khai nahta, Nâthâ cha o lâ a di ha ta. Uria lapinô ta Dâvi châta a sapa hawtipa chô liata Abeipa ta a ku hy ta, hawti cha tlâh leipa ta vaw y ta.

Dâvi sawchapawpa thina

¹⁶ Dâvi cha hawti châta Khazohpa pado ta. Dâvi cha kâhvileipa ta y ta, o chhôh lâ a ngia ta, azozâkhihdei alei liata a zia ta.

¹⁷ A o liata machâzy thyu ei ta, alei tawhta pathyu awpa ta a kiapâh liata a kei duah ei ta. Châhrasala thyu khoh leipa ta, pati chhao ama hnohta nie hra vei.

¹⁸ A noh sarina noh ta hawtipa cha thi ha ta. Dâvi chakaotuhpazy ta hawtipa cha a thi haw tahpa chho awpa chi kaw ei ta, “Pachâ teh u, hawtipa a hro no kha a hnohta bie reih pi ta, eima ao miah nathlie khoh hlei vei. Kheihta ma hawtipa cha a thi haw tahpa eima chho ngâh aw? Anosasyh ta â pasasa thei aw mâh tâh,” tah ei ta.

¹⁹ A chakaotuhpazy ta bieparu ama rei ngâpa Dâvi ta a hmô nahta, hawtipa cha a thi haw tahpa pahno ha ta. Dâvi ta a chakaotuhpazy hnohta, “Hawtipa cha a thi ha ma?” tah ta. Âmo ta, “A thi ha na” tah ei ta.

²⁰ Chatawhcha Dâvi cha alei tawhta thyu ta, a ngai a si ta, sathaw a thu ta, a chysia a patly ta, Abeipa o lâ vawh ta, Abeipa a chhy ta. Cha khai tawhta o lâ a di ta, nie awpa pado ta, a hmiakô liata pati taopa ei ta, nie ta.

²¹ A chakaotuhpazy ta a hnohta, “He hmo na taopa he khâpa ma a yzie tly? Hawtipa a hro no kha ano châta kâhvileipa ta ypa ta thata cha chi ta, hawtipa a thi nahta hmâchhâh cha thyu chi ta pati tlao na nie bao,” tah ei ta.

²² Dâvi ta, “Hawtipa a hro thlâh ha chy no kha cha, ‘Abeipa ta na ngiachhie aw ta, hawtipa he a hroh thei mâh tâh, ahy a pahno,’ tah na ta, kâhvileipa ta y na ta, ei cha tlai.

²³ Châhrasala tahmâ cha thi ha ta, khazia kâhvileipa ta ei y ngâ kaw khao aw? Ei aw pakhua thei aw ma? Kei he ano lâ a sie awpa tlao ei châ, ano la kei lâ vaw kua khao aw vei,” tah ta.

Sawlawmaw pina

²⁴ Dâvi ta a lapinô Bâsebâ cha a thlah palôh ta, a hnohta a ngia ta, a ziakhei ta, sawchapaw sa ta, a moh Sawlawmaw bi ta. Ano cha Abeipa ta a kyh pachâ kaw ta.

²⁵ Hrohsopa Nâthâ hnohta Abeipa bie vaw tlô ta, “Abeipa vâta a châ” tahpa ta, hrohsopa Nâthâ ta a moh Zedidiah a bi.

Dâvi ta Râbâ a la

²⁶ Zôabâ ta Amawna mo khihpi Râbâ siehnao ta, bei khihpi cha la ta.

²⁷ Zôabâ ta Dâvi lâ zikyurâpazy tuah ta, a hnohta, “Râbâ a dyuh na ta, ti hluhna khihpi cha ei la haw.

²⁸ Tahmâ chyhsa a ypa zydua pakhy la, khihpi he dôh la, nâ ta la mah y. Chataleipatala keima ta khihpi he la aw na ta, ei moh a phaoh pathlei aw na,” tah ta.

²⁹ Dâvi ta pheisaih zydua pakhy ta, Râbâ lâ sie ta, a dyuh ta, la ta.

³⁰ Ama bei beilakho cha a luh tawhta la ta. Beilakho cha ngôh talent miakha a hri ta. Lôsôhpazy chhao a chhôh liata y ta, cha cha Dâvi luh liata pakho ei ta. Khihpi hraona sôh hluhpi chhao vaw phaoh ta.

³¹ Râbâ khihsawzy cha puakhei ta, thoânazy, leipaliena thua pazaopazy nata ahreizy hmâpa raihriatuhpazy ta âmo cha hmâh ta, leiraopa taonazy liata rai pahriasa ta. Cha hawhna chata Amawna khihpi zydua cha tao ta. Cha khai tawhta Dâvi nata pheisaih zydua cha Zerusale lâ a lie ha ei ta.